ەكولوگيا, گەولوگيا جانە تابيعي رەسۋرستار مينيسترلىگى بوزجىرا شاتقالى اۋماعىندا قوناق ءۇي تۇرعىزۋ جوسپارىنا بايلانىستى ازاماتتاردىڭ الەۋمەتتىك جەلىدەگى الاڭداۋشىلىعىنا جاۋاپ بەردى
«مينيسترلىك بارلىق ازاماتتار سەكىلدى ەلىمىزدىڭ تابيعات بايلىقتارىن بۇزباي ساقتاپ, قورشاعان ورتانى قورعاۋ مۇددەسىن ۇستانادى. وسىعان بايلانىستى بوزجىرا اۋماعىنداعى نىساننىڭ قۇرىلىسى قوعامدىق تىڭداۋدان, زاڭعا سايكەس ءتيىستى ورگانداردا ەكولوگيالىق ساراپتامادان, ونىڭ ىشىندە قورشاعان ورتاعا اسەرىن باعالاۋدان ءوتۋى ءتيىس. بۇل جاعدايدا قۇرىلىس ەرەجەلەرىنىڭ ساقتالۋىن, ساراپتامادان ءوتۋ پروتسەسىن جەرگىلىكتى اتقارۋشى ورگاندار, ياعني ايماقتاعى اكىمدىك باقىلايدى. قازىر بوزجىرادا قوناق ءۇي سالۋ ماسەلەسى جوق. تەك تۋريستەر تۇنەپ كەتەتىن شاعىن پۋنكت (بۋتيك وتەل) تۇرعىزۋ جوسپارلانۋدا.
قورىقشا اۋماعىندا قۇرىلىس نىساندارىنا جەر ۋچاسكەسىن ءبولۋ قر ەكولوگيا, گەولوگيا جانە تابيعي رەسۋرستار مينيسترلىگىنىڭ قۇزىرەتىنە جاتپايدى. ماڭعىستاۋ وبلىسى اكىمىنىڭ حاتتامالىق تاپسىرماسىنا سايكەس, قاراقيان اۋدانى اكىمىنىڭ بوزجىرا اۋماعىنان 80 گەكتار جەر ءبولۋ تۋرالى بۇيرىعى دايىندالىپ جاتىر», دەلىنگەن حابارلامادا.
ەكولوگيا مينيسترلىگى قاراماعىنداعى ورمان شارۋاشىلىعى جانە جانۋارلار الەمى كوميتەتى جانە ونىڭ اۋماقتىق بولىمشەلەرى زاڭ تالاپتارىنىڭ ورىندالۋىن باقىلايدى.
«بۇعان دەيىن جەرگىلىكتى ەكولوگتار كەي تۋريستەردىڭ ماڭعىستاۋ وبلىسىنىڭ تابيعي ورىندارىندا كوپ قوقىس قالدىراتىنى تۋرالى دا ماسەلە كوتەرگەنىن اتاپ وتكىزىمىز كەلەدى. بۇل پروبلەما قازاقستاننىڭ بارلىق ءوڭىرى ءۇشىن اكتۋالدى. وسىعان بايلانىستى ەكولوگيا مينيسترلىگى ازاماتتاردى تابيعات اياسىندا دەمالعاندا تازالىق پەن ءتارتىپتى ساقتاۋ قاجەتتىگىن ەسكەرتەدى. ەكولوگيالىق زاڭنامانى ساقتاماۋعا قاتىستى جازانى كۇشەيتۋ تۋرالى نورمالار قازىر قر پارلامەنتىندە قاراۋدا جاتقان جاڭا ەكولوگيالىق كودەكستە قاراستىرىلعان», دەلىنگەن حابارلامادا. «بوزجىرا» جەرگىلىكتى دەڭگەيدەگى «جابايشۇقان» قورىقشا ورنالاسقان. «جابايۇشقان» قورىقشاسى ماڭعىستاۋ وبلىسى اكىمىنىڭ 2012 جىلعى 31 شىلدەدەگى №182 قاۋلىسىنا سايكەس قۇرىلعان. ماڭعىستاۋ وبلىسى تابيعي رەسۋرستار جانە تابيعاتتى پايدالانۋ باسقارماسىنىڭ «قىزىلساي» مەملەكەتتىك وڭىرلىك تابيعي پاركىنە قارايدى. اۋماعى – 316 141 گەكتار, ماڭعىستاۋ وبلىسىنىڭ قاراقيان اۋدانى اۋماعىندا ورنالاسقان. قر «ەرەكشە قورعالاتىن تابيعي اۋماقتارى تۋرالى» زاڭنىڭ 69-بابىنا سايكەس, ەرەكشە قورعالاتىن تابيعي اۋماقتار تەرريتورياسىنداعى شارۋاشىلىق قىزمەت پاسپورتپەن رەتتەلەدى. پاسپورتتا تابيعي رەسۋرستاردى ورنىقتى پايدالانۋدى قامتاماسىز ەتەتىن, ەكولوگيالىق جۇيەگە كەرى اسەرىن تيگىزبەيتىن ءداستۇرلى شارۋاشىلىق قىزمەتتىڭ نەگىزگى تۇرلەرىنە رۇقسات بەرىلەدى. تۋريستىك جانە رەكرەاتسيالىق قىزمەت پەن جەر ۋچاسكەلەرىن تۋريستەر توقتايتىن ورىن ازىرلەۋگە پايدالانۋعا, سيرەك كەزدەسەتىن نەمەسە جوعالىپ بارا جاتقان وسىمدىكتەر مەن جانۋارلار تۇرلەرىن قولدان كوبەيتۋ, ءوسىرۋ ماقساتىندا پيتومنيكتەر قۇرۋعا, زاكازنيك قىزمەتكەرلەرى تۇراتىن ۇيلەر, ياعني «كوردوندار» سالۋعا, ولارعا شارۋاشىلىق ءۇشىن جەر تەلىمىنە بەرۋگە بولادى. ال قورىقشانىڭ ەكولوگيالىق جۇيەسىنە كەرى اسەرىن تيگىزەتىن تابيعات پايدالانۋ جانە شارۋاشىلىق قىزمەت تۇرلەرىنە تىيىم سالىنادى نەمەسە شەكتەۋ قويىلادى.