"جىل ۆولونتەرى" حالىقارالىق سىيلىعى بەرىلەدى

بايقاۋعا ۇمىتكەرلەر الەمنىڭ تۇكپىر-تۇكپىرىنەن قاتىسا الادى. ول ءۇشىن qazvolunteer.kz ينتەرنەت-پلاتفورماسىندا ءوتىنىم بەرىپ, ۆولونتەرلىك قىزمەتى تۋرالى دەرەكتەردى تولتىرۋ قاجەت.

"وتىنىمدەردى قابىلداۋ 2020 جىلعى 26 قازان ساعات 09.00-دەن باستالادى جانە 2020 جىلعى 15 قاراشا ساعات 09.00-گە دەيىن جالعاسادى. بايقاۋ ەكى كەزەڭدە وتەدى: ءبىرىنشى - qazvolunteer.kz ينتەرنەت-پلاتفورماسىندا اشىق ونلاين-داۋىس بەرۋ, ەكىنشى - ەڭ كوپ داۋىس جيناعان جانە ەكىنشى كەزەڭگە وتكەن قاتىسۋشىلاردى كونكۋرستىق كوميسسيا باعالايدى", - دەلىنگەن حابارلامادا.

ناتيجەسىندە كەلەسى نوميناتسيالاردىڭ ارقايسىسى بويىنشا ءۇش ۇمىتكەر جەڭىمپاز بولىپ تانىلادى:

- ۇزدىك ۆولونتەرلىك ۇيىم

- كورپوراتيۆتىك ۆولونتەرلىك كوشباسشىسى

- كوروناۆيرۋستىق ينفەكتسيامەن كۇرەسكە قاتىسقانى ءۇشىن

- تۇراقتى دامۋ ماقساتتارىنىڭ كوشباسشىلارى

- ۇزدىك الەۋمەتتىك كومەكشى

- توتەنشە جاعدايلاردى جويۋعا بەلسەندى قاتىسقانى ءۇشىن

- حابار-وشارسىز كەتكەن ادامداردى ىزدەۋگە بەلسەندى قاتىسقانى ءۇشىن

- قۇقىق بۇزۋشىلىق قۇرباندارىنا كومەك كورسەتۋگە بەلسەندى قاتىسقانى ءۇشىن

- دەنساۋلىق ساقتاۋدى دامىتۋعا بەلسەندى قاتىسقانى ءۇشىن

- سالاۋاتتى ءومىر سالتىن ناسيحاتتاۋعا بەلسەندى قاتىسقانى ءۇشىن

- ءبىلىمدى دارىپتەۋگە قوسقان ۇلەسى ءۇشىن

- قورشاعان ورتانى ساقتاۋعا جانە قورعاۋعا قوسقان ۇلەسى ءۇشىن

- بەيبىتشىلىكتى, دوستىق پەن كەلىسىمدى نىعايتۋعا قوسقان ۇلەسى ءۇشىن

- تاريحي-مادەني مۇرانى ساقتاۋعا جانە دامىتۋعا قوسقان ۇلەسى ءۇشىن

- زوولوگيالىق قورعاۋ ماسەلەلەرىن شەشۋگە قوسقان ۇلەسى ءۇشىن

- الەۋمەتتىك مىندەتتەردى شەشۋگە قوسقان ۇلەسى ءۇشىن.

"جىل ۆولونتەرى" حالىقارالىق سىيلىعىن بەرۋ قاعيدالارى قر اقپارات جانە قوعامدىق دامۋ مينيسترلىگىنىڭ ينتەرنەت-رەسۋرستارىندا ورنالاستىرىلعان. كونكۋرستىڭ تولىق شارتتارىمەن كەلەسى سىلتەمە بويىنشا تانىسۋعا بولادى.

ايتا كەتەيىك, حالىقارالىق سىيلىق الەۋمەتتىك جانە قوعامدىق پايدالى مىندەتتەردى شەشۋگە ۇلەس قوسقان ۆولونتەرلەر مەن ۆولونتەرلەر توبىن, وتاندىق جانە حالىقارالىق ۆولونتەرلىك ۇيىمداردى كوتەرمەلەۋگە باعىتتالعان.