قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىندا «قازاقستاننىڭ 100 جاڭا ەسىمى» جوباسى جەڭىمپازدارىمەن ونلاين كەزدەسۋ ءوتتى. وعان ەلىمىزدىڭ تۇكپىر-تۇكپىرىنەن كەلگەن جاستار قاتىسىپ, ەلباسى باستاماسى رەتىندە قابىلدانعان اتالعان جوبانىڭ قوعامعا ىقپالى جايلى ايتىپ, الداعى جوسپارلارىمەن ءبولىستى.
ءىس-شارا مودەراتورى مەكەمە باسشىسى ءامىرحان راحىمجانوۆ,ونلاين جيىندى اشىپ, سويلەگەن سوزىندە: «سىزدەر – وزىنە سەنەتىن, بىرنەشە ءتىلدى مەڭگەرگەن, جاھاندىق اقپاراتتىق قوعامداستىقتىڭ تەتىگىن يگەرگەن ءبىلىمدى, تالانتتى, كرەاتيۆتى ەل جاستارىنىڭ وكىلىسىزدەر. ەلباسى كىتاپحاناسى جاس قازاقستاندىقتاردىڭ تاربيەسى مەن بىلىمىنە باسا ءمان بەرىپ, وتاندىق جانە حالىقارالىق جوبالاردىڭ دامۋى مەن ورىستەۋىنە بەلسەندى اتسالىسادى. كىتاپحانا سايتىندا « ۇلى دالا تارلاندارى» اتتى اقپاراتتىق جوباسى ىسكە قوسىلعان. وسىندا «قازاقستاننىڭ 100 جاڭا ەسىمى» جوباسىنىڭ فيناليستەرىمەن ۆيدەوكەزدەسۋلەر دە بار» دەدى.
سودان كەيىن, اتالعان جوبانىڭ قالاي دامىپ كەلە جاتقانى جايلى ونىڭ كۋراتورى بيبىگۇل قۇلامان تارقاتا ايتىپ, شارانى ۇيىمداستىرۋشى تاراپقا العىسىن ءبىلدىردى.
«قازاقستاننىڭ 100 جاڭا ەسىمى» جوباسى پاندەمياعا قاراماستان جۇمىسىن جالعاستىرۋدا. ەلباسىنىڭ باستاماسىمەن قۇرىلعان جوبا جاستاردىڭ كوڭىلىنەن شىقتى. جاستارىمىز قازاقستان اتىن بار الەمگە تانىتۋدا. ولاردىڭ قاتارىندا, يمانبەك زەيكەنوۆ, ايگەرىم بەرەكەشوۆا, ايجان ءجۇزباي, ت.ب. جاستار بار», دەدى ب.قۇلامان.
جوبا ءفيناليسى, 2016 جىلى مۇددەلەستەرىمەن بىرگە «تەڭ مۇمكىندىكتەر الەمى» قوعامدىق بىرلەستىگىن قۇرعان نۇرگۇل ۇلجەكوۆا ءوز سوزىندە, ءبىز قادامىمىزدى نىق باسىپ كەلەمىز. بۇگىندە بىرقاتار قالادا ەرەكشە بالالارعا ارناپ تەگىن بەيىمدەۋ سپورت سەكتسيالارىن اشتىق. بۇل سەكتسيالار بۇلدىرشىندەردىڭ پسيحولوگيالىق كەدەرگىلەرىن جويۋعا كومەكتەسەدى. اركىم تەڭ مۇمكىندىكتەر الەمىندە ءومىر ءسۇرۋى ءتيىس. بۇل تۇسىنىكتىڭ كەڭ ەتەك جايعانىن قالايمىز. سوندىقتان «قازاقستاننىڭ 100 جاڭا ەسىمى» جوباسىنا قاتىسۋ جۇمىسىمىزدىڭ تيىمدىلىگىن ارتتىرۋدا جانە ەرەكشە بالالاردىڭ ماسەلەلەرى تۋرالى قوعامعا مەيلىنشە كەڭىرەك جەتكىزۋدە وتە ماڭىزدى كەزەڭ بولدى دەسە, جوبا ءفيناليسى ساۋلەت قالداشوۆ, اتالعان جوبا جەرىن, ەلىن شىن سۇيەتىن, ونىڭ يگىلىگى ءۇشىن ايانباي تەر توگىپ جۇرگەن جاستار ەسىمىن پاش ەتتى. بۇل جاندار – قوعامنىڭ دامۋىنا ەڭبەك ءسىڭىرىپ جۇرگەن ۇلتتىڭ جاناشىرى, ناعىز پاتريوت ازاماتتار. قازاقستاننىڭ جارقىن دا بەيبىت كەلەشەگى ءبىزدىڭ قولىمىزدا, – دەپ ءوز ويىمەن ءبولىستى.
كەزدەسۋ سوڭىندا مەكەمە باسشىسى ءامىرحان مۇراتبەك ۇلى جيىنعا قاتىسقاندارى ءۇشىن جاستارعا العىس ءبىلدىرىپ, جوبانىڭ ءار جەڭىمپازىنىڭ تاجىريبەسى مەن تاريحى قازاقستاندىق جاستار ءۇشىن مىقتى موتيۆاتسيا بولا الاتىنىن العا تارتتى.