بۇگىن سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسى ءوتتى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
وندا سەناتورلار "قازاقستان رەسپۋبليكاسىنىڭ ۇكىمەتى مەن بەلارۋس رەسپۋبليكاسىنىڭ ۇكىمەتى اراسىنداعى كوشى-قون سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى" زاڭ جوباسىن تالقىلادى.
وسى كەلىسىم مەملەكەتتەرگە ازاماتتاردىڭ كوشى-قونى, كوشى-قون زاڭناماسىن بۇزۋشىلىقتار جانە زاڭسىز كوشى-قون جولدارى, سونداي-اق, ەلدەردىڭ ءبىرىنىڭ اۋماعىندا بولۋ ءۇشىن نەگىزدەر بار تۇلعالاردىڭ قۇقىقتىق مارتەبەسى تۋرالى اقپاراتتار الماسۋعا مۇمكىندىك بەرەدى.
"رەسمي ستاتيستيكاعا سۇيەنسەك, 2019 جىلى قازاقستانعا 32 مىڭعا جۋىق بەلارۋس ازاماتى كىرگەن. ونىڭ ىشىندە 76-سى اكىمشىلىك جاۋاپكەرشىلىككە تارتىلعان. بۇگىن قارالىپ وتىرعان كەلىسىمنىڭ ماڭىزى زور. بۇل قۇجاتتا اقپاراتتار مەن مالىمەتتەر الماسۋ تۇرلەرى, ازاماتتاردىڭ ساناتتارى جانە ىنتىماقتاستىقتى نىعايتۋ نىساندارى مەن نەگىزگى باعىتتارى ناقتى كورسەتىلگەن. ەكى ەلدىڭ كوشى-قون ماسەلەلەرىندە ءوزارا اركەتتەسەتىن قۇزىرەتتى ورگاندارى دا انىقتالعان. قازاقستاندا ول – ىشكى ىستەر مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگى", – دەدى سەناتور رىسقالي ابدىكەروۆ.
كەلىسىم ەكى مەملەكەتتىڭ زاڭدارىنا جانە حالىقارالىق مىندەتتەمەلەرىنە سايكەس بەلارۋس اۋماعىنداعى قازاقستان ازاماتتارىنىڭ قۇقىقتارىن قورعاۋدىڭ تيىمدىلىگىن ارتتىرۋعا ىقپال ەتەدى.