الماتى وبلىسىنىڭ اۋماعىنداعى فابريكالاردا قۇس قىرىلىپ جاتىر. قاناتتىلارعا قىرعيداي تيگەن دەرتتىڭ "قۇس تۇماۋى" ەكەنى انىقتالعان. الايدا, ماماندار جاعدايدىڭ باقىلاۋدا ەكەنىن ايتىپ, دابىل قاعۋدىڭ رەتى جوق دەگەن پىكىردە, - دەپ حابارلايدى Egemen.kz.
- وبلىستا بىرنەشە قۇس فابريكاسى بار. ولار تاۋىق ەتى مەن جۇمىرتقا وندىرىسىنە ۇلەس قوسىپ وتىر. وكىنشكە قاراي, فابريكالاردا قۇستاردىڭ بەلگىسىز دەرتتەن ءولىپ جاتقانى انىقتالدى. ءبىز ءوز تاراپىمىزدان لابورتوريالىق تەكسەرۋ جۇرگىزىپ, قۇستىڭ قىرىلۋىنا «قۇس تۇماۋى» سەبەپ بولعان دەگەن قورىتىندىعا كەلدىك. قازىر «الساد قازاقستان» سەرىكتەستىگىنىڭ تاۋىق فەرماسىنداعى جاعداي كۇردەلى بولىپ تۇرعانى راس. 122 مىڭ باسقا جۋىق تاۋىق جويىلدى. مۇنى جۇقپالى ىندەتتىڭ ارى قاراي تارالماۋى ءۇشىن ىستەدىك. وسىلايشا ءبىز ىندەتتىڭ تارالۋىن توقتاتتىق. قازىر جاعداي ءبىرشاما قالىپقا ءتۇستى. ياعني, بايبالام سالۋعا نەگىز جوق - دەيدى وبلىستىق ۆەتەريناريا باسقارماسىسىنىڭ باسشىسى نۇرتاس قيالبەكوۆ.
جالپى, ۆەتەرينارلار وڭىردە جۇقپالى ىندەتتىڭ تارالۋىنا قۇس شارۋاشىلىعىمەن اينالىستىن كاسىپكەرلەردى كىنالاپ وتىر. ويتكەنى, بيىل شارۋاشىلىقتار تۇماۋعا قارسى ۆاكتسينا سالدىرماعان كورىنەدى. مىسالعا, جوعاردا اتى اتالعان «الساد قازاقستان» سەرىكتەستىگىندە بۇل شارا جاسالماعان ەكەن. ال كاسىپورىن باسشىلارى تاۋىقتارعا دەر كەزىندە ەكپە سالىنباعانىن توتەنشە جاعدايعا سىلتەيدى.
- وكىنىشكە قاراي, اتالعان «الساد قازاقستان» كومپانياسىندا قۇس تۇماۋىنا قارسى ۆاكتسينا جوق. شارۋاشىلىق كوكتەمدە بۇل ەكپەگە تاپسىرىس بەرگەن ەكەن. رەسەيدەن كەلەتىن ۆاكتسينا ءالى الىنباعان. بۇعان پاندەميا كەزىندەگى شەكتەۋلەر كەدەرگى بولىپ وتىر. ناتيجەسىندە, فابريكاداعى قۇستاردىڭ دەرتكە شالدىعۋى انىقتالدى, - دەيدى وبلىستىڭ باس مال دارىگەرى.
ءدال وسىنداي جاعداي تالدىقورعان ايماعىن قۇس ونىمدەرىمەن قامتىپ وتىرعان «كوگەر لدت» كومپانياسىنىڭ فابريكالارىنا دا ءتان بولىپ وتىر. قۇس تۇماۋىنىڭ العاشقى بەلگىلەرى انىقتالعان ساتتەن باستاپ ءوندىرىس جۇمىسىن شەكتەگەن. ىندەت ءىزى تابىلعان قۇستار جويىلىپ, فابريكاداعى جۇمىس قاۋىپسىزدىكتىڭ جوعارى دەڭگەيىنە كوشىرىلىپتى. الايدا بۇل ماسەلەنىڭ ەكىنشى جاعى دا بار ەكەن.
- جاعداي بۇلاي بولا بەرسە, نارىقتا قۇس ەتى مەن جۇمىرتقا تاپشىلىعى پايدا بولۋى مۇمكىن. اڭگىمە وتاندىق ءونىم تۋرالى. ونسىز دا ۇكىمەت ءبىز وندىرىگەن ءونىم ءۇشىن كوك تيىن سۋبسيديا تولەمەيدى. قۇستارعا دەر كەزىندە ۆاكتسينا ەگىلمەۋىنىڭ دە استارىندا شارۋاشىلىقتارداعى قارجى قيىندىعى سەبەپ بولعانى انىق. ويتكەنى, وتاندىق ءوندىرىستىڭ ءونىمى ارزان, وزىندىك قۇندى ازەر وتەپ وتىر. نارىقتا شەتەلدىك تاۋىق ەتى ەركىن ساتىلىپ جاتىر. ماسەلەن, ازىق-ت ۇلىك سورەسىندەگى رەسەيدىڭ ارزان ونىمىنەن كوز سۇرىنەدى. مۇنداي جاعداي قۇس فابريكالارىنىڭ جۇمىسى شاتقاياقتاماعاندا قايتەدى, - دەيدى ماسەلەگە وراي باسپاسوزگە پىكىر بىلدىرگەن «كوگەر لدت» كومپانياسىنىڭ ديرەكتورى سۆەتلانا يۆانوۆا.
ايتپاقشى, قازاقستاندا قۇس تۇماۋىنىڭ دەرەگى شىققالى بەرى سىرتقى نارىققا قۇس ەتى مەن جۇمىرتقا جونەلتەتىن كومپانيالار شىعىنعا باتىپ وتىرعان ۇقسايدى. مىسالعا, كۇنى كەشە عانا تاجىكستان ۇكىمەتى «كوگەر لدت» كومپانياسىنىڭ ونىمدەرىنەن باس تارتىپ, ەندى ەل شەكاراسىنان قۇس ەتى مەن جۇمىرتقا تۇرلەرىن وتكىزبەيتىندىگىن ەسكەرتكەن. سونداي-اق, ىشكى نارىقتا دا باعا ءوسۋى بايقالعان. دەرەك بويىنشا, بازارداعى تاۋىق ەتىنىڭ ءار كيلوسى 900 تەڭگەگە باعالانىپ, ءبىر دانا جۇمىرتقا 45 تەڭگە شاماسىندا ساتىلىپ جاتىر.
الماتى وبلىسى