سەنات سالىق كودەكسىنە ەنگىزىلەتىن تۇزەتۋلەردى قابىلدادى. سوعان سايكەس ازاماتتار زەينەتاقى جيناعىنداعى قارجىنىڭ ءبىر بولىگىن العان كەزدە ءبىر رەتتىك تابىس سالىعىن تولەمەۋگە مۇمكىندىك الادى. بۇل تۋرالى سەناتتىڭ ءباسپاسوز قىزمەتى حابارلادى.
بۇعان دەيىن مەملەكەت باسشىسى قاسىم-جومارت توقاەۆ 2021 جىلدان باستاپ ازاماتتارعا زەينەتاقى جيناعىنىڭ ءبىر بولىگىن پايدالانۋعا مۇمكىندىك بەرۋ جونىندە ءتيىستى مەملەكەتتىك ورگاندارعا تاپسىرما بەرگەن ەدى. الايدا, بۇل قاراجات ءۇشىن تابىس سالىعىن تولەۋ قاجەت. ءدال وسى ماسەلە قوعامدا نارازىلىق تۋدىردى.
سوندىقتان سەناتورلار بۇل تولەمدى كەيىنگە شەگەرۋدى جانە بىرنەشە جىلعا ءبولىپ تولەۋدى ۇسىندى. ياعني, زەينەتاقى جيناعىنداعى قارجىنى كەلەسى جىلدان باستاپ الۋعا بولادى. ال وعان ءتيىستى سالىق تەك زەينەتكە شىققان كەزدە عانا تولەنەدى. سونداي-اق, تولەمدى بىردەن جاساماي, 16 جىلعا ءبولىپ تولەۋ مۇمكىندىگى قاراستىرىلعان.
«زەينەتاقى جيناعىنداعى قارجىنىڭ ءبىر بولىگىن الدىن الا العان كەزدە ونىڭ 10 پايىزىن ءبىر رەتتىك سالىق رەتىندە تولەۋ كەرەك. ونى قازىرگىدەي كۇردەلى كەزەڭدە ازاماتتار ءۇشىن ءتيىمسىز دەپ ەسەپتەيمىز. سوندىقتان اتالعان سالىقتى زەينەتاقى جيناعىن العان كەزدە ەمەس, تەك زەينەتكە شىققان سوڭ عانا تولەۋ ۇسىنىلىپ وتىر. ونىڭ وزىندە, ءبارىن بىردەن اۋدارماي, زاڭ جوباسىنا 16 جىلدىڭ ىشىندە ءبولىپ تولەۋ تۋرالى نورما ەنگىزىلدى», – دەدى سەنات توراعاسى ماۋلەن اشىمباەۆ.
ال ازاماتتىعىن اۋىستىرعىسى كەلگەندەر زەينەتاقى جيناعىنان اقشا العانى نەمەسە ونىڭ ءبىر بولىگىن پايدالانعانى ءۇشىن تولەنەتىن سالىقتى بىردەن جانە تولىق وتەۋگە مىندەتتى. وسى رەتتە سالىق بجزق (بىرىڭعاي جيناقتاۋشى زەينەتاقى قورى) شوتىندا قالعان زەينەتاقى جيناعىنان ۇستالاتىنىن اتاپ وتكەن ءجون.