پتر انىقتاماسى جوق 17 شەتەلدىك دەپورتاتسيالاندى. بۇل تۋرالى كولىكتەگى باس مەملەكەتتىك سانيتار دارىگەر سادۋاقاس بايعابىلوۆ تولىعىراق ايتىپ بەردى, دەپ حابارلايدى Egemen.kz
"وسى جىلدىڭ 6 قازانىنان بەرى سانيتارلىق-كارانتين پۋنكتتەرىنىڭ ەپيدەميولوگتەرى قازاقستانعا اۋە رەيستەرىمەن كەلگەن 17 شەتەلدىكتى, ونىڭ ىشىندە قازاقستاندا تۇرۋعا ىقتيارحاتى بار ادامدى دەپورتاتسيالادى. دەپورتاتسيالاۋعا جارامدىلىق مەرزىمى ءوتىپ كەتكەن پتر نەمەسە جەدەل تەست وتكەنى تۋرالى انىقتامالار سەبەپ بولدى. نۇر-سۇلتان قالاسىنىن اۋەجايىنان 8 شەتەل ازاماتى (رەسەيدىڭ 5, بەلارۋستىڭ 2 جانە تۇركيانىڭ 1 ازاماتى), ال الماتى قالاسى اۋەجايىنان 9 شەتەل ازاماتى (رەسەيدىڭ 4, ءباا-ءنىڭ 1, گەرمانيانىڭ 1, وزبەكستاننىڭ 1, تۇركيانىڭ 2 ازاماتى) دەپارتاتسيالانعان بولاتىن", دەدى سادۋاقاس بايعابىلوۆ.
س.بايعابىلوۆتىڭ ايتۋىنشا, دەپورتاتسيالانعانداردىڭ اراسىندا ترانزيتتىك اۋە جولاۋشىلارى دا بولعان. وسىعان وراي وتاندىق, شەتەلدىك اۋە كومپانيالارىنا جانە اۋەجايدىڭ مۇددەلى قىزمەتتەرىنە COVID-19-عا ارنالعان پتر انىقتاماسىز كەلگەن شەتەلدىك ازاماتتاردى دەپارتاتسيالاۋ ماسەلەلەرى بويىنشا قوسىمشا سەمينار-كەڭەستەر ءجيى وتكىزىلىپ تۇرادى.
ەسكە سالا كەتەيىك, جاڭا ەرەجەلەرگە سايكەس مىناداي شەكتەۋ شارالارى كۇشىنە ەنەدى: قازاقستانعا شەتەلدەن اۋە رەيسى ارقىلى كەلگەن ازاماتتاردىڭ ءبارى دە تەرمومەتريادان, انكەتالاۋدان ءوتىپ, پتر ءادىسى ارقىلى COVID-19 بويىنشا تەستتەن وتكەنى تۋرالى انىقتاما (72 ساعاتقا جارامدى) كورسەتۋى ءتيىس. قازاقستان ازاماتى سانالمايتىندار ادامدار قولىندا انىقتاما بولماعان جاعدايدا ەلگە كىرگىزىلمەيدى.