جۇمىر جەر جۇقپالى دەرتپەن جۇمىلا كۇرەسىپ جاتىر

الەمدىك ساراپشىلار بۇگىندە ۆيرۋس جۇقتىرۋ مەن ونىڭ قۇر­باندارىنىڭ سانى جاريالانىپ وتىرعان مالىمەتتەرگە ساي­كەس كەلمەۋى مۇمكىن ەكەنىن ايتادى. سەبەبى تەست تاپسىرۋ دەڭ­گەيى بارلىق ەلدە بىردەي ەمەس, بۇ­عان قوسا اۋرۋ سانىن جاسىرىپ, كەمىتىپ كورسەتۋدى دە جوققا شى­عارۋعا بولمايدى.

 * * *

Scientific American باسىلى­مىندا 26 قازاندا جارىق كور­گەن عىلىمي ماقالادا COVID-19 ۆيرۋسىنا تولەرانت­تى­ ادامدار بار ەكەنى ايتىلادى.

قىتاي مەن امەريكا عالىم­دارى مۇنداي ادامداردىڭ بو­يىندا COVID-19 دامىمايتىنىن, ۆيرۋس بار ەكەنى بەلگىسىز كۇيدە وتەتىنىن اتاپ ءوتتى. الايدا ونداي ادامدار اعزاسىندا COVID-19 ۇزاق ۋاقىت ساقتالىپ, اۋرۋ تاسىمالداۋشى بولادى. مى­سالى, ۆيرۋس انىقتالعان 3 پا­تسيەنتتە بۇرىننان سوزىلمالى سۋسامىر, گيپەرتونيا ءتارىزدى اۋرۋلار بولعانىمەن, ولاردا COVID-19 بەلگىلەرى اعزانىڭ تو­لەرانت­تىلىعى ارقاسىندا ەش بىلىنبەگەن.

«بۇل ادامداردا اۋرۋ بەلگىلەرى ايقىن كورىنبەگەنىمەن, ۆيرۋستىڭ اعزادا 50 كۇندەي ۇزاق ساقتالۋى ولاردىڭ ۆيرۋسقا قارسى تۇرۋداعى جوعارى يممۋنيتەتىنەن ەمەس, جوعارى تولەرانتتىلىعىنا بايلانىستى», دەيدى عالىمدار.

 * * *

رەسەيلىك ابدۋللو حودجاەۆ اتتى دارىگەر-وتولارينگولوگ COVID-19 ىندەتىنەن سوڭ ءيىس سەزۋ قابىلەتىن قايتارۋ ادىستەرىمەن ءبولىستى.

ماماننىڭ ايتۋىنشا, ءيىس سەزۋ قابىلەتى قايتا ورالۋ ءۇشىن اۋا اعىنى جۇيكە تالشىقتارىنا تىكەلەي كەلىپ تۇراتىنداي جاع­داي قاجەت. سول ءۇشىن تامىرلاردى تارىلتاتىن پرەپاراتتار قابىل­داپ, مۇرىندى تەڭىز تۇزىنىڭ ەرى­تىندىسىمەن ءجيى شايىپ تۇرۋ كە­رەك. ال تۇزدى ۇيدە دە ەرىتىپ پاي­­دالانسا بولادى. سونداي-اق ۆ توبىنداعى دارۋمەندەر مەن پو­ليۆيتاميندەر ءىشۋ كەرەك. پا­تسيەنت­تەر ىشىمدىك پەن نيكو­تيننەن مۇلدە الىستاپ, وسى تاسىل­دەردى قولدانسا, ءيىس سەزۋ تەزى­رەك قالپىنا كەلەدى.

 * * *

ددۇ باسشىسى تەدروس ادانان گەبرەيسۋس كۇز بەن قىس ايلارىندا سولتۇستىك جارتىشار تۇرعىندارىنا COVID-19 قاۋىپ-قاتەرى قاتتى ءتونىپ تۇر دەگەن بولجام جاسادى.

«كەي مەملەكەتتەر ءۇشىن الداعى ايلار قيىنعا تۇسەدى, ولار ۆيرۋس تارالۋى قاۋىپتى ايماق سانالادى», دەيدى ول.

راسىندا, بۇگىندە سولتۇستىك جارتىشارداعى مەملەكەتتەردە ۆيرۋستىڭ ءورشۋى ادامزات بالاسىن الاڭداتادى. ەۋروپانىڭ تەڭىز جاعاسىنداعى جىلى دا قولايلى تۇبەكتەرىن جايلاعان مەملەكەتتەر اۋرۋ زاردابىن تارتۋدا. يسپانيا, يتاليا تۇرعىندارى اراسىنداعى اۋرۋ تارالۋ كوكتەمدەگى ۆيرۋس تاسقىنىن جولدا قالدىردى. سول سەبەپتى اپەننين تۇبەگىن جايلاعان جۇرت ءۇشىن بارلىق كينوتەاتر مەن سپورت زالى, باسسەين مەن تەاتر اتاۋلىنىڭ ەسىگى تارس جابىلدى. مەيرامحانالار مەن بارلار بەلگىلى ءبىر ۋاقىتقا عانا اشىلادى جانە كوپشىلىگىندە تاپسىرىس بويىنشا ۇيلەرگە جەتكىزىپ بەرۋ قاجەتتىلىگى ەسكەرتىلگەن.

* * *

گەرمانياداعى سولتۇستىك رەين-ۆەستفاليا پرەمەر-ءمينيسترى ارمين لاشەت فەدەرالدى ايماقتىڭ دەنساۋلىق ساقتاۋ سالاسىن كۇشەيتۋ قاجەت دەپ سانايدى.

سول ءۇشىن بۋندەسۆەردىڭ جانە ايماق بيلىگىنىڭ مىڭداعان قىزمەتكەرى ايماققا بارىپ, COVID-19 تارالۋىن اۋىزدىقتاۋ بويىنشا ماقساتتى تۇردە جۇمىس ىستەيتىن بولادى. بۇعان قوسا گەرمانيا حالقىن ماۋسىمدىق تۇماۋدان ساقتاۋ ءۇشىن دە ءىس-شارالار قابىلدانعان. وسى ماقساتتا مەملەكەت 27 ملن ۆاكتسينا ساتىپ العان كورىنەدى.