بيىلعى ەرىكتىلەر جىلى اياسىندا «رەسپۋبليكا – ايماق – دامۋ» قوعامدىق قورى ۇيىمداستىرعان «جاس وركەن» رەسپۋبليكالىق سىيلىعى بايقاۋىنىڭ لاۋرەاتتارى ماراپاتتالدى. جەڭىمپازدار مەن جۇلدەگەرلەر حالىقتىق داۋىس بەرۋ ارقىلى انىقتالعان بولاتىن.
وسى سالتاناتقا ارنالعان ماراپاتتاۋ راسىمىندە قاراعاندى وبلىسى اكىمىنىڭ ورىنباسارى ابزال نۇكەنوۆ جەڭىمپازدارعا جۇلدەلەرىن تابىس ەتتى.
بايقاۋدا 300-دەن استام ۇمىتكەر باق سىنادى. داۋىس بەرۋدىڭ ءبىرىنشى كەزەڭىنە قاتىسۋ مۇمكىندىگىنە 126 جاس يە بولسا, شەشۋشى كەزەڭگە 56 ۇمىتكەر ءوتتى.
حالىقتىق داۋىس بەرۋ قورىتىندىسىنا سايكەس, «جاس دارىن» اتالىمى بويىنشا ءمادي پازىل مەن «جاس قالام» نوميناتسياسىندا ۇزدىك شىققان اقتوتى ابدىقاحاروۆا باس جۇلدەگە يە بولدى. جەڭىمپازداردىڭ ەكەۋى دە قاراعاندى وبلىسىنان.
– جاستار ءۇشىن XXI عاسىر بىلىمگە, مادەني بايلىققا, يننوۆاتسيالار مەن ءوز بەتىنشە ءبىلىم الۋعا ۇمتىلاتىن زامان. ءبىز باسەكەگە قابىلەتتى بولۋعا جانە ءوز ەلىمىزگە پايدامىزدى تيگىزۋگە مىندەتتىمىز, – دەيدى گران-پري يەگەرى, جاڭاارقا اۋدانىنداعى ب.امالبەكوۆ اتىنداعى ورتا مەكتەپتىڭ وقۋشىسى ءمادي پازىل.
سونىمەن قاتار سايات ابدوللا («جاس بلوگەر»), باعلان جاركەنوۆ («ۇزدىك ەرىكتى»), سامات ءجۇسىپوۆ («ۇزدىك ءىت-يدەيا») جانە ءمادينا قايروللا («جاس قالام») سىندى جاس ورەندەر بايقاۋدىڭ لاۋرەاتتارى اتاندى.
قاراعاندى