قوستانايداعى جوعارى مەديتسينا كوللەدجىنىڭ وقىتۋشىلارى جەرگىلىكتى ۆولونتەرلەرگە العاشقى مەديتسينالىق كومەك كورسەتۋدىڭ قىر-سىرىن ۇيرەتە باستادى. ءۇش كۇندىك كۋرس بارىسىندا وتىزدان استام ەرىكتى قان توقتاتۋ, جارانى بايلاۋ, سىنعان اياق-قولدى تاڭۋ, اۋىز نەمەسە مۇرىن قۋىسىنا دەم جىبەرۋ, جۇرەك تۇسىنا ماسساج جاساۋ, اپاتقا تۇسكەن ادامدى تەزىرەك ەمدەۋ مەكەمەسىنە جەتكىزۋ نەمەسە جەدەل مەديتسينالىق كومەك شاقىرۋ داعدىلارىن مەڭگەرەدى.
قىسقا مەرزىمدىك مەديتسينالىق كۋرستان ءوتىپ جاتقان «رەگيون-10» ۆولونتەر جاساعى ءبىراز جىلدان بەرى ءىز-ءتۇزسىز كەتكەندەردى ىزدەستىرۋ, قۇتقارۋ شارالارىنا بەلسەندى اتسالىسىپ كەلەدى. جاساقتىڭ وبلىس اۋماعىندا بىرنەشە فيليالى جۇمىس ىستەيدى. نۇر-سۇلتان, قىزىلوردا ۆولونتەرلەرىمەن دە تىعىز بايلانىس ورناتقان.
– ءبىزدىڭ جۇمىسىمىز ءىز-ءتۇزسىز جوعالىپ كەتكەن ادامداردى ىزدەۋگە, قيىن جاعدايعا تۇسكەن جانداردى قۇتقارۋعا باعىتتالعان. جۇمىس بارىسىندا ءارتۇرلى توسىن وقيعالارعا تاپ بولىپ جاتامىز. كەيبىر ساتتەردە العاشقى مەديتسينالىق كومەت كورسەتۋگە تۋرا كەلەدى. ادام قىسىلىپ جاتقاندا توسىلىپ قالۋعا بولمايدى, قاس-قاعىم ءسات قىمبات. مۇنداي كەزدە از دا بولسا مەديتسينالىق ءبىلىم كەرەك. ويلاسا كەلە, وبلىستىق دەنساۋلىق ساقتاۋ باسقارماسىنا حابارلاسىپ, ءبىز ءۇشىن مەديتسينالىق ساۋات اشۋ كۋرستارىن ۇيىمداستىرۋ مۇمكىندىگىن قاراستىرۋدى وتىندىك. ءوتىنىشىمىز بىردەن قولداۋ تاۋىپ, قوستانايداعى جوعارى مەديتسينالىق كوللەدجىندە كۋرستان وتۋگە مۇمكىندىك الدىق, – دەيدى «رەگيون-10» ۆولونتەرلەر جاساعىنىڭ نۇسقاۋشىسى ۆلاديمير شاۋفلەر.
دەنساۋلىق ساقتاۋ باسقارماسىنىڭ ۇسىنىسىن مەديتسينالىق كوللەدج ۇجىمى دا قولداپتى. وقۋ ورنى ۆولونتەرلەر ءۇشىن ون ەكى ساعاتتىق تاجىريبەلىك كۋرس ۇيىمداستىرعان. پاندەمياعا بايلانىستى ەرىكتىلەردى شاعىن توپتارعا ءبولىپ وقىتۋ جوسپارلانىپتى. كوللەدج وقىتۋشىلارى العاشقى كۇنى اشىق جانە جابىق جاراقاتتاردى تاڭۋدى, سونداي-اق وكپە-جۇرەك رەانيماتسياسىنىڭ ادىستەرىن ۇيرەتتى. وقىتۋشىلار العاشقى مەديتسينالىق كومەك كورسەتۋ بارىسىندا مۇنداي قاراپايىم ءادىس-تاسىلدەردى ءبىلۋدىڭ ماڭىزى زور دەيدى.
قوستاناي وبلىسى