ەلدەگى جاعداي ۋشىققان سايىن ۇلىبريتانيا بارلىق شارانى جاساۋعا جانتالاسىپ جاتىر. COVID-19-دىڭ بەلگىلەرى بولماسا دا, تۇرعىنداردىڭ بارلىعى تەستتەن وتەدى. بۇل – ۆيرۋستى انىقتاپ, جويۋدىڭ ءتيىمدى تاسىلدەرىنىڭ ءبىرى دەيدى ساراپشىلار. ەلدىڭ پرەمەر-ءمينيسترى بوريس دجونسون ۇلىبريتانيادا مۇنداي سىناقتى ەل كولەمىندە وتكىزۋگە ۋادە بەرىپ وتىر. ليۆەرپۋل العاشقى بولىپ باستايدى.
جالپى, جاپپاي تەستىلەۋ ناقتى نە نارسەگە قول جەتكىزەدى دەگەن ساۋال دا تۋىندايدى. وكسفورد ۋنيۆەرسيتەتىنىڭ قىزمەتكەرى, ۇكىمەتتىڭ عىلىمي كەڭەسشىسى سەر دجون بەلل «بۇل ارەكەت ءبىزدى الداعى قيىندىقتاردان قۇتقارۋى مۇمكىن» دەگەندى ايتا وتىرىپ, بىراق «بۇل جاعدايدان تىم كوپ شۋ شىعارۋدىڭ قاجەتى جوق» ەكەنىن دە ەسكەرتتى.
جاپپاي تەستىلەۋ قاتەرلى ىسىك سكرينينگىنە ۇقسايدى. ساۋ ادامدار دا تەكسەرىلەدى, سولاردىڭ اراسىنان وزدەرى بىلمەي ۆيرۋس جۇقتىرىپ العاندار انىقتالۋى مۇمكىن. بۇل ىندەتتىڭ ورشۋىنە ارى قاراي جول بەرمەيدى. ءدال وسى قادام قىتايدا بىرنەشە رەت قولدانىلعان بولاتىن. ۆيرۋس ورشىگەن ايماقتاردا تۇرعىنداردى جاپپاي تەكسەرىپ, وزدەرى بىلمەي, سيمپتومسىز جۇرگەن ناۋقاستاردى وقشاۋلاعان. ال بۇل – ءوز كەزەگىندە ىندەتتىڭ باسقالارعا جۇقپاۋىن قاداعالاۋعا تاپتىرماس شەشىم. سلوۆاكيا دا ءدال وسى ادىسكە جۇگىنۋدى كوزدەپ وتىر.
تەستىلەۋ ميلليونداعان حالىققا قالاي جۇرگىزىلەدى دەگەن زاڭدى ساۋال تۋىندايدى. قولدانىلاتىن سىناما جۇكتىلىكتى انىقتايتىن تەستكە ۇقساس كەلەدى: قاراپايىم, ارزان جانە جىلدام انىقتايدى. مۇرىننان نە اۋىز قۋىسىنان الىنعان ماتەريال ۆيرۋستىڭ بار-جوعىن بىردەن كورسەتىپ بەرەدى. لابوراتوريا مەن مەديتسينا قىزمەتكەرىنىڭ قاجەتى جوق. وسىلايشا ۇلىبريتانيا ىندەتتىڭ ورشۋىنە بايلانىستى ەلدەگى قاۋىپسىزدىك شارالارىن قايتا كۇشەيتۋگە ءماجبۇر بولىپ وتىر.