قوستاناي وبلىسىنىڭ پوليتسەيلەرى اقپاراتتىق تەحنولوگيا سالاسىنداعى قىلمىسقا قارسى كۇرەستىڭ تيىمدىلىگىن ارتتىرۋ ماقساتىندا وتكەن "Hi-tech" جەدەل الدىن الۋ شاراسى بارىسىندا ينتەرنەت جەلىسى ارقىلى جاسالعان 13 الاياقتىق ارەكەتتى انىقتاپ وتىر.
ەكى كۇنگە سوزىلعان ءىس شارا بارىسىندا قوستاناي قالاسىندا ينتەرنەت ارقىلى بەس مارتە الاياقتىق جاساعان 26 جاستاعى كۇدىكتى ۇستالدى. قاسكۇنەم قالا تۇرعىندارىنىڭ جەكە باسىنا قاتىستى قۇجات مالىمەتتەرىن پايدالانىپ, وزىنە بەيتانىس ادامداردىڭ اتىنان ونلاين نەسيە راسىمدەپ, شاعىن نەسيە ۇيىمدارىنىڭ بىرىنەن وڭاي ولجا تاۋىپ وتىرعان. الاياقتىڭ قۇرىعىنا تۇسكەندەرگە كەلگەن جالپى شىعىن كولەمى 1 ميلليون تەڭگەدەن اسادى. مىسالى, كۇدىكتى جابىرلەنۋشىلەردىڭ بىرىنە 900 مىڭ تەڭگەگە جۋىق نەسيە راسىمدەگەن.
قوستاناي قالاسىنىڭ كەلەسى ءبىر تۇرعىنى كورونوۆيرۋس ىندەتى ءورشىپ كەتكەن كەزدە الداۋ جولىمەن پايدا تاپپاق بولىپ, الەۋمەتتىك جەلىگە رەزەڭكە قولعاپ ساتىلاتىنى تۋرالى حابارلاندىرۋ ورنالاستىرعان. الماتى وبلىسىنىڭ تۇرعىنى كۇدىكتىگە 36 مىڭ رەزەڭكە قولعاپقا تاپسىرىس بەرىپ, ءبىر جارىم ميلليون تەڭگەدەن استام اقشا جىبەرەدى. الايدا تاپسىرىس بەرۋشى تاۋاردى دا, اقشانى دا قايتارىپ الا الماعان. وسىلايشا, قاسكۇنەم سولتۇستىك قازاقستان جانە اقمولا وبلىستارىنىڭ تۇرعىندارىن الداۋ جولىمەن, 1 ملن تەڭگەدەن استام پايدا تاپقان.
وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, قازىر اتالمىش الاياقتارعا قاتىستى قىلمىستىق ءىس قوزعالىپ, سوتقا دەيىنگى تەرگەۋ امالدارى ءجۇرىپ جاتىر.
قوستاناي وبلىسى