سەناتورلار زەينەتاقى جيناقتارىنىڭ پايدالانۋ تەتىكتەرىن قارادى

پرەزيدەنت قاسىم-جومارت توقاەۆ قازاقستان حالقىنا جولداۋىندا ۇكىمەتكە ۇلتتىق بانكپەن بىرلەسە وتىرىپ, اعىمداعى جىلدىڭ سوڭىنا دەيىن زەينەتاقى جيناقتارىنىڭ ءبىر بولىگىن سالىمشىلاردىڭ پايدالانۋى مەن ولاردى دەربەس باسقارۋ تەتىگىن ەنگىزۋ جونىندەگى بارلىق قاجەتتى نورماتيۆتىك-قۇقىقتىق اكتىلەردى قابىلداۋ جانە دايىندىق جۇمىستارىن جۇرگىزۋدى تاپسىرعان بولاتىن.

سەناتتىڭ قارجى جانە بيۋدجەت كوميتەتىنىڭ توراعاسى ولگا پەرەپەچينانىڭ ايتۋىنشا, بۇل ماسەلە اسىرەسە پاندەميادان ءوتىپ, ەل ەكونوميكاسى باياۋلاعان كەزدە اسا ماڭىزدى ءارى وتكىر بولىپ وتىر.

دەپۋتاتتار بۇل جاڭالىقتار وتاندىق ەكونوميكاعا, ونىڭ ىشىندە ينفلياتسياعا قالاي اسەر ەتەتىنى, زەينەتاقى جيناقتارىن ماقساتسىز پايدالانۋ نەمەسە شەتەلگە اكەتۋ قاۋپى قانداي ەكەندىگىنە دە نازار اۋداردى. زەينەتاقى جيناقتارىنىڭ ءبىر بولىگىن تۇرعىن ءۇي جاعدايلارىن جاقسارتۋعا, ەمدەلۋگە اقى تولەۋگە, جەكە باسقارۋشى كومپانيالارعا بەرۋگە ارنالعان شارتتارعا قاتىستى كوپتەگەن سۇراقتار قويىلدى. دەپۋتاتتاردى ازاماتتاردى زەينەتاقىمەن قامتاماسىز ەتۋ جونىندەگى كەپىلدىكتەردى ساقتاۋ ماسەلەسىنە جانە وسى سالاداعى حالىقارالىق تاجىريبە ەرەكشە قىزىقتىرعانى بەلگىلى بولدى.

"مەنىڭ ويىمشا, ءبىزدىڭ ازاماتتارىمىزدىڭ زەينەتاقى جيناقتارىنىڭ ءبىر بولىگىن پايدالانۋ ماسەلەلەرىندەگى ساۋاتتىلىعىن ارتتىرۋ – ماڭىزدى ماسەلە. ازاماتتارىمىز الاياقتىق سحەمالارعا تارتىلىپ كەتپەسى ءۇشىن ءبىز قازىر زەينەتاقى اكتيۆتەرىن سەنىمگەرلىك باسقارۋعا بەرۋدى قارايتىن بولامىز. سوندىقتان بۇل ماسەلە مۇقيات پىسىقتالۋى كەرەك. ءبىزدىڭ ازاماتتار وزدەرىنىڭ جيناقتارىن كىمگە بەرەتىنىن جانە ونىڭ بولاشاقتاعى قاۋپى قانداي ەكەنىن ءتۇسىنۋى ءتيىس", دەدى دەپۋتات نۇرلان قىلىشباەۆ.

زەينەتاقى جيناقتارىنىڭ ءبىر بولىگىن سالىمشىلاردىڭ ءوز بەتىنشە پايدالانۋى نەمەسە جەكە قارجى كومپانيالارىنىڭ باسقارۋىنا بەرۋ تەتىگىنىڭ زاڭنامالىق بازاسىن ازىرلەۋگە قاتىسقان مەملەكەتتىك ورگانداردىڭ وكىلدەرى سالىمشىلاردىڭ ءوز زەينەتاقى جيناقتارىن پايدالانا الاتىن شارتتار مەن ماقساتتارىن ەگجەي-تەگجەيلى سيپاتتاپ بەردى.

زەينەتاقى جيناقتارىنىڭ ءبىر بولىگىن سالىمشىلاردىڭ پايدالانۋ تەتىكتەرىن ازىرلەۋشىلەر ازىرلەنگەن تاسىلدەر تۇرعىن ءۇي ماسەلەلەرىن شەشۋگە جانە ازاماتتاردىڭ دەنساۋلىعىن جاقسارتۋعا, فورمالدى جۇمىسپەن قامتۋدى ىنتالاندىرۋعا, مەديتسينالىق قىمبات قىزمەتتەردىڭ جەكەلەگەن تۇرلەرىنە قولجەتىمدىلىكتى قامتاماسىز ەتۋگە, حالىقتىڭ سەنىمى مەن جيناقتاۋشى زەينەتاقى جۇيەسىنىڭ تارتىمدىلىعىن ارتتىرۋعا ىقپال ەتەدى دەپ سانايدى.

تالقىلاۋ ناتيجەسىندە كەزدەسۋگە قاتىسۋشىلار ازاماتتارعا قىزمەت كورسەتۋدىڭ قولجەتىمدىلىگى مەن جەدەلدىگىن ارتتىرۋ جونىندە ۋاكىلەتتى مەملەكەتتىك ورگاندارعا ۇسىنىمدار ازىرلەدى. سونداي-اق, زەينەتاقى جۇيەسى سۋبەكتىلەرى اراسىندا بارىنشا قاعازسىز قۇجات اينالىمىن, قىزمەتتەردى تسيفرلاندىرۋدى, دەرەكتەرمەن ەلەكتروندىق الماسۋدى قامتاماسىز ەتۋ بويىنشا جۇمىستى جالعاستىرۋ ۇسىنىلدى. ودان باسقا, ۇسىنىمدار ۋاكىلەتتى ينستيتۋتتاردى ايقىنداۋعا جانە زەينەتاقى جيناقتارىن جەكە قارجى كومپانيالارىنىڭ باسقارۋىنا بەرۋ تەتىگىنىڭ كەيبىر شارتتارى مەن تالاپتارىن جۇمسارتۋعا قاراي قايتا قاراۋعا قاتىستى بولدى.

وتىرىسقا ۋاكىلەتتى مەملەكەتتىك ورگانداردىڭ, قازاقستان قارجىگەرلەرى قاۋىمداستىعىنىڭ جانە بجزق وكىلدەرى قاتىستى.