قوستانايلىق ەرىكتى جاستار توبىل وزەنىن بويلاي وسكەن قالىڭ اعاشتىڭ ءبىر بۇرىشىن قازاقتىڭ ايبىندى باتىرى, قاھارمان جازۋشى باۋىرجان مومىش ۇلى اتىنداعى ساياباققا اينالدىرماق. قازىر بۇل جەردە بۇرىننان ءوسىپ تۇرعان كارى اعاشتار ءشىري باستاعان سوڭ كەسىلىپ, وزەن جاعالاۋىن اباتتاندىرۋ جۇمىستارى ءجۇرىپ جاتىر. ەرىكتىلەر اشىق قالعان الاڭعا اتى اڭىزعا اينالعان باتىردىڭ 110 جىلدىعىنا ارناپ جاس قايىڭ كوشەتتەرىن وتىرعىزۋ تۋرالى ۇسىنىس تاستاعان ەكەن, جاستاردىڭ بۇل باستاماسى قالا اكىمدىگىنىڭ دە كوڭىلىنەن شىعىپ, قولداۋ تاۋىپ وتىر, دەپ حابارلايدى Egemen.kz.
وتكەن سەنبىدە باس قوس قوسقان جاستار باتىر اتالارىنىڭ 110 جىلدىق مەرەيتويىنا ارنالعان اعاش كوشەتىن وتىرعىزدى. شاراعا وبلىس اكىمىنىڭ ورىنباسارى باقىت ەسىموۆا مەن جاستار ساياساتى باسقارماسىنىڭ باسشىسى مارات جۇرقاباەۆ قاتىستى.
"باۋىرجان مومىش ۇلى سياقتى باتىر اتامىزدىڭ ەرلىككە تولى عۇمىرىن ۇلگى-ونەگە ەتكەن بۇگىنگى جاستارىمىزدىڭ جاقسى باستاماسى ءبىزدى دە قۋانتىپ وتىر. بۇگىن بۇل الاڭقايعا 110 قايىڭ كوشەتى وتىرعىزىلادى. ەرىكتى جاستار كوشەتتەردى ۋاقتىلى سۋارىپ, كۇتىم جاساپ تۇرۋدى دا ءوز مىندەتتەرىنە الىپ وتىر. الداعى ۋاقىتتا بۇل ماڭ قالا تۇرعىندارى مەن جاستار سەرۋەن قۇراتىن جايقالعان ساياباققا, تازا اۋا اياسىنداعى دەمالىس ورنىنا اينالادى", - دەدى باقىت ەسىموۆا.
جاستار ساياساتى باسقارماسىنىڭ تاپسىرىسىمەن قولعا الىنعان يگى باستامانى "جاس Star" قوعامدىق بىرلەستىگى جۇزەگە اسىرىپ وتىر. ۇيىمداستىرۋشىلاردىڭ ايتۋىنشا, بۇگىنگى شارا قوستاناي وبلىسىنىڭ اۋماعىندا بيىل جەڭىستىڭ 75 جىلدىعىنا وراي ىسكە اسىرىلىپ جاتقان "سوعىس جاڭعىرىعى" اتتى اۋقىمدى جوبانىڭ ءبىر تارماعى عانا.
"جوبا باستالعالى بەرى كوپتەگەن شارالار وتكىزدىك. اتاپ ايتار بولساق, قوستاناي قالاسى بويىنشا جەڭىستىڭ 75 جىلدىعىنا ارنالعان كۆەست تۋر ۇيىمداستىردىق. جاستار مەن تاريحشىلاردى قاتىستىرا وتىرىپ, جەڭىس ساياباعىنداعى "داڭق" مەموريالىنان باستاپ, وبلىس اۋماعىنداعى كەڭەس وداعىنىڭ باتىرلارىنا قويىلعان ەسكەرتكىشتەردى ارالاپ, وتان سوعىسىندا ەرلىكپەن قازا تاپقان جەرلەستەرىمىزدىڭ ەرلىگىن باياندايتىن تاعىلىمدى دارىستەر وتكىزدىك. سونىمەن قاتار, بيىل جەڭىس كۇنى قارساڭىندا قالالىق قورىمدا جەرلەنگەن سوعىس ارداگەرلەرىنىڭ بەيىتتەرىن قورشاپ, تازالاپ, اۋداندار مەن قالالاردا مايدانگەرلەرگە قويىلعان ەسكەرتكىشتەردىڭ اينالاسىن اباتتاندىردىق", - دەدى "جاس Star" قوعامدىق بىرلەستىگىنىڭ توراعاسى اباي دۇيسەكوۆ.
جاستار ساياساتى باسقارماسىنىڭ باسشىسى مارات جۇرقاباەۆتىڭ ايتۋىنشا, وتان سوعىسىندا ءىز-ءتۇزسىز كەتكەن مايدانگەرلەردى ىزدەستىرۋگە ۇيتقى بولىپ جۇرگەن "اتامنىڭ اماناتى" رەسپۋبليكالىق قورى قولعا العان ىزدەۋ شارالارىنا قوستاناي وبلىسىنىڭ جاستارى دا بەلسەندى ات سالىسىپ وتىر.
رەسپۋبليكالىق قور قوستاناي وبلىسىنان سوعىسقا اتتانىپ, مايداندا جوعالىپ كەتكەن 5 ادامنىڭ قۇجاتتارىن ىزدەستىرىپ, ولاردىڭ قايدا سوعىسقانى, قايدا جەرلەنگەنى تۋرالى مالىمەت تاپقان. سونى بىزگە جولداپ وتىر. ەندى الداعى جەتىدە سول اقپاراتتاردى مايدانگەرلەردىڭ تۋىس-تۋعاندارىنا تاپسىرايىق دەپ وتىرمىز. مۇنىڭ دا ءبىر ۇلكەن ءىس-شارا بولاتىنىن اتاپ ءوتۋ كەرەك. ءبىز تەك قانا بۇگىنگىدەي اعاش وتىرعىزۋمەن عانا شەكتەلىپ قالعان جوقپىز. بيىل ا.بايتۇرسىن ۇلى اتىنداعى قوستاناي ۋنيۆەرسيتەتىنىڭ تاريحشى-عالىمدارىمەن بىرلەسىپ, وسى وڭىردەن سوعىسقا اتتانعان مايدانگەرلەر تۋرالى كوپتەگەن دەرەكتىك ماتەريالدار جيناعانبىز. بۇل ماتەريالداردىڭ جاستارعا بەرەتىن ءتالىم-تاربيەسى مول. سوندىقتان جىلدىڭ سوڭىنا دەيىن تىڭ دەرەكتەردى جۇيەلەپ, جەكە كىتاپ ەتىپ شىعارماقپىز.
وكىنىشكە قاراي ەرىكتى جاستار جوسپارلاعان ءبىراز شارۋا پاندەمياعا بايلانىستى جۇزەگە اسىرىلماي قالعان. جىل باسىندا جاستار ساياساتى باسقارماسىنىڭ مۇرىندىق بولۋىمەن قوستانايدا جاساقتالعان 151-اتقىشتار ديۆيزياسىنىڭ جاۋىنگەرلەرى سوعىسقان رەسەيدىڭ بۇرىنعى ستالينگراد قالاسىنىڭ ماڭىنا, قازىرگى ۆولگوگراد وبلىسىنا ارنايى ىزدەستىرۋ توبىن جىبەرىپ, قازبا جۇرگىزىپ, جەرلەستەرىمىز قازا تاپقان مايدان دالاسىن زەرتتەۋ جۇمىستارى جوسپارلانعان.
"مەملەكەت باسشىسى قاسىم-جومارت توقاەۆ بىلتىر قوستاناي وبلىسىنا جۇمىس ساپارىمەن كەلگەندە قازاقستان-رەسەي ەرىكتى جاستارىنىڭ فورۋمىنا قاتىستى. سول فورۋمدا پرەزيدەنت 2020 جىلدى جاستار جىلى دەپ جاريالاعانى بەلگىلى. ءبىز سول ءىس-شارا بارىسىندا رەسەي فەدەراتسياسىنان كەلگەن قوعامدىق بىرلەستىكتەرمەن بىرقاتار مەموراندۋمدارعا قول قويدىق. سونىڭ ىشىندە وسى ىزدەستىرۋ جاساعىن قۇرۋ تۋرالى جوسپار دا بار ەدى. وكىنىشكە وراي, بيىل شەكارا جابىق, شىعا الماي قالدى. رەسەيلىك ەرىكتىلەر ءبىزدى كۇتىپ وتىر. ولارمەن حابارلاسىپ, بۇل شارانىڭ كەيىنگە قالدىرىلاتىنىن جەتكىزدىك", - دەدى اباي دۇيسەكوۆ.
قايىڭ كوشەتتەرىن وبلىس ورتالىعىندا ورنالاسقان بىرنەشە جوو-نى مەن كوللەدج ستۋدەنتتەرى, سونداي-اق قوستاناي اۋدانىنان ارنايى كەلگەن بەلسەندى جاستار وتىرعىزدى. بۇل جەردى سايالى باققا اينالدىرۋ ءۇشىن ءالى دە بولسا كوپ ەڭبەك ەتىپ, كوشەتتەر قاتارىن كوبەيتە ءتۇسۋ كەرەك. ال اباتتاندىرۋ جۇمىستارى اياقتالىپ, جاس قايىڭ اعاشتارى جايقالىپ وسە باستاعاندا, جاستار بىرلەستىكتەرى قالا باسشىلىعىنا اسەم توبىل جاعالاۋىنداعى جاڭا ساياباققا باۋىرجان مومىش ۇلىنىڭ ەسىمىن بەرۋ تۋرالى ۇسىنىس جاساۋدى ۇيعارىپ وتىر.
قوستاناي وبلىسى