حوسەپ بارتومەۋ يسپاندىق "بارسەلونانىڭ" پرەزيدەنتى قىزمەتىنەن كەتتى, دەپ حابارلايدى Egemen.kz.
"مەن بۇكىل ديرەكتورلار كەڭەسىمەن بىرگە وتستاۆكاعا كەتكەنىمدى حابارلايمىن. بۇل مەنىڭ بارلىق ارىپتەستەرىممەن كەلىسىلگەن شەشىم. سوڭعى ۋاقىتتا بولعان وقيعالار بارلىق شەكارادان اسىپ ءتۇستى. ماعان, مەنىڭ وتباسىما جانە ارىپتەستەرىمە قاۋىپ ءتوندى. ءوز كلۋبىما قىزمەت ەتۋ مەن ءۇشىن ۇلكەن مارتەبە بولدى", دەپ جازدى بارتومەۋ Twitter پاراقشاسىندا.
بارتومەۋ 2014 جىلى ساندرو روسسەلدىڭ ورنىنا "بارسەلونانىڭ" پرەزيدەنتى بولىپ كەلدى. ونىڭ پرەزيدەنتتىگى كەزىندە كلۋب چەمپيوندار ليگاسىن, ءتورت رەت ۇلتتىق بىرىنشىلىك پەن ۇلتتىق كۋبوكتى جەڭىپ الدى. بىراق وسى جىلى كلۋب جانكۇيەرلەرىن قۋانتا المادى. چەمپيوندار ليگاسىندا "بارسا" "باۆاريادان" 2:8 ەسەبىمەن ۇتىلىپ, چەمپيوناتتا ەكىنشى ورىن الدى. ال وتكەن دەمالىس كۇندەرى ەل-كلاسيكودا مادريدتىك "رەالدان" جەڭىلىپ قالدى.