بوياۋى قانىق, قوسپاسىز كورىنىستەر

بۇل ازامات بۇعان دەيىن تەمىر­دەن ءتۇيىن ءتۇيىپ, التىندى اپتاپ, كۇمىستى قاپتاپ كىسە-بەلدىك, اشەكەيى ادەمى سىرعا-جۇزىك, بولاتتى بالقىتىپ قانجار-پىشاق جاسايتىن ونەرىمەن ايگىلى-ءتىن.

ەندى مىنە, ونىڭ ءبارىن جيناپ قويىپ كوركەم كارتينا جازۋدى باستاپتى. ءوزىنىڭ ايتۋىنا قاراعاندا, ءحىح عاسىردىڭ سو­ڭىندا فرانتسيا توپىراعىندا پايدا بولىپ, كەيىن كۇللى الەمگە تاراپ, كەسكىندەمە ونەرىنىڭ ءبىر جەكە سالاسىنا اينالعان رەاليست يمپرەسسيونيزم باعىتىنداعى سۋرەتشى ەكەن. وقىعان ماماندىعى دا ءدال وسى.

بۇل جىگىت 1979 جىلى دۇ­نيەگە كەلگەن. قازىر قىرىقتىڭ قىر­قاسىنا ءىلىنىپ, قاي جاعىنان دا تولىسقان شاعى. 1997 جىلى ورتا مەك­تەپتى بىتىرگەن ول ەل استاناسى ۇلانباتىر قالاسىنا بارىپ, پە­داگوگيكالىق ۋنيۆەرسيتەتتىڭ كوركەم سۋرەت فاكۋلتەتىندە ءبىلىم العان.

 – سۋرەت سالا باستاعانىما ءۇش جىلدىڭ ءجۇزى بولدى, – دەي­دى تالانتتى ازامات: «بۇعان دەيىن دە تۋعان جەر تابيعاتى مەن كوشپەندىلىك ءومىردىڭ ساف مادەنيەتىن ساقتاعان تۇرمىسىن, اسىرەسە قۇسبەگىلىكتىڭ بولمىسى بۇ­زىلماعان تۇنىق كورىنىسىن بەينەلەۋ ارمانىم ەدى. قازىر وسى ارمانىمدى ۇشتاۋ ۇستىندەمىن», دەيدى ريزابەك ءىنىمىز.

قىلقالام شەبەرى تىنىمسىز ەڭبەكتەنۋدىڭ ارقاسىندا سوڭ­عى ءۇش جىلدىڭ ىشىندە 30-عا تارتا كارتينا سالىپ شى­عىپتى. سۋرەتتەرىنىڭ بوياۋى قا­­نىق, ەش­قانداي قوس­پاسىز كوش­­­پەندى ءومىر­دىڭ ەتنو­گرا­فيا­لىق بەينەسىن سوم­داعان. ياعني حال­قى­مىزدىڭ ەجەل­گى قۇن­دىلىعىن كەس­كىندەمە ار­قىلى تانىتۋعا تالپىنعان. باستى ەرەك­شەلىگى دە وسى.

سۋرەتشىنىڭ قولىنان شىققان جۇمىستارى قازىر حالىقارالىق دەڭگەيدە ءوز باعاسىن الىپ ءجۇر. ايتار بولساق, 2017 جىلى باي-ولكەدە ۇيىمداستىرىلعان اقش, رەسەي, موڭعوليا سۋرەتشىلەرىنىڭ بىرىككەن كورمەسىنەن «ەتنوتانىم ەرەكشەلىگى ءۇشىن» اتتى نو­مي­­­ناتسيانىڭ ۇزدىگى اتانسا, 2018 جىلى تاۋلى التاي قا­لا­­سىندا وتكەن سۋرەتشىلەردىڭ حا­لىق­ارا­لىق كورمەسىنەن دە جۇل­دە الىپتى. مۇنىڭ سىرتىن­دا وت­كەن جىلى وڭتۇستىك كورەيا­نىڭ پۋ­سان قالاسىندا ۇيىم­داس­تى­رىلعان دوستاستىق ەلدە­رىنىڭ قىلقالام شەبەرلەرى باس قوس­قان ءىرى شاراعا قاتىسقان ەكەن. جۋ­ىقتا عانا كورەيادا ۇيىمداستىرىلعان «Atomic pease» كورمەسiنە ونلاين قاتىسىپ, سەرتيفيكاتقا يە بو­لىپتى.