بيىل 12 قازاننان باستاپ وكم وپەراتورى يندۋستريا جانە ينفراقۇرىلىمدىق دامۋ, ەكولوگيا, گەولوگيا جانە تابيعي رەسۋرستار مينيسترلىكتەرىنىڭ كەلىسىمىمەن ەسكى كولىكتەردى قايتا وڭدەۋگە قابىلداۋ باعدارلاماسىنا وزگەرىس ەنگىزدى. بۇدان بىلاي توزىعى جەتكەن جۇك جانە جولاۋشىلار كولىگىن تاپسىراتىندارعا دا اقشالاي وتەماقى بەرىلەدى.
بەرىلەتىن اقشا تاپسىرىلاتىن كولىكتەردىڭ ساناتىنا بايلانىستى ايلىق ەسەپتىك كورسەتكىش (اەك) بويىنشا باعالانادى. ايتالىق, م2, N1 (سالماعى 1,3 توننادان كەم كولىك قۇرالىن قوسپاعاندا) جانە N2 ساناتىنداعى كولىك قۇرالدارىنا 144 اەك (400 032 تەڭگە) بەرىلەدى. وسى ساناتتاعى تولىق ەمەس جيىنتىقتاعى كولىكتەرگە 126 اەك (350 028 تەڭگە) تولەنەدى. اۋىر سالماقتاعى جۇك كولىكتەرى (م3, N3 ساناتى) 600 مىڭ تەڭگەدەن (216 اەك) 550 مىڭ تەڭگەگە (198 اەك) دەيىن باعالانادى.
كولىك تاپسىرعاندارعا 2 كۇن ىشىندە بانكتاعى شوتىنا اقشا اۋدارىلادى. ايتا كەتۋ كەرەك, كولىكتى جەڭىلدىك سەرتيفيكاتىنا الماستىرۋ باعدارلاماسى ۋاقىتشا توقتاتىلادى.
ەسكە سالا كەتەلىك, ىستەن شىققان كولىك قۇرالدارىن قايتا وڭدەۋگە قابىلداۋ باعدارلاماسى ىسكە قوسىلعاننان بەرى قازاقستان بويىنشا 150 مىڭعا جۋىق كولىك جويۋعا تاپسىرىلدى. ونىڭ ىشىندە 2 596 دانا ورتاشا توننالىق تەحنيكا, 600-گە جۋىق اۋىر سالماقتاعى كولىك قۇرالى بار. قابىلدانعان بارلىق ماشينا قاراعاندىداعى ەسكى كولىكتەردى قايتا وڭدەيتىن زاۋىتقا جىبەرىلەدى.