كارانتين رەجيمىنە قاراماستان وبلىس ورتالىعىندا قۇرىلىس جۇمىستارى توقتاعان جوق. اتقارىلىپ جاتقان جۇمىستاردى ءوز كوزىمەن كورىپ شىققان وبلىس باسشىسى ومىرزاق شوكەەۆ ەڭ الدىمەن تۇرعىن ۇيلەردىڭ ساپاسىنا ءمان بەردى. قۇرىلىستى دەر كەزىندە اياقتاۋدى مىندەتتەدى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
تۇركىستان قالاسىنىڭ اكىمشىلىك-ىسكەرلىك ورتالىعىنداعى 3 مىڭعا جۋىق پاتەرلى 7 قاباتتى 24 تۇرعىن ءۇيدىڭ 22-ءىڭ قۇرىلىسىن اياقتاۋى قاراشا ايىنا جوسپارلانعان. بۇعان قوسا, 12 قاباتتى 45 تۇرعىن ءۇيدىڭ قابىرعاسى كوتەرىلۋدە. بۇل ۇيلەردى پايدالانۋعا بەرۋ 2021 جىلعا جوسپارلانعان. تۇركىستاندىقتاردى باسپانامەن قامتاماسىز ەتۋ ءۇشىن يپوتەكالىق تۇرعىن ۇيلەردىڭ قاتارى ارتپاق.
قۇرىلىسى قارقىن العان الەمدە تەڭدەسى جوق «كەرۋەن ساراي» تۋريستىك كەشەنىندە شىعىس بازارى, ەتنيكالىق ۇلگىدەگى مەيرامحانالار مەن قوناق ۇيلەر سالىنۋدا. كوپسالالى سارايدا كونە شىعىس تەاترى, ۇلتتىق ءدامحانالار, جاساندى كولدەر, ساياباقتار سالۋ جوسپاردا. شەبەرلەر كوشەسىندە كادەسىيلار ساتاتىن شەبەرحانالار ساپ تۇزەيدى.
تۇركىستان قالاسىنىڭ ورتالىعىنداعى «جەلىلىك ساياباق», «اتتراكتسيوندار ساياباعى», «وقۋشىلار سارايى», «كونگرەسس ورتالىعى», «جابىق باسسەينى بار سپورت سارايى», «ورتالىق ستاديون» جانە «ق.ا.ياساۋي مۇراجايى», «دراماتەاتر» عيماراتتارى بيىل ەل يگىلىگىنە بەرىلەتىن بولادى. بۇدان وزگە, وبلىس ورتالىعىنداعى رۋحاني-مادەني ورتالىقتى اباتتاندىرۋ ماقساتىندا ءىرى جوبالار قولعا الىنىپ, قۇرىلىس جۇمىستارى جۇرگىزىلۋدە.