وكىنىشكە قاراي, ىندەتتىڭ ەكىنشى تولقىنى ىرگەدە تۇر. قازىر بارلىق ايماقتا ساقتىق شاراسى كۇشەيىپ, كارانتين شەكتەۋلەرى قاتاڭداتىلا باستادى. وسى ساناتتا الماتى وبلىسى دا بار. ازىرگە وڭىردەگى جاعداي تۇراقتى بولعانىمەن, كورشىلەس شىعىس قازاقستان وبلىسىنداعى احۋالدىڭ اسقىنۋى جەتىسۋلىقتاردى دا الاڭداتىپ وتىر, - دەپ حابارلايدى Egemen.kz.
«ساقتىق تا قورلىق جوق» دەگەندەي, قازىر ەكى ايماقتىڭ شەكاراسىنا سانيتارلىق بەكەتتەر قويىلىپ, كىرگەن, شىققان كولىكتەر قاتاڭ تەكسەرۋدەن وتۋدە. جولاۋشىلاردىڭ دەنساۋلىعى تەكەسەرىلىپ, ادامدار تۋرالى انىقتاما تولتىرىلىپ جاتىر. بۇل شارا ۆيرۋستىڭ ەل ىشىندە كەڭىنەن تارالۋىنىڭ الدىن الماق. ال الماتى وبلىسى بويىنشا پاندەميا ماۋسىمى باستالعالى بەرى 5204 ادام كوروناۆيرۋس ىندەتىڭ جۇقتىرعان ەكەن. دەرتتەن 52 ادام قايتىس بولعان. مامانداردىڭ دەرەگى بويىنشا, ايماقتاعى ۆيرۋس جۇقتىرۋ قارقىنى تاۋلىگىنە 0.2 پايىز شاماسىندا انىقتالعان. قازىرگى ساتتە 149 ادام ستاتسيونارلاردا ەم قابىلداپ جاتىر
- ىندەتپەن كۇرەس جۇمىسىندا ىركىلىس جوق. ءبىز ءوز تاراپىمىزدان كۇرەسۋ شاراسىنا تولىق دايىندىق جاساپ وتىرمىز. بۇعان ءتيىستى قارجى ءبولىنىپ, قاجەتتى قۇرال-جابدىق, ءدارى-دارمەك قورى جاسالدى. ماماندار قاتارى دا تولىقتىرىلدى.كوروناۆيرۋس ينفەكتسياسىمەن كۇرەسۋ ماقساتىندا تالدىقورعان قالاسىندا 200 توسەك ورىندىق مودۋلدىك ينفەكتسيالىق اۋرۋحانا پايدالانۋعا بەرىلدى. جالپى 5280 توسەك-ورىن دايىندالدى. دارىگەر كادرلارمەن قامتاماسىز ەتۋ ماقساتىندا قازاقستان-رەسەي مەديتسينالىق ۋنيۆەرسيتەتىمەن دەنساۋلىق ساقتاۋ ماماندارىن, ينتەرندەردى, رەزيدەنتتەردى كوپ دەڭگەيلى دايارلاۋ بويىنشا وقۋ ورتالىعىن قۇرۋ تۋرالى مەموراندۋم جاسالدى. تالدىقورعان جانە الماتى قالالارىنداعى كوپسالالى اۋرۋحانالاردىڭ بازاسىندا اۋىر ناۋقاستارعا شۇعىل كومەك كورسەتۋ ءۇشىن زاماناۋي قۇرىلعىلارمەن جابدىقتالعان ورتالىقتار قۇرىلدى. سونداي–اق, بالالار جۇقپالى اۋرۋلار اۋرۋحانالارىنىڭ بازاسىندا بالالارعا ارنالعان ەكى COVID-ورتالىعى قوسىمشا جاراقتاندىرىلۋدا. جالپى پاندەميامەن كۇرەسكە جەرگىلىكتى بيۋدجەتتەن 13,8 ملرد.تەڭگە, ونىڭ ىشىندە كوروناۆيرۋستىڭ ەكىنشى تولقىنىنا دايىندىققا 8,9 ملرد تەڭگە ءبولىندى., - دەيدى وبلىستىق دەنساۋلىق ساقتاۋ باسقارماسىنىڭ باسشىسى ومىرزاق نيزيابەكوۆ.
جالپى, ەكىنشى تولقىنعا دايىندىق بارىسىن پىسىقتاۋ اياسىندا وبلىستاعى سOVID ورتالىعىنا 1 تسيفرلىق رەنتگەن-اپپارات, 2وكپەنى جاساندى جەلدەتۋ اپپاراتى, 12 كونتسەنتراتور, 30 مونيتور, 8 ۆيبرواكۋستيكالىق اپپارات, 130 پۋلسوكسيمەتر سياقتى مەديتسينالىق جابدىقتار جەتكىزىلگەن. ال اۋرۋحانالاردا 534 وكپەنى جاساندى جەلدەتۋ اپپاراتى بار. تاۋيادا رەسپۋبليكالىق بيۋدجەت ەسەبىنەن تاعى 130 قۇرىلعى جەتكىزىلمەك. جەرگىلىكتى بيۋدجەتتەن 1,2 ملرد تەڭگە سوماسىنا 100 بىرلىك وكپەنى جاساندى جەلدەتۋ اپپاراتتارى ساتىپ الىندى. سونداي-اق, وبلىستىڭ 13 اۋرۋحاناسى وتتەگى ستانتسيالارىمەن قامتاماسىز ەتىلىپ وتىر. ونىڭ ىشىندە 12 وتتەگى ستانتسياسى ىسكە قوسىلدى. اۋداندارداعى اۋرۋحانالار ءۇشىن 1070 دانا وتتەگى كونتسەنتراتورى ساتىپ الىنعان. ياعني, ءوڭىر بويىنشا دايىندالعان 5280 توسەك-ورىننىڭ 40 پايىزى وتتەگىمەن قامتاماسىز ەتىلەتىن بولادى.
- ارينە, ىندەتپەن كۇرەستە مەديتسينا قىزمەتكەرلەرىنىڭ ءبىلىمى مەن بىلىگىنە سەنىم ارتامىز. ارىپتەستەرىمىزدىڭ قاۋىپسىزدىگىن قامتاماسىز ەتۋ دە باستى ورىندا. قازىر وبلىستىڭ مەديتسينا مەكەمەلەرىندە جەكە قورعانۋ قۇرالدارىنىڭ ءۇش ايلىق قورى بار. ال دارىلىك زاتتاردىڭ ەكى ايلىق قورى جاساقتالدى. ونىڭ ىشىندە بىرىڭعاي ديسترەبيۋتەرمەن 500 ملنتەڭگەگە دارىلىك زاتتاردىڭ 30 ءتۇرىن ساتىپ الۋعا شارت جاسالدى. ياعني, قازىر مەديتسينا ۇيىمدارى مەن ءدارىحانالاردا ءدارى-دارمەك تاپشىلىعى جوق. 15 قىركۇيەكتەن باستاپ تۇرىعىنداردى تۇماۋعا قارسى ەگۋ باستالدى, بۇگىنگە دەيىن 214 مىڭ ادام ەكپە سالدىردى. جالپى, ناۋقاستاردى ەمدەۋ ءۇشىن 3455 مەديتسينا قىزمەتكەرى, ونىڭ ىشىندە 851 دارىگەر جۇمىلدىرىلادى, - دەيدى تاعى وبلىستىق دەنساۋلىق ساقتاۋ باسقارماسىنىڭ باسشىسى ومىرزاق نيزيابەكوۆ.
الماتى وبلىسى