رۋدنىي قالاسىنىڭ ۋچاسكەلىك ينسپەكتورى ايدوس ق ۇلىمبەتوۆ كوشەدە دەنساۋلىعى كۇرت ناشارلاپ, قۇلاپ قالعان قالا تۇرعىنىنا العاشقى مەديتسينالىق كومەك كورسەتىپ, اجالدان اراشالاپ قالدى.
امان قالعان ازاماتتىڭ جۇبايى سۆەتلانا كوميسساروۆا پوليتسيا قىزمەتكەرىنە العىس ءبىلدىردى.
– ەكەۋمىز تاڭەرتەڭ الدەبىر شارۋالارمەن كوشەگە شىقتىق. پيونەرسكي جانە دزەرجينسكي كوشەلەرىنىڭ قيىلىسىندا كۇيەۋىم قاتتى اۋىرىپ, ەسىنەن تانىپ قالدى. قاتتى قورىققانىم سونشالىق, شوشىنىپ, نە ىستەرىمدى بىلمەي ابدىراپ قالدىم. قولىمنان بار كەلگەنى, اينالاداعى ادامداردى كومەككە شاقىرۋ عانا بولدى, – دەپ ەسكە الادى سول كۇنگى وقيعانى س.كوميسسارۆا.
ءدال وسى ساتتە ولاردىڭ جانىنان ءوز كولىگىمەن ۋچاسكەلىك پوليتسيا قىزمەتكەرى ءوتىپ بارا جاتقان. ول جەردە جاتقان كىسىنى كورە سالا كومەككە جەتىپ كەلىپ, ناۋقاسقا العاشقى مەديتسينالىق كومەك كورسەتىپتى. سودان كەيىن ءتارتىپ ساقشىسى ەرلى-زايىپتىنى كولىگىنە وتىرعىزىپ, اۋرۋحاناعا اپارعان.
– قازىر كۇيەۋىمنىڭ ومىرىنە قاۋىپ ءتونىپ تۇرعان جوق. بىراق دارىگەرلەر «ەگەر پوليتسەي دەر كەزىندە كومەك كورسەتپەگەندە, مۇنىڭ ارتى ورنى تولماس قايعىعا ۇلاسۋى ابدەن مۇمكىن ەدى», دەدى. قىزمەتتىك بورىشىن اتقارىپ جۇرمەسە دە, جولدان بۇرىلىپ كەلىپ, كۇيەۋىمنىڭ ءومىرىن قۇتقارىپ قالعان ءتارتىپ ساقشىسىنا زور العىس ايتامىن, – دەيدى ءبىر ولىمنەن قالعان ازاماتتىڭ زايىبى.
پوليتسيا ساپىندا بەس جىلدان بەرى بورىشىن وتەپ كەلە جاتقان ايدوس بۇعان دەيىن دە بىرنەشە ادامدى قۇتقارعان ەكەن. 2018 جىلى قىپ-قىزىل وتتىڭ ورتاسىنان ادامداردى امان الىپ شىققان ۋچاسكە ينسپەكتورى ىشكى ىستەر ءمينيسترىنىڭ قولىنان «ەرلىگى ءۇشىن» مەدالىن الىپتى.
– كۇندەلىكتى جۇمىسىمىز وسى عوي. ەسىنەن تانىپ جاتقان ادام كوزىن اشقاندا ءوزىم دە قۋانىپ كەتتىم, – دەيدى ءتارتىپ ساقشىسى.
قوستاناي وبلىسى