شاحتينسك قالالىق پوليتسيا ءبولىمىنىڭ قىزمەتكەرلەرى اۆتوبۋس ايالداماسىندا ادام توناعان كۇدىكتىنى ۇستادى, دەپ حابارلايدى Egemen.kz Polisia.kz سايتىنا سىلتەمە جاساپ.
26 قازان كۇنى قاراعاندى وبلىسى شاحتينسك قالالىق پوليتسيا بولىمىنە 28 جاستاعى ازامات حابارلاسىپ, قالاداعى ايالدامالاردىڭ بىرىندە تۇرعاندا ءوزىن بەلگىسىز بىرەۋدىڭ ۇرىپ-سوعىپ, اشىق تۇردە اقشاسى مەن ۇيالى تەلەفونىن تارتىپ اكەتكەندىگى تۋرالى ارىزدانعان. كەلتىرىلگەن شىعىن كولەمى 89 مىڭ تەڭگەنى قۇرادى.
جابىرلەنۋشىنىڭ ايتۋىنشا ءوزىن ۇرىپ-سوققان ادام 29-30 جاس شاماسىندا بولعان. كريمينالدىق پوليتسيا قىزمەتكەرلەرى وتكىزگەن جەدەل-ىزدەستىرۋ ءىس-شارالارى بارىسىندا وسى قىلمىسقا قاتىسى بار دەگەن كۇدىكپەن 26 جاستاعى ەر ادام ۇستالىپ, ول قىلمىسىن مويىندادى.
اتالعان فاكت بويىنشا قازاقستان رەسپۋبليكاسى قىلمىستىق كودەكسىنىڭ 191-بابىنا (توناۋ) سايكەس قىلمىستىق ءىس قوزعالىپ, تەرگەۋ امالدارى جۇرگىزىلۋدە.