سەنبىدە جاريالاعان مالىمەتتەرگە سايكەس, اقش-تا سوڭعى ءۇش كۇن قاتارىنان رەكوردتىق كورسەتكىشتەر تىركەلگەن. جۇما كۇنى 126 480 ادامنىڭ ۆيرۋس جۇقتىرعانى انىقتالعان. ەلدەگى COVID-19 جۇقتىرعانداردىڭ جالپى سانى 9,7 ميلليوننان اسقان, ال 236 مىڭنان استام ادام ىندەتتەن قايتىس بولدى.
بايدەن مەن جاڭا سايلانعان ۆيتسە-پرەزيدەنت كامالا حارريس ۆيرۋستى باقىلاۋعا الۋدىڭ كەشەندى جوسپارىن تانىستىردى. ول بويىنشا ونداعان ميلليون سىناق تەستتەرىن جاساپ, ونى تاراتۋ قاراستىرىلعان. سونداي-اق اقش-تىڭ دەنساۋلىق ساقتاۋ سالاسىنداعى جۇمىسپەن قامتۋ كورپوراتسياسىنا قوسىمشا كومەك رەتىندە كەم دەگەندە 100 000 امەريكالىقتى جۇمىلدىرۋ قاجەتتىگى ايتىلدى.
بىراق بۇل قادامداردىڭ اۋا رايىنىڭ سۋىتۋىمەن جانە سوعان بايلانىستى ىندەتتىڭ قايتا ورشۋىمەن قالىپتاسقان جاعدايدا قانشالىقتى ءتيىمدى بولاتىنى بەلگىسىز.
جۇما كۇنى كەشكە ترامپ اكىمشىلىگىنىڭ باسشىسى مارك مەدوۋزدىڭ دا ۆيرۋس جۇقتىرعانى انىقتالدى. بۇل ازىرگە اق ۇيدە تىركەلگەن سوڭعى جاعداي. سوڭعى اپتالاردا اق ءۇيدىڭ بىرنەشە قىزمەتكەرى مەن سايلاۋالدى ناسيحاتپەن اينالىسقان مامانداردىڭ ىندەت جۇقتىرعانى بەلگىلى بولعان ەدى.