سۋمەن جابدىقتاۋ جانە سۋ بۇرۋ جوبالارىن ىسكە اسىرۋ كەزىندە جوبالاۋ-سمەتالىق قۇجاتتامانىڭ تيپتىك جوبالارىن, وتاندىق وندىرۋشىلەردىڭ ماتەريالدارىن پايدالانۋ قاجەت. بۇل تۋرالى ۇكىمەت وتىرىسىندا پرەمەر-مينيستر اسقار مامين مالىمدەدى, دەپ حابارلايدى Egemen.kz
"تاعى ءبىر ماڭىزدى مىندەت كارىزدىك تازارتۋ قۇرىلىستارىن سالۋ جانە جاڭعىرتۋ بولىپ تابىلادى. بۇل ماسەلەنى شەشۋدىڭ تاسىلدەرى بار, قارجىلاندىرۋ كوزدەرى انىقتالدى, جوبالاۋ قۇجاتتاماسى دايىندالىپ جاتىر. وسى جۇمىستاردى جىلدام اياقتاپ, جوبالاردى ىسكە اسىرۋعا كىرىسۋ كەرەك. سۋمەن جابدىقتاۋ جانە سۋ بۇرۋ جوبالارىن ىسكە اسىرۋ كەزىندە جوبالاۋ-سمەتالىق قۇجاتتامانىڭ تيپتىك جوبالارىن, وتاندىق وندىرۋشىلەردىڭ ماتەريالدارىن پايدالانۋ قاجەت. بۇل جوبالاردىڭ شىعىندارىن قىسقارتىپ قانا قويماي, جەرگىلىكتى قامتۋدى دامىتۋعا مۇمكىندىك بەرەدى", دەدى اسقار مامين.
وسى ورايدا ۇكىمەت باسشىسى جالپى مەملەكەتتىك ورگاندار قابىلداپ جاتقان شارالاردى قولداۋعا بولادى دەپ ەسەپتەيتىنىن ايتا كەلە بىرقاتار ماسەلەگە نازار اۋدارتتى.
ء"بىرىنشى. يندۋستريا مينيسترلىگىنە اكىمدەرمەن بىرلەسىپ, وسى جىلدىڭ قورىتىندىسى بويىنشا قالالار مەن اۋىلداردا ورتالىقتاندىرىلعان سۋمەن جابدىقتاۋ بويىنشا جوسپارلانعان كورسەتكىشتەردىڭ ورىندالۋىن قامتاماسىز ەتۋدى تاپسىرامىن.
ەكىنشى. ەكولوگيا مينيسترلىگى توپتىق سۋ قۇبىرلارىن باسقارۋ جۇيەسىن ودان ءارى جەتىلدىرۋ بويىنشا شارالار قابىلداپ, ولاردى سالۋ جانە رەكونسترۋكتسيالاۋ جوبالارىن ۋاقتىلى ىسكە اسىرۋدى قامتاماسىز ەتسىن. 2021 جىلدىڭ سوڭىنا دەيىن 197 مىڭ تۇرعىنى بار 38 ەلدى مەكەنگە سۋ جۇرگىزۋدى كوزدەيتىن, ۇزاققا سوزىلعان ءۇش جوبانىڭ قۇرىلىسىن اياقتاۋ قاجەت.
ءۇشىنشى. يندۋستريا, ۇلتتىق ەكونوميكا, قارجى, ەكولوگيا, دەنساۋلىق ساقتاۋ مينيسترلىكتەرى حالىق ءۇشىن تاريفتەردىڭ ارتۋىنا جول بەرمەۋ ءۇشىن كارىزدىك تازارتۋ قۇرىلىستارىن سالۋ جانە رەكونسترۋكتسيالاۋ جوبالارىن ىسكە اسىرۋ تەتىگىن زاڭ جۇزىندە بەكىتۋدى قامتاماسىز ەتسىن, قارىزدارعا قىزمەت كورسەتۋ مەن وتەۋدى ەسكەرۋ قاجەت", دەدى پرەمەر-مينيستر.