الماتى وبلىسى جامبىل اۋدانىندا مۇگەدەكتەر ءۇشىن شاقىرۋ قوڭىراۋى, پاندۋس, برايل شريفتىندە جازىلعان تاقتالار, وزىنە-ءوزى قىزمەت كورسەتۋگە ارنالعان بۇرىش, ياعني بارلىق مۇمكىندىكتەر قاراستىرىلعان سەرۆيستىك اكىمدىك اشىلدى. بۇل — الماتى وبلىسىندا اشىلعان 15-ءشى سەرۆيستىك اكىمدىك, - دەپ حابارلايدى Egemen.kz الماتى وبلىسى اكىمىنىڭ ءباسپاسوز قىزمەتىنە سىلتەمە جاساپ.
مەملەكەت باسشىسى قاسىم-جومارت توقاەۆتىڭ "حالىق ۇنىنە قۇلاق اساتىن مەملەكەت" تۇجىرىمداماسىن ىسكە اسىرۋ ماقساتىندا قولعا الىنعان كەڭسەنىڭ اشىلۋىنا الماتى وبلىسى بويىنشا سىبايلاس جەمقورلىققا قارسى قىزمەت دەپارتامەنتى باسشىسىنىڭ ءبىرىنشى ورىنباسارى جاندوس جۇماباەۆ, قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ الماتى وبلىسى بويىنشا دەپارتامەنتى باسشىسىنىڭ ورىنباسارى قوبىلان ماناپوۆ جانە اۋدان اكىمى باعدات اليەۆ قاتىستى.
اۋدان اكىمى باعدات اليەۆتىڭ ايتۋىنشا, بۇل عيماراتتا مەملەكەتتىك مەكەمەلەردىڭ 13 مامانى تۇرعىندارعا 36 ءتۇرلى مەملەكەتتىك قىزمەت كورسەتەدى. سونىمەن قاتار بۇل كەڭسەدە "جەتىسۋ ادالدىق الاڭى" جوباسىمەن جابدىقتالعان ازاماتتاردى قابىلداۋ كابينەتى ورنالاسقان. مۇندا اۋدان اكىمى, ونىڭ ورىنباسارلارى, مەكەمە باسشىلارى تۇرعىنداردى جەكە ماسەلەلەرى بويىنشا قابىلداۋ جۇرگىزەدى.
سەرۆيستىك اكىمدىكتە بارلىق قولايلى جاعدايلار جاسالعان. كۇتۋ زالىندا ىڭعايلى ورىندىقتار, كونديتسينەر, سۋعا ارنالعان ديسپەنسەر مەن اقپاراتتىق تەلەديدار ورناتىلعان. وزىنە-ءوزى قىزمەت كورسەتۋگە ارنالعان بۇرىش ۇيىمداستىرىلعان. مۇگەدەكتەر ءۇشىن شاقىرۋ قوڭىراۋى, پاندۋس, كيىم شەشەتىن بولمە, برايل شريفتىندە جازىلعان تاقتالار دا بار.