نۇر-سۇلتانعا شەتەلدەن ۇشىپ كەلگەن پتر تەستى جوق 108 جولاۋشى ستاتسيونارلىق كارانتينگە جىبەرىلدى, دەپ حابارلايدى Egemen.kz ەلوردا اۋەجايىنىڭ ءباسپاسوز قىزمەتىنە سىلتەمە جاساپ.
بۇگىن تۇندە ەلوردانىڭ اۋەجايىنا شەتەلدەن 6 ۇشاق كەلىپ قوندى.
اۋە رەيستەرىن Air Astana, Turkish Airlines,Belavia جانە Flydubai اۋە كومپانيالارى ورىنداعان. بارلىعى 722 جولاۋشى ۇشىپ كەلگەن. سونىڭ ىشىندە 108-ءىنىڭ پتر-تەست انىقتاماسى بولماعان. ولاردىڭ بارلىعى ستاتسيونارلىق كارانتينگە جاتقىزىلدى.
پتر-تەستتەن وتكەننەن كەيىن بۇل جولاۋشىلاردان كوروناۆيرۋس انىقتالماسا ۇيلەرىنە جىبەرىلەدى. ەگەر ۆيرۋس انىقتالسا, ينفەكتسيالىق ستاتسيونارعا جاتقىزىلادى.