نىسانداردى زاڭسىز تۇرعىزىلدى دەپ تانۋ تۋرالى سوت شەشىمدەرى بويىنشا ەلوردادا 28 عيمارات سۇرىلۋگە جاتادى. بۇگىندە «نۇر-سۇلتان قالالىق ورتا ساپاسى جانە باقىلاۋ باسقارماسى» مەملەكەتتىك مەكەمەسى زاڭسىز سالىنعان نىسانداردى انىقتاۋ جانە ولاردى ودان ءارى بۇزۋ بويىنشا ءىس-شارالار جوسپارىن بەكىتۋدە.
«بۇل عيماراتتار زاڭسىز, مەملەكەتتىك جەرگە جوبالىق-سمەتالىق قۇجاتسىز جانە مەملەكەتتىك ساۋلەت-قۇرىلىس باقىلاۋ ورگاندارىنا ەسكەرتۋسىز سالىنعان. ءتارتىپ بۇزۋشىلار اكىمشىلىك جاۋاپكەرشىلىككە تارتىلىپ, نۇسقاۋلىق الدى. الايدا, بۇزۋشىلىقتار ەرىكتى تۇردە جويىلعان جوق, سوعان بايلانىستى سوتقا تالاپ ارىزدار بەرىلدى. قازىرگى ۋاقىتتا سوتتىڭ زاڭدى كۇشىنە ەنگەن شەشىمدەرى بويىنشا اتقارۋ پاراعى نۇر-سۇلتان ادىلەت دەپارتامەنتىنە جىبەرىلدى», - دەدى قالالىق ورتا ساپاسى جانە باقىلاۋ باسقارماسى باسشىسىنىڭ ورىنباسارى ەرلان بەردالين.
ايتا كەتەيىك, بيىل باسقارما 354 جوسپاردان تىس تەكسەرۋ جۇرگىزىپ, جىبەرىلگەن بۇزۋشىلىقتاردى جويۋ تۋرالى 100-دەن استام بۇيرىق شىعارىپ, 345 حاتتاما جاساعان.
وندىرىستىك, تۇرعىن ءۇي نەمەسە شارۋاشىلىق نىساندارىنا جەر ۋچاسكەسىنە ءتيىستى قۇقىعى جوق زاڭسىز قۇرىلىس سالعانى ءۇشىن جەكە تۇلعالارعا 75 اەك كولەمىندە ايىپپۇل سالىنادى. شەنەۋنىكتەر, شاعىن بيزنەس نەمەسە كوممەرتسيالىق ەمەس ۇيىمدار ءۇشىن - 100 اەك, ورتا بيزنەس - 150 اەك, ءىرى كاسىپكەرلىك سۋبەكتىلەرى ءۇشىن زاڭسىز عيماراتتى بۇزۋمەن نەمەسە ونسىز - 700 اەك.