الماتى وبلىسىنىڭ تۇرعىنى كەنجەبەك الپىسباەۆ 9 جىلدان بەرى ولىلەردىڭ تىزىمىندە بولعان. ول بۇل دەرەكتى Nur Otan پارتياسىنىڭ پرايمەريزىنە قاتىسۋ بارىسىندا كەزدەيسوق انىقتاعان, - دەپ حابارلايدى Egemen.kz ەۋرازيا ءبىرىنشى ارناسىنا سىلتەمە جاساپ.
تەلەارنا تاراتقان اقپاراتقا سايكەس, كەنجەبەك الپىسباەۆ بۇعان دەيىن جۇمىس ىستەگەن, مەملەكەتتىك قىزمەتتەر العان, سالىق تولەپ جۇرگەن, ءوزىنىڭ ولىلەر تىزىمىندە بارىن مۇلدە بىلمەگەن. پرايمەريزگە قاتىسپاسا, قۇجات بويىنشا ولىلەردىڭ تىزىمىندە بار ەكەنىن بىلمەي قالۋى دا مۇمكىن ەدى.
بەلگىلى بولعانداي, 2011 جىلى كەنجەبەك الپىسباەۆتىڭ اناسى قايتىس بولعان. سول ۋاىقتتا ول اناسى قايتىس بولعانى تۋرالى كۋالىك الۋ ءۇشىن ءوتىنىش جازعان. سوندا ماماندار اناسىنىڭ جسن-ءىن جازۋدىڭ ورنىنا ءوتىنىش بەرۋشىنىڭ دەرەكتەرىن جازىپ جىبەرگەن كورىنەدى. "باستاپقىدا قالاي ولىلەردىڭ تىزىمىندە ەكەنىمدى تۇسىنبەي تاڭعالدىم. سۇمدىق! نەگىزى پارتيا قاتارىندامىن, جىل سايىن جارنا تولەيمىن, جيىندارعا قاتىسىپ تۇراتىنمىن. بازانى تەكسەرمەگەن بولۋى كەرەك, بۇل جەردە ادامي فاكتور بولىپ تۇر عوي", - دەگەن تۇرعىن قۇزىرلى ورگاندارعا شاعىمداندى. كەيىنىرەك اتالعان ءىس بويىنشا ارنايى كوميسسيا قۇرىلىپ, تەرگەۋ جۇرگىزىلىپ, قاي مامان قاتەلەسكەنى انىقتالعان.