«ەل-كلاسيكو»: «استانا» «قايراتتان» تاعى جەڭىلدى

«ورداباسى» – «توبىل» 0:3

چەمپيونات باسىندا بىرىنشىلىكتىڭ باس جۇلدەسىنە ءۇمىتتى بولعان «ورداباسى» مەن «توبىل» كلۋبتارى ماۋسىم اياقتالار تۇستا جوسپارلارىنا وزگەرىس ەنگىزىپ, ەندى جۇلدەلى ءۇشىنشى ورىن ءۇشىن تالاسقا كىرىستى. وسىدان ءبىر جارىم اي بۇرىنعى ويىندا «ورداباسى» «توبىلدى» 4:0 ەسەبىمەن ويسىراتا جەڭىپ ەدى. سول ەسەنى وسى تۋردا قايتارۋدى كوزدەگەن قوستانايلىق ۇجىم ماقساتىنا جەتتى. تيمۋر سەگىزباەۆ اتىنداعى ستاديوندا وتكەن باسەكەدە «توبىل» «ورداباسى» قاقپاسىنا جاۋاپسىز ءۇش گول سوقتى. 15-تۋردا «كاسپي» قاقپاسىنا ەكى گول سوعىپ, «ورداباسىعا» جەڭىس سىيلاعان قاھارمان شابۋىلشى جواۋ پاۋلو بۇل جولى كومانداسىنا كومەكتەسە المادى. «توبىل» كلۋبىنان 48-مينۋتتا رۋسلان ۆاليۋللين, 64-مينۋتتا سەنين سەباي مەرگەندىگىمەن كوزگە تۇسسە, 56-مينۋتتا ۆيكتور دميترەنكو ابايسىزدا ءوز قاقپاسىنا گول سوعىپ الدى.

بۇل ويىننان كەيىن ەكى كوماندا دا تۋرنير كەستەسىندەگى ءوز ورىندارىن ساقتاپ قالدى. «ورداباسى» 27 ۇپايمەن ءۇشىنشى ورىن­دا تۇرسا, ءبىر ويىن كەم وتكىزگەن «تو­بىل» 26 ۇپايمەن ءتورتىنشى ورىندا كەلەدى.

«استانا» – «قايرات» 0:1

جانكۇيەرلەر اسىعا كۇتكەن چەمپيونات­تاعى ەكىنشى «ەل-كلاسيكودا» دا «قايرات» كلۋبىنىڭ مەرەيى ۇستەم بولدى. 4 قازانداعى ءبىرىنشى ويىندا الماتىلىق كوماندا 3:0 ەسەبىمەن ەلىمىزدىڭ التى دۇركىن چەمپيون­دارىنىڭ تاس تالقانىن شىعارسا, بۇل جولى 1 دوپ ايىرماسىمەن جەڭدى. جالپى, بۇل كەزدەسۋدىڭ الدىندا فۋتبول مامان­دارى «استانا» جەڭىسكە جەتەدى دەپ بولجاعان-دى. ويتكەنى ەلوردا كلۋبىنىڭ تىزگىنىن رەسەيلىك مامان اندرەي تيحونوۆ ۇستاعاننان كەيىن جانە جاراقاتىنا بايلانىستى بىرقاتار ويىندى وتكىزىپ العان نەگىزگى قۇرامنىڭ فۋتبولشىلارى قاتارعا قوسىلعان سوڭ «استانانىڭ» ويىنى وزگە­رىپ شىعا كەلدى. سونداي-اق بۇل كەزدەسۋ تابيعي ەمەس, جاساندى الاڭدا وتەتىنى دە ەلوردالىقتاردىڭ جەڭىسكە جەتۋىنە تاماشا مۇمكىندىك ەدى. الايدا ويىن تاعدىرىن جاڭادان كەلگەن باس باپكەر, نە جاساندى الاڭ ەمەس, چەم­پيوناتتىڭ سۇرمەرگەنى ابات ايىم­بەتوۆتىڭ سوققان جالعىز گولى شەشىپ كەتتى.

وسىلايشا تۋرنير كەستەسىندە «استا­نادان» 14 ۇپايعا العا وزىپ كەتكەن «قايرات» چەمپيوندىققا ءبىر تابان جاقىنداي ءتۇستى. ەگەر «قايرات» كەلەسى تۋردا «ورداباسى» كومانداسىن دا جەڭەتىن بولسا, 16 جىلدان كەيىنگى العاشقى چەمپيوندىعىمەن قۇتتىقتاي بەرۋگە بولادى. «استانانىڭ» «قايراتتان» ءبىر ويىن كەم وتكىزگەنىن ايتا كەتەيىك.

«قايسار» – «كاسپي» 0:1

قازان ايىن جەڭىسپەن باستاعان «كاس­پي» ايدى جەڭىسپەن تۇيىندەدى. 1 قازان­دا «استانانى» 2:1 ەسەبىمەن جەڭگەن اقتاۋ­­لىقتار بۇل جول «قايسار» كلۋبىنان با­سىم ءتۇستى. ءبىر قىزىعى, تۋرنير كەس­تە­سىندە 11-ورىندا كەلە جاتقان «كاس­پي» جي­ناعان 10 ۇپايىنىڭ التاۋى­ن ءدال وسى «قايساردان» تارتىپ الدى. مۇناي­شى­لاردىڭ چەمپيوناتتاعى ناتيجەسى وتە ناشار بولعانىمەن, ويىندارى ءتاپ-ءتاۋىر. تەك ساتتىلىك جەتىسپەي جۇرگەن سىڭايلى. ايتپەسە كوپ ويىندا قارسىلاستارىنا ءبىر دوپ ايىر­ماشىلىعىمەن ەسە جىبەرىپ ءجۇر. ەندى الداعى ويىنداردا «كاسپي» جەڭىس جولىن جالعاستىرماسا, كەلەسى جىلى ءبىرىنشى ليگادا ونەر كورسەتۋى ابدەن مۇمكىن. ونسىز دا وزدەرى بيىل عانا جوعارى ليگاعا شىققان بولاتىن.

«وقجەتپەس» – «تاراز» 0:0

بۇل تۋردا گول سوعىلماعان جالعىز ويىن «وقجەتپەس» پەن «تاراز» اراسىندا ءوتتى. وتكەن ماتچتا ءۇش ۇپايدان ايىرىلعان ەكى كوماندا دا بۇل جولى ءبىر-ءبىر ۇپايعا رازى بولدى. 15-تۋردا «وقجەتپەس» «استانادان» 5:1 ەسەبىمەن جەڭىلسە, «تاراز» «قىزىلجارعا» 1:0 ناتيجەسىمەن ەسە جىبەردى. ازىرشە تۋرنير كەستەسىندە «تارازعا» قاراعاندا «وق­جەتپەستىڭ» ءحالى مۇشكىل. 15 ويىندا نەبارى 11 ۇپاي جيناعان كوكشەتاۋلىقتار قاۋىپتى ايماقتا تۇر. ەگەر «وقجەتپەستىڭ» ويىنى وسىلاي جالعاسا بەرسە, ماۋسىم سوڭىندا تومەنگى ليگاعا ءتۇسىپ قالۋى عاجاپ ەمەس.

«قىزىلجار» – «جەتىسۋ» 2:1

16-تۋردىڭ ەڭ سوڭعى ويىنى پەترو­پاۆلدىڭ «قىزىلجار» جانە تالدى­قورعاننىڭ «جەتىسۋ» كوماندالارى اراسىندا ءوتتى. «جاس قىران» ستاديونىنداعى كەزدەسۋدە «قىزىلجار» ويىن تاعدىرىن ءبىرىنشى تايمدا-اق شەشىپ قويدى. كەزدەسۋدىڭ 36-مينۋتىندا تيمۋر مۋلدينوۆ مەرگەندىگىمەن كوزگە تۇسسە, 45-مينۋتتا ماكسيم دراچەنكو پەنالتيدى ءساتتى ورىنداپ, ەسەپتى ەسەلەي ءتۇستى. ۇزىلىستەن سوڭ تالدىقورعاندىقتار شيراق قيمىلداي باستادى. كەزدەسۋدىڭ 51-مينۋتىندا ارتۋراس جۋلپانىڭ قاق­پاعا باعىتتاعان سوققىسى قاقپا تورىنان تابىلىپ, قوناقتار ەسەپ قىسقارتۋعا مۇمكىندىك الدى. ال ماتچتىڭ 87-مينۋتىندا وتكەن تۋرلاردىڭ بىرىندە «جەتىسۋدىڭ» قاھارمانىنا اينالعان ايبار جاقسىلىقوۆ ءتارتىپ بۇزىپ, قىزىل قاعاز الدى.