الماتى قالاسىنىڭ تۇرعىنى يۋليا گلادىشەۆا كەزەكتى اۆتوكولىك ساتىپ الىپ, پاندەميا كەزىندە كولىكتى قايتا تىركەۋ ءۇشىن مامانداندىرىلعان حقو-عا بارعىسى كەلمەگەن. سونىمەن ونلاين رەجيمىندە كولىكتى قالاي قايتا تىركەۋگە بولاتىندىعى تۋرالى نۇسقاۋلاردى وقىپ, ونى ءوزى سىناپ كورۋدى شەشتى. الايدا, يۋليا جاڭا كولىكتى قايتا راسىمدەپ قانا قويماي, دايىن تەحپاسپورت پەن نومىرلىك بەلگىلەردى دە ۇيگە جەتكىزۋگە تاپسىرىس بەردى, دەپ حابارلايدى Egemen.kz.
بۇل جاقىندا عانا eGov.kz پورتالىندا قولدانىسقا ەنگەن مەملەكەتتىك تىركەۋ نومىرلىك بەلگىسىن جانە كولىك قۇرالىن تىركەۋ تۋرالى كۋالىكتى جەتكىزۋدى رەسىمدەۋگە مۇمكىندىك بەرەتىن قىزمەتتىڭ ارقاسىندا مۇمكىن بولدى.
ول ءۇشىن "ەلەكتروندىق ۇكىمەت" پورتالىندا "كولىك جانە كوممۋنيكاتسيالار" ءبولىمىنىڭ "اۆتوموبيل كولىگى" تارماعىندا "متنب (مەملەكەتتىك تىركەۋ نومىرلىك بەلگىسى) جانە كقتك-نى (كولىك قۇرالىن تىركەۋ تۋرالى كۋالىك) ۇيگە جەتكىزۋ" قىزمەتىن تاڭداپ, اۆتوريزاتسيادان ءوتۋ جانە وعان تاپسىرىس بەرۋ قاجەت.
بۇل جەردە قاجەتتى دەرەكتەردى تولتىرىپ, تۇرعىلىقتى مەكەنجايىن كورسەتىپ, قىزمەتكە اقى تولەۋ جەتكىلىكتى. قىزمەت قۇنى 2240 تەڭگە. وسىدان كەيىن مەملەكەتتىك تىركەۋ نومىرلىك بەلگىسى مەن كولىك قۇرالىن تىركەۋ تۋرالى كۋالىكتى محقو قىزمەتكەرىنىڭ ۇيگە جەتكىزىپ بەرۋىن كۇتەسىز.
ء"بارىمىز ءۇشىن وسىنداي قيىن كەزەڭدە سىزدەر ءوز كليەنتتەرىڭىزدىڭ دەنساۋلىعىن ويلاپ وتىرعاندارىڭىز قۋانتادى. مەن ومىرىمدە العاش رەت مامانداندىرىلعان حقو-عا بارماي-اق اۆتوكولىگىمدى قايتا تىركەي الدىم, ءتىپتى دايىن قۇجاتتارىمدى دا الا الدىم. سول كۇنى نومىرلەر مەن تەحپاسپورت مەنىڭ قولىمدا بولدى. وسىنداي ىڭعايلى قىزمەت ءۇشىن راحمەت. مەن بارلىق اۆتوكولىك يەلەرىنە وسىلاي جاساۋعا كەڭەس بەرەر ەدىم", - دەيدى يۋليا گلادىشەۆا.
دايىن مەملەكەتتىك تىركەۋ نومىرلىك بەلگىسى مەن كولىك قۇرالىن تىركەۋ تۋرالى كۋالىكتى جەتكىزۋ قىزمەتى ءبىر ەلدىمەكەن شەگىندە, مامانداندىرىلعان حقكو بار قالالاردىڭ, وبلىس ورتالىقتارىنىڭ, اۋدان ورتالىقتارىنىڭ تۇرعىندارىنا قولجەتىمدى ەكەنىن اتاپ وتكەن ءجون.