تەمىرتاۋ قالاسىندا فتيزياتريالىق ورتالىق بازاسىندا اشىلعان ينفەكتسيالىق گوسپيتال پايدالانۋعا بەرىلدى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
مەديتسينالىق مەكەمەدە العاشقى ناۋقاستاردى قابىلداۋعا ءبارى دە دايىن: مۇندا 15-رەانيماتسيالىق توسەكتى قوسقاندا 200 ورىن, سونداي-اق ساندىق رەنتگەن اپپاراتى مەن باسقا دا قاجەتتى قۇرال-جابدىقتىڭ ءبارى بار.
تەمىرتاۋداعى ورتالىق اۋرۋحانا ديرەكتورىنىڭ ورىنباسارى رينات گاتين اتالعان گوسپيتالدىڭ كوروناۆيرۋس ينفەكتسياسىنىڭ بولۋى ىقتيمال ەكىنشى تولقىنىنا تويتارىس بەرۋگە ساقاداي-ساي ەكەنىن ايتادى.
– گوسپيتالدا تولىق جابدىقتالعان 15 رەانيماتسيالىق توسەك-ورىن اشىلدى. مۇندا 30 نۇكتەگە ورتالىق وتتەگى بەرۋ, جاڭا ءوجج-اپپاراتتارى, 145 وتتەگى كونتسەنتراتورى قاراستىرىلعان. باقىلاۋ مونيتورلارى, ەلەكتر سورعىلارى بار, ورتالىقتاندىرىلعان جەلدەتۋ جۇيەسى ورناتىلعان. جاڭا ساندىق رەنتگەن جۇيەسى ساتىپ الىنىپ, ورناتىلدى. بۇل اپپاراتتىڭ مۇمكىندىگى وتە مول. عيمارات قىزىل جانە جاسىل ايماقتارعا بولىنگەن, بۇل مەديتسينا قىزمەتكەرلەرىنىڭ ينفەكتسيانى جۇقتىرىپ الۋ قاۋپىن ازايتادى, – دەيدى ول.
قازىر جاڭا گوسپيتالدە 73 مەديتسينالىق قىزمەتكەر ەڭبەك ەتەدى. ولاردىڭ قۇرامى كادرلارعا دەگەن قاجەتتىلىككە بايلانىستى وزگەرىپ وتىرۋى مۇمكىن.⠀
جالپى, تەمىرتاۋ قالاسىندا بۇدان بولەك كونسەرۆاتسيالانعان تاعى ەكى گوسپيتال جۇمىس ىستەيدى. بۇل دەگەنىڭىز, مەتاللۋرگتەر شاھارىنىڭ ينفەكتسيالىق ستاتسيونارلارىنداعى ورىنداردىڭ جالپى سانى 500-دەن استام توسەكتى قۇرايدى دەگەن ءسوز.