كىتاپ وقۋ مادەنيەتى قالىپتاسىپ كەلەدى

قوس جوبا دا ازاماتتىق باستامالاردى قولداۋ ورتالىعى مەن اقپارات جانە قوعامدىق دامۋ مينيسترلىگىنىڭ قولداۋىمەن ىسكە اسقان. حالىق اراسىندا كىتاپ وقۋدى ناسيحاتتاۋعا باعىتتالعان Bolashaq Books جوباسى كىتاپ وقۋ مادەنيەتىن قالىپتاستىرۋدى عانا ەمەس, سونداي-اق جاس ازاماتتاردىڭ ءبىلىم كوكجيەگىن كەڭەيتۋدى كوزدەيدى. ول ءۇشىن ەلىمىزدىڭ بارلىق وڭىرىندە قوعامدىق كىتاپ سورەلەرى ورناتىلدى. جوبا ۇيلەستىرۋشىسى جۇلدىز ءجۇنىسوۆا بيىلعى جىلدىڭ قورىتىندىلارىن شىعارا كەلە, الداعى جوسپارلارىنا توقتالدى.

«قاۋىمداستىق بۇل جوبانى ءارى قاراي دا جالعاستىرۋدى كوزدەپ وتىر. وسى جىلى قۇرىلعان اۋەسقويلار كلۋبى مەن الەۋمەتتىك جەلىلەردەگى پاراقشالار جۇمىسىن جالعاس­تىرا بەرەدى. سونداي-اق قاۋىمداستىق ايماق­تاردا قويىلعان سورەلەردىڭ جاڭا كىتاپتارمەن تولىقتىرىلۋىنا جانە ولاردىڭ ساقتالۋىنا جاۋاپ بەرەدى», دەدى جوبا ۇيلەستىرۋشىسى.

وتانداستارىمىزدى كىتاپ وقۋعا قىزىق­تىرۋ ءۇشىن جاڭا تەحنولوگيالار ارقى­لى اقپارات بەرىپ, الەۋمەتتىك جەلىدەگى پاراق­شا­لاردا پايدالى مالىمەتتەر جاريالانىپ وتىرعان. ودان بولەك ۇلتتىق اۋدارما بيۋروسى, «رۋحاني جاڭعىرۋ» جوبالىق كەڭسەسى جانە قازاقستان ۆولونتەرلەر ليگاسىمەن مە­موراندۋمدارعا قول قويىلعان. ساۋدا جانە ويىن-ساۋىق ورتالىقتارىندا جانە جوعارى وقۋ ورىندارىندا kitap.kz ەلەكتروندى كىتاپحاناسىنداعى كىتاپتارعا سىلتەمەلەر ءىلىندى. بۇل – ارنايى QR كود ارقىلى قالاعان كىتاپقا جەدەل قول جەتكىزۋگە ىڭعايلى. سورە­لەردى جاڭا كىتاپتارمەن تولتىرۋعا وبلىستىق كىتاپحانالار دا اتسالىسقان ەكەن. جاستارعا كىتاپ وقىپ قانا قويماي, ول تۋرالى پىكىر الماسۋ دا قىزىقتى ەكەنى ءسوزسىز. سول سەبەپتى ءوزى وقىعان كىتاپتى الماستىرۋعا مۇمكىندىك بەرەتىن شارالار دا ۇيىمداستىرىلعان. جوبا اۆتورلارى وسى سەكىلدى قىزىقتى شارالار ارقىلى جاستار اراسىندا كىتاپ وقۋدى قىزىق ءارى پايدالى داعدىعا اينالدىرۋعا بولاتىنىنا سەنىمدى.

جۇلدىز ءجۇنىسوۆا جاستاردى ىنتالان­دىرۋ ءۇشىن ارنايى بايقاۋلار دا ۇيىمداس­تى­رىلعانىن ايتىپ بەردى.

«الەۋمەتتىك جەلىدە «كىتاپ الەمىنەن سۇ­يىكتى كەيىپكەرىمە كوسپلەي» اتتى باي­قاۋ وتكىزدىك. 123 جۇمىس قابىلداندى. ناتي­جە­سىندە, اقتىق سىندا 30 تۋىندى جۇل­دەگە تا­لاستى. جەڭىمپازدارعا نوۋتبۋك, پلان­شەت, ۇيالى تەلەفون سەكىلدى قاجەتتى گادجەت­تەر مەن كىتاپ دۇكەندەرىنە ارنايى سەرتيفي­كات تابىس ەتتىك. بۇل كىشىگىرىم شارا قاتىسۋ­شىلار­دىڭ شىعارماشىلىق قابىلەتتەرىن دامىتىپ, قاتارلاستارىمەن بولىسۋىنە سەپ بولادى», دەپ اتاپ ءوتتى ج.ءجۇنىسوۆا.

پاندەمياعا دەيىن تۇرعىندار سورەلەردەگى كىتاپتاردى ۇيىنە الىپ كەتىپ, نە سول جەردە وقۋعا مۇمكىندىك السا, كارانتين كەزىندە وقىرماندارعا ارنالعان ونلاين شارالار وتە باستاعان. «كىتاپقۇمارلار» كلۋبى ءجيى كەزدەسىپ, سۇيىكتى كىتاپتارىن, قاي كىتاپ بو­يىنشا كينو تۇسىرۋگە بولاتىنىن جانە وزگە دە تاقىرىپتاردى تالقىلاپ تۇرعان. بۇل شارالار جاستاردى كىتاپ وقۋعا ىنتالاندىرىپ, ورتاق قىزىعۋلىعى بار ورەندەردىڭ باسىن قوسۋعا تاپتىرماس الاڭعا اينالدى.

ءىس-شارادا تاعى ءبىر جوبانىڭ قورى­تىن­­دىسى تانىستىرىلدى. «جاستار جانە يننو­ۆاتسيالار» جوباسى ىسكەر جاستاردىڭ دەگە­نى­نە جەتىپ, ءوز اراسىندا كاسىبي قوعام­داس­تىقتار قالىپتاستىرۋىنا جاعداي جا­ساۋعا باعىتتالعان. 29-30 قازاندا Bolashaq قاۋىم­داستىعى وسى ماقساتتا ونلاين فورۋم وتكىزدى. سپيكەرلەر يننوۆاتسيا جانە كاسىپ­كەرلىك سالاسىنداعى سوڭعى جاڭالىقتاردى ايتىپ, ءوز تاجىريبەلەرىن ورتاعا سالدى.

Bolashaq قاۋىمداستىعى اتقارۋشى ديرەك­تو­رىنىڭ ورىنباسارى الىشەر دۋنگەنين فو­رۋمنىڭ حالىقارالىق سيپاتقا يە بول­عا­­نىن اتاپ ءوتتى. «شاراعا قاتىسۋعا رە­سەي فەدەراتسياسى مەن وزبەكستان رەسپۋب­لي­­كا­­سىنىڭ ازاماتتارىنان 500-دەن استام ءوتى­نىم كەلىپ ءتۇستى, بۇل تمد ەلدەرى جاستا­رى­­نىڭ يننوۆاتسيانى وقۋعا جانە زەردەلەۋ­گە قىزىعۋشىلىعىن كورسەتەدى», دەدى ءا.دۋنگەنين.

قورىتىندى پرەزەنتاتسياعا 50-دەن استام كورەرمەن قاتىستى, ولاردىڭ ىشىندە جوبانىڭ قاتىسۋشىلارى مەن ۆولونتەرلەر, ارىپتەس ۇيىمداردىڭ وكىلدەرى بار.