قازىر رەسەي فەدەراتسياسىندا COVID-19-عا شالدىعۋ قارقىنى الاڭداتارلىقتاي كۇيدە.
سول سەبەپتى فەدەراتسيا قۇرامىنداعى بارلىق وبلىستاردىڭ ۇكىمەتتەرى شەكتەۋ شارالارىن قاتاڭداتىپ جاتىر. وقۋ ورىندارى قاشىقتان ءبىلىم بەرىپ, كوپشىلىك جينالاتىن ورىندارعا بارۋدى ازايتىپ, قوعامدىق كولىكتەردە بارىنشا ساقتىق شارالارىن ۇستانۋ ەسكەرتىلگەنىمەن, جاعدايدىڭ وڭالاتىن ءتۇرى كورىنبەيدى. ءتىپتى قوعامدىق كولىكتەردە ماسكا مەن قولعاپ كيمەگەنى ءۇشىن ايىپپۇل تولەتۋ دە ادامداردىڭ بەيجايلىعىنا توقتاۋ بولا الماي تۇر. بارلىق سالاعا تىرناعىن باتىرعان ىندەتپەن كۇرەستە قوسىمشا اۋرۋحانالار سالىنىپ, كوپتەگەن ەمدەۋ ورىندارى قايتا جابدىقتالىپ جاتىر. ماسەلەن, سانكت-پەتەربۋرگتەگى ىندەتپەن كۇرەسكە بەيىمدەگەن, ارداگەرلەرگە ارنالعان اۋرۋحاناعا ءبىر كۇندە 40 پاتسيەنت تۇسكەن.
رەسمي دەرەكتەر پاندەميانىڭ كۇزدەگى سوققىسىنىڭ تارالۋ ماسشتابى كوكتەمدەگىدەن سالماقتىراق, اۋىرلاۋ بولۋى مۇمكىن ەكەنىن ايتادى.
* * *
ءۇندىستاندا 24 ساعاتتىڭ ىشىندە 55 مىڭ ادامنىڭ ۆيرۋس جۇقتىرعانى انىقتالعان. بۇل تۋرالى ەلدىڭ دەنساۋلىق ساقتاۋ مينيسترلىگى حاباردار ەتتى.
ەگەر ناقتىلاي تۇسەتىن بولساق, ءبىر تاۋلىكتە 55 342 ۇندىستاندىق اۋرۋ جۇقتىرىپ, بارلىعى 7 175 880 ازامات COVID-19 ۆيرۋسىنىڭ زاردابىن تارتۋشىلاردىڭ قاتارىندا تۇر.
ەلدە كەشە 706 پاتسيەنتتىڭ تىنىس-تىرشىلىگى توقتاپ, پاندەميادان كوز جۇمعانداردىڭ سانى 109 856 ادامعا جەتىپتى. ال الدىڭعى كۇنى كۆي جۇقتىرعانداردىڭ 66 732 ادام بولعانىن ەسەپكە العاندا, كەشەگى 55 مىڭعا شۇكىر ايتۋعا دا كەلەتىندەي.
* * *
يران دەنساۋلىق ساقتاۋ مينيسترلىگىنىڭ ءباسپاسوز حاتشىسى سيما سادات لاري 12 قازاندا ءبىر كۇندە 272 ازاماتتىڭ COVID-19-دان قايتىس بولعانىن جازدى.
ءباسپاسوز حاتشىسى ىندەت كەسىرىنەن 28 816 ادامنىڭ كوز جۇمعانىن ايتا كەلە, تاۋلىك ىشىندە ۆيرۋس جۇقتىرۋ كورسەتكىشىنىڭ ازايماي تۇرعانىنا قىنجىلعان. «504 281 يراندىققا جۇققان ۆيرۋستان 409 121 پاتسيەنت جازىلىپ شىقسا, 4 533 جاننىڭ جاعدايى كۇردەلى كۇيدە, قارقىندى ەم الۋ بولىمدەرىندە جاتىر», دەدى سيما سادات لاري.
* * *
ىندەتتەن جازىلعان اقش ازاماتى ءبىر جارىم ايدان سوڭ COVID-19-عا قايتا شالدىقتى.
«نەبارى ءبىر جارىم ايدان سوڭ ۆيرۋستى قايتا جۇقتىرۋ ينفەكتسيادان ادامدى ساقتاپ قالا المايتىنىن كورسەتەدى. COVID-19 ۆيرۋسىنىڭ ءبىز بىلمەيتىن جىقپىلدارى كوپ جانە اعزا مەن ونىڭ قورعانىش جۇيەسىنىڭ قالاي جاۋاپ بەرەتىنىنىڭ دە قۇپياسى مول», دەيدى پروفەسسور مارك پاندوري. عالىم ينفەكتسيادان جازىلىپ شىققان جانداردىڭ ءبىر اۋىردىم, ەندى ماعان سوقپايدى دەپ بەيعام جۇرە بەرمەۋىنە ءمان بەرىپ, ونىڭ ساقتانۋدى, قاشىقتىق ۇستاۋدى تالاپ ەتەتىن اۋرۋ ەكەنىن ايتقان.
BNO News كەلتىرگەن اقپاراتقا سەنسەك, بۇل – الەم بويىنشا COVID-19-دىڭ 2-ءشى رەت قايتا جۇعۋى. 20 پاتسيەنت ودان جازىلىپ شىعىپ, بىرەۋى كوز جۇمىپ, ەندى ەكەۋى ەمدەلىپ جاتىر.
* * *
سلوۆەنيادا ەپيدەميا دەس بەرەر ەمەس. سلوۆەنيا ۇكىمەتىنىڭ ءباسپاسوز حاتشىسى ەلكو كاتسين ەلدەگى ەپيدەميالىق جاعدايدىڭ ناشارلاپ بارا جاتقانىنا الاڭداۋشىلىق بىلدىرگەن.
ەلكو كاتسين الەۋمەتتىك جەلىلەردە شىنايى حابار تاراتىپ, COVID-19 جايلى حالىققا دۇرىس اقپارات بەرىپ جۇرگەن باق پەن جۋرناليستەرگە العىسىن جەتكىزدى.
بۇگىندە سلوۆەنيا اۋرۋحانالارىندا 172 پاتسيەنت جاتىر, ال ولاردىڭ 26-سى قارقىندى ەمدەيتىن ارنايى بولىمدەردە ءومىر ءۇشىن كۇرەسىپ باعۋدا. ىندەتتەن 169 سلوۆەنيالىقتىڭ ءدام-تۇزى تاۋسىلىپتى. ال ونىڭ بار-جوعى 2 ملن حالقى بار مەملەكەت ءۇشىن قانشالىقتى اۋىر ەكەنى ايتپاسا دا تۇسىنىكتى.
* * *
چەحيادا دەنساۋلىق ساقتاۋ ءمينيسترى رومان پرىمۋلا 6 ادامنان ارتىق جينالۋعا بولمايتىنى جايلى مالىمدەدى.
«بۇل تەك جابىق عيمارات ىشىندە عانا ەمەس, دالادا دا جينالۋعا شەكتەۋ قويىلدى دەگەن ءسوز», دەگەن رومان پرىمۋلا ەلدەگى بارلىق مەكتەپ جابىلىپ, ساباقتاردىڭ ونلاين جۇرەتىنىن, ال بالاباقشا جۇمىستارىنىڭ توقتامايتىنىن جەتكىزدى.
سونىمەن قاتار مينيستر ەلدە بارلىق قوعامدىق كولىك توقتايتىن ايالدامالاردا, پەرروندار مەن كۇتۋ زالدارىندا ماسكا تاعۋدى قاتاڭ ساقتاۋ قاجەتتىگىن ەسكەرتكەن. بۇل شارالار 14 قازاننان باستاپ كۇشىنە ەنىپ, قاراشانىڭ 1-نە دەيىن ساقتالادى.