امبەباپ جانە كونۆەرگەنتتى جۋرناليستەردى دايارلاۋعا ارنالعان Jas Qalam رەسپۋبليكالىق جوباسىنا قاتىسۋ ءۇشىن ءوتىنىش قابىلداۋ باستالدى. جوبانى نۇرسۇلتان نازارباەۆ قورىنىڭ قولداۋىمەن قازاقستان كونگرەسى ۇيىمداستىرىپ جاتىر.
قازاقستاندىق جۋرناليستيكانى دامىتۋ, جاستارعا وسى سالاداعى كاسىبي مامانداردان, ەلىمىزدىڭ بەلگىلى جۋرناليستەرىنەن, باق مەنەدجەرلەرى مەن باق جەتەكشىلەرىنەن, بلوگەرلەر مەن تەلەگرام-ارنالاردىڭ اۆتورلارىنان, مەديا-ترەنەرلەردەن تەگىن ءبىلىم الۋعا مۇمكىندىك بەرۋدى ماقسات ەتكەن شاراعا تىركەلۋ 16 قاراشاعا دەيىن جالعاسپاق.
جوبا بيىل ءۇشىنشى رەت ءداستۇرلى تۇردە وتكىزىلىپ وتىر. وتكەن جىلى قاتىسۋشىلار بلوگ جۇرگىزۋ, تەلەجۋرناليستيكا, باسپا جانە ينتەرنەت-جۋرناليستيكا باعىتتارىنىڭ بىرەۋىن عانا تاڭداۋى كەرەك بولسا, ال بيىل ولار بلوگ جۇرگىزۋ جانە الەۋمەتتىك مەديا, جەكە برەند قالىپتاستىرۋ جانە PR, تەلەجۋرناليستيكا, باسپا جانە ينتەرنەت جۋرناليستيكا سياقتى 4 باعىت بويىنشا ءبىر اي كۇندەلىكتى ءبىلىم الا الادى.
ايتا كەتۋ كەرەك, بيىل وقۋ ەكى تىلدە وتەدى. 26 قازاننان 20 قاراشاعا دەيىن ءورىستىلدى توپقا, ال 16 قاراشادان 11 جەلتوقسانعا دەيىن قازاقتىلدى توپقا ارنالعان ترەنينگتەر وتەدى.
– بيىلعى جىلى ماستەر-كلاستاردىڭ تاقىرىپتارى مەن باعىتتارىن ءارتاراپتاندىرۋ جولعا قويىلدى. ءبىز ءاربىر جاس ءجۋرناليستىڭ زەرتتەۋگە ارنالعان تاقىرىپتاردىڭ تولىق سپەكترىن العاندىعىن قالايمىز. جىل سايىن وتكىزىلەتىن Jas qalam ترەنينگتەرى ءوز تيىمدىلىگىن كورسەتىپ وتىر. ويتكەنى قاتىسۋشىلار اقپاراتتىق جۇمىستى جۇرگىزۋدە جاڭا تاسىلدەر قولدانادى, قاتەلەرىن كورەدى جانە جاڭالىق تاراتۋدىڭ جاڭا فورماتتارىن يگەرەدى, – دەيدى نۇرسۇلتان نازارباەۆ قورى اتقارۋشى ديرەكتورىنىڭ ورىنباسارى الكەي مارعۇلان ۇلى.
باعدارلامانىڭ ءبىرىنشى باعىتى – «بلوگگينگ». بۇل اپتا تولىعىمەن الەۋمەتتىك مەديا, كوپيرايتينگ, ستوريتەللينگ, Instagram جانە Youtube پلاتفورمالارداعى قازىرگى تەندەنتسيالارمەن تانىسۋعا ارنالادى.
ەكىنشى باعىت – «PR جانە جەكە برەندينگ». قوعاممەن بايلانىس سالاسىنىڭ ۇزدىك ماماندارى يميدج قالىپتاستىرۋ, باق-پەن ءوزارا بايلانىس قۇرۋ جانە داعدارىسقا قارسى تۇرا الاتىن مەنەدجمەنتتىڭ سىرلارىن جاس جۋرناليستەرگە ايتىپ بەرەدى.
ءۇشىنشى باعىت تەلەۆيزيا سالاسىندا قىزمەت ەتۋ مەن اۆتورلىق باعدارلاما جۇرگىزۋدى ارمانداعاندار ءۇشىن ەرەكشە قىزىق بولماق. تەلەجۋرناليستيكا اپتالىعى جاڭالىق جۇرگىزۋ, باعدارلاما ازىرلەۋ, جەكە باعدارلاما تاقىرىپتارىنا ارنالادى.
باعدارلاما باسپا جۋرناليستيكاسىنىڭ نەگىزدەرىن, تەندەنتسيالارىن جانە ونلاين باق-تا جۇمىس ىستەۋدى, ماقالا جازۋ مەن سۇحباتتاسۋ ونەرىن ۇيرەتەتىن باعىتتاعى وقۋمەن اياقتالادى.
«جوباعا قاتىسۋشىلاردىڭ سانى جىل سايىن ءوسىپ كەلە جاتقانى قۋانتادى. 2018 جىلى جاس جۋرناليستەرگە ارنالعان فورۋم قازاقستاننىڭ 4 وبلىسىندا ءوتتى. 2019 جىلى ايماقتىق فورۋمعا ەلىمىزدىڭ 7 ايماعىنان 1000-نان استام جاس قاتىستى. 2 ايلىق ونلاين-جوبانىڭ سوڭىندا ءبىز قاتىسۋشىلارمەن بايلانىسىمىزدى ۇزبەيمىز, ولاردى باقىلاپ, تالىمگەرلىك كومەك كورسەتەمىز جانە جاس جۋرناليستەر مەن بلوگەرلەرگە ارنالعان ونلاين مەديا قوعامداستىقتىڭ ودان ءارى دامۋى ءۇشىن جوبا قاتىسۋشىلارىن كوممۋنيكاتسيالىق الاڭعا بىرىكتىرەمىز», دەدى قازاقستان جاستار كونگرەسىنىڭ اتقارۋشى ديرەكتورى توقتار بولىسوۆ.
ۇيىمداستىرۋشىلار Jas Qalam بىرىڭعاي ءبىلىم بەرۋ پلاتفورماسىن قۇرۋدى باستاپ كەتتى. ونى 2020 جىلدىڭ جەلتوقسانىندا, جوبانىڭ سوڭىندا ىسكە قوسۋ جوسپارلانىپ وتىر.