ۇلتتىق مۋزەيدە قازاقستان رەسپۋبليكاسىنىڭ ەڭبەك سىڭىرگەن قايراتكەرى, سۋرەتشىلەر وداعىنىڭ مۇشەسى احمەت احاتتىڭ 65 جاسقا تولعان مەرەيتويىنا وراي «شىعىس الەمى» كورمەسى اشىلدى.
شارانىڭ ماقساتى – قازىرگى زامانعى سۋرەتشىلەردىڭ شىعارماشىلىعىنداعى تاريحي سيۋجەتتەر مەن شىعىس كولوريتىنىڭ ساباقتاستىعىن كورسەتۋ.
كورمەنىڭ اشىلۋ سالتاناتىندا ۇلتتىق مۋزەي ديرەكتورى ا.مۇحامەدي ۇلى, قازاقستان رەسپۋبليكاسىنىڭ ءماجىلىس دەپۋتاتى ە.شايماردان, «قازاقستان ۇيعىرلارىنىڭ رەسپۋبليكالىق ەتنومادەني ورتالىعى» قوعامدىق بىرلەستىگى نۇر-سۇلتان قالالىق فيليالىنىڭ توراعاسى ر.ابدۋسالاموۆ ءسوز سويلەپ, قىلقالام شەبەرىنىڭ وتاندىق بەينەلەۋ ونەرىن دامىتۋداعى قوسقان ۇلەسىن اتاپ ءوتتى.
ا.احات 1974 جىلى الماتى قالاسىنداعى قازاق پەداگوگيكالىق ينستيتۋتىنىڭ كوركەمسۋرەت-گرافيكا فاكۋلتەتىن بىتىرگەن. 1995 جىلى تاشكەنت قالاسىنداعى «ازيا ارت» كورمەسىندە التىن مەدالعا يە بولدى. «يلحام» پرەمياسىنىڭ لاۋرەاتى, «مادەنيەت سالاسىنىڭ ۇزدىگى», گيننەسس رەكوردىنىڭ يەگەرى, سونىمەن قاتار لوندونداعى اۋكتسيون كورمەسىنىڭ قاتىسۋشىسى.
سۋرەتشىنىڭ جۇمىستارى ءا.قاستەەۆ اتىنداعى مەملەكەتتىك ونەر مۋزەيىندە, ماسكەۋدەگى مەملەكەتتىك شىعىس ونەر مۇراجايىندا, «اق وردا» رەزيدەن-
تسياسىندا جانە گەرمانيا, يتاليا, تۇركيا, اقش, قىتاي ەلدەرىنىڭ جەكە جيناقتارىندا ساقتاۋلى.
ول – تابيعاتىنان شىعىسقا جاقىن ونەر يەسى. تامعالى تاستىڭ سيۋجەتتەرىن ءوزىنىڭ بارلىق شىعارماشىلىق جۇمىستارىندا قولدانادى. بۇدان باسقا, تاريحي ادەبيەت ونىڭ شابىت كوزى بولىپ قالا بەرمەك. وعان دالەل, كورمەدەگى جارتاستاعى سۋرەتتەر. بۇعان قوسا قاتىسۋشىلارعا كوركەم جانە گرافيكالىق تۋىندىلاردى دا ۇسىندى. ونىڭ شىعارمالارىندا جەكە ءتۇس سحەماسى ەرەكشە. كورمەدەگى 100-دەن اسا تۋىندىدان سونى بايقادىق.
سۋرەتشىنىڭ ونەر سالاسىنداعى كوپتەگەن قىزىعۋشىلىقتارىنىڭ ىشىندەگى ەڭ تۇراقتىسى – پەتروگليفتەر, جارتاستاعى سۋرەتتەر, ميفتىك سانامەن ءومىر سۇرگەن قولا داۋىرىندەگى اتى بەلگىسىز سۋرەتشىلەردىڭ سيمۆوليكالىق ءىس-ارەكەتتەرىنىڭ ىزدەرى. ول ءوزىنىڭ تۋىندىلارىنا وسى بەلگىلەردى ءجيى قوسادى.
تاعى ءبىر قايتالاناتىن سيۋجەت – شىعىس تۇركىستان قالالارى. اتاپ ايتساق, بالشىق ۇيلەر, ەسىكتەردىڭ تار ساڭىلاۋلارى بار قابىرعالار, قاڭىراپ قالعان كوشەلەر. وسىلايشا شىعارمالارى ارقىلى ەكزەستەنتسيالدى جالعىزدىقتى بىلدىرەدى.
ايتا كەتەيىك, بۇعان دەيىن اۆتوردىڭ جەكە كورمەلەرى ماسكەۋ, انكارا, گەنۋيا, الماتى, ءۇرىمشى قالالارىندا وتكەن.