الماتى وبلىسىندا جالپى پاندەميامەن كۇرەسكە جەرگىلىكتى بيۋدجەتتەن 13 ملرد تەڭگە ءبولىندى, ونىڭ 8,1 ملرد تەڭگەسى ەكىنشى تولقىنعا دايىندىق ءۇشىن بولىنگەن. وبلىستىڭ مەديتسينا مەكەمەلەرىندە جەكە قورعانۋ قۇرالدارىنىڭ ءۇش ايلىق قورى, دارىلىك زاتتاردىڭ ەكى ايلىق قورى بار, - دەپ حابارلايدى الماتى وبلىسى اكىمىنىڭ ءباسپاسوز قىزمەتى.
وبلىستىق دەنساۋلىق ساقتاۋ باسقارماسىنىڭ مالىمەتىنشە, وڭىردەگى دەنساۋلىق ساقتاۋ مەكەمەلەرىندە جەكە قورعانۋ قۇرالدارىنىڭ ءۇش ايلىق قورى, اتاپ ايتقاندا 6,2 ملن بەتپەردە, 2,5 ملن قولعاپ, 74,6 مىڭ ءبىر رەت قولدانىلاتىن قورعانىش كوستيۋمدەرىنىڭ جيىنتىعى بار. ال دارىلىك زاتتاردىڭ ەكى ايلىق قورى قالىپتاستىرىلعان, ناقتىلاپ ايتساق, ستاتسيونارلاردا 1,4 ملرد تەڭگەگە 204 ءتۇرلى ءدارى, امبۋلاتوريالاردا 101 ملن تەڭگەگە 5 ءتۇرلى ءدارى قورى بار.
تۇراقتاندىرۋ قورىنا قوسىمشا 800 ملن تەڭگە ءبولىنىپ, قارجى كولەمى 1,3 ملرد تەڭگەنى قۇرادى. 500 ملن تەڭگەگە دارىلىك زاتتاردىڭ 30 ءتۇرىن ساتىپ الۋعا "INKAR" جشس بىرىڭعاي ديسترەبيۋتەرىمەن كەلىسىم شارت جاسالعان. سونداي-اق, "سك فارماتسيا" ارقىلى ءدارىحانالار ءۇشىن 33 ءتۇرلى دارىگە 63 ملن تەڭگەگە ءوتىنىم بەرىلدى, 1 ملن بەتپەردە ساتىپ الىندى. بۇل رەتتە حالىقتىڭ الەۋمەتتىك وسال توپتارى دا نازاردان تىس قالعان جوق. ولار ءۇشىن جەرگىلىكتى بيۋدجەت ەسەبىنەن 92 ملن.تەڭگەگە ۆيرۋسقا قارسى پرەپاراتتاردىڭ 4 ءتۇرى ساتىپ الىندى.
وبلىستا جەكە قورعانۋ قۇرالدارى ءوندىرىسى جولعا قويىلعان. "دولچە", "سپ "ابدي يبراحيم گلوبال فارم", "كەلۋن-كازفارم" كومپانيالارى - وسى سالاداعى ءىرى كاسىپورىندار. ماسكا تىگۋگە 5 تىگىن كاسىپورنى بەيىمدەلدى, تالدىقورعان قالاسىندا ماسكا تىگەتىن ءۇش قاباتتى تسەح جۇمىس ىستەيدى. جالپى تاۋلىگىنە بارلىعى 250 مىڭنان استام بەتپەردە شىعارىلادى. وبلىس ءدارىحانالارىندا ساتىلاتىن ماسكانىڭ بولشەك ساۋداداعى ورتاشا باعاسى 40 تەڭگەنى قۇراپ وتىر.