اۋا رايى كۇرت قۇبىلىپ, قارا جەرگە قاتقاق تۇرىپ, قار باسىپ قالعانىنا قاراماستان قوستانايدا اباتتاندىرۋ جۇمىستارى تولاستامايدى. اشىق دەمالىس ورىندارىنداعى بوس جەرلەرگە جاسىل جەلەك اسەم شىرشالار وتىرعىزىلدى. جوندەۋدەن جاڭا وتكەن كوشەلەردىڭ جاعالاۋىنداعى كارى اعاشتار كەسىلىپ, ورنىن جاس كوشەتتەر باسۋدا.
بيىل جاز بويى جوندەۋ جۇمىستارى جۇرگىزىلگەن ءال-فارابي, چكالوۆ, ارىستانبەكوۆ كوشەلەرىنىڭ بويىنا ۇيەڭكى مەن تەرەك كوشەتتەرى وتىرعىزىلىپ جاتىر. بۇل كوشەلەردە بۇرىننان ءوسىپ تۇرعان كارى اعاش بالتاعا جىعىلسا, ونىڭ ورنىنا 10 كوشەت وتىرعىزىلادى.
– چكالوۆ كوشەسىن قايتا جوندەۋدەن وتكىزدىك. جوبا بويىنشا بۇل كوشەنىڭ بويىنا 200 اعاش وتىرعىزىلۋ كەرەك. بۇل جەردەگى جۇمىس اياقتالعان سوڭ, ساياباقتاردىڭ بوس الاڭقايلارىن كوشەتپەن تولىقتىرامىز, – دەدى جولاۋشىلار كولىگى جانە اۆتوموبيل جولدارى باسقارماسىنىڭ مامانى نۇرالى ەسىركەپوۆ.
مۇنىڭ سىرتىندا, ەكى اپتادان بەرى وبلىس ورتالىعىنداعى گاشەك كوشەسى مەن ترياتلون ساياباعىندا, سونداي-اق جاستار سارايىنىڭ اينالاسىنا جەتىجىلدىق شىرشالار بوي تىكتەي باستادى. تامىرىن جاپقان توپىراعىمەن بىرگە اقمولا وبلىسىنان اكەلىنگەن مىڭنان استام شىرشا قالانىڭ بىرنەشە جەرىنە وتىرعىزىلادى. مامانداردىڭ ايتۋىنشا, قازىر ادام بويىنداي بولىپ قالعان جاسىل شىرشالار كەيىن 5 مەترگە دەيىن كوتەرىلەدى ەكەن.
اعاش كوشەتتەرى ارنايى جالدانعان مەردىگەرلەردىڭ كۇشىمەن وتىرعىزىلىپ جاتىر. قالا اكىمدىگىنىڭ مالىمەتىنشە, وبلىس ورتالىعىندا جىل سوڭىنا دەيىن 3 مىڭنان استام جاسىل جەلەك وتىرعىزىلادى.
قوستاناي وبلىسى