"كەنتاۋ ترانسفورماتور زاۋىتى" اق ءوندىرىس وشاعىندا ءبىر ۋاقىتتا 6 ادامنىڭ جۇمىسىن اتقارا الاتىن, جاپوندىق Yaskawa Motoman دانەكەرلەۋشى-روبوتى ىسكە قوسىلدى. ايتا كەتۋ كەرەك, روبوت دانەكەرلەۋ ساپاسىن ارتتىرۋعا جانە كاسىپورىننىڭ ونىمدىلىگىن جوعارىلاتۋعا ارنالعان. ءبىر دانەكەرلەۋشى ماماننىڭ 8 ساعاتتا اتقاراتىن جۇمىسىن روبوت 20 مينۋت ىشىندە ورىنداپ شىعادى, دەپ حابارلايدى Egemen.kz
Yaskawa Motoman روبوتى جاپونيادا ويلاپ تابىلعان. الايدا شۆەتسيادا قۇراستىرىلىپ, ۋكراينا مەملەكەتىندە ارنايى وندىرىسكە لايىقتى باعدارلاماسى ەنگىزىلگەن. روبوتپەن جۇمىس ىستەۋ ءۇشىن كەنتاۋداعى زاۋىتتان 3 مامان ۋكراينا مەملەكەتىنە بارىپ, ارنايى ءىس-تاجىريبەدەن ءوتىپ كەلگەن. بولاشاقتا زاۋىتتى تاعى دا وسىنداي روبوتتارمەن تولىقتىرۋ جوسپارلانۋدا. ايتا كەتەرلىگى, بۇل دانەكەرلەۋشى-روبوت قازاقستاندا ىسكە قوسىلعان ەڭ العاشقىسى بولىپ وتىر.
كەنتاۋ ترانسفورماتور زاۋىتى – ەلەكتر ەنەرگەتيكا, مەتاللۋرگيا, ماشينا جاساۋ, كولىك, مۇناي-گاز كەشەنىن جانە تۇرعىن ءۇي-كوممۋنالدىق سەكتورىن قوسا العاندا, ەكونوميكانىڭ بارلىق سالالارى ءۇشىن جەتكىزىلەتىن, كەڭ قولدانىسقا ارنالعان ترانسفورماتورلىق جابدىقتارىنىڭ جەتەكشى قازاقستاندىق ءوندىرۋشىسى. زاۋىت شىعاراتىن ونىمدەر حالىقارالىق ساپا جانە قاۋىپسىزدىك ستاندارتتارىنا سايكەس كەلەدى. وتكەن جىلدارى زاۋىت ونىمدەرىنىڭ ءتىزىمى 400-دەن استام اتاۋعا جەتتى. ترانسفورماتورلاردىڭ تەحنيكالىق پايدالانۋدىڭ ۇسىنىلاتىن مەرزىمى 25 جىلدى قۇرايدى, بىراق, ءىس جۇزىندە دۇرىس پايدالانۋ جانە ۋاقتىلى سەرۆيستىك قىزمەت كورسەتۋ كەزىندە ترانسفورماتورلار ۇزدىكسىز 40-50 جىل جۇمىس ىستەيدى.
زاۋىتتىڭ ءونىمى ۇلكەن سۇرانىسقا يە جانە رەسەي, قىرعىزستان, وزبەكستان, ارمەنيا, تاجىكستان ەلدەرىنە ەكسپورتتالادى. كاسىپورىن ساپالى ترانسفورماتورلاردى عانا ەمەس, ەنەرگيا ۇنەمدەيتىن ترانسفورماتورلاردى شىعارادى. جەتەكشى ەۋروپالىق ەلدەردىڭ جوعارى تەحنولوگيالىق جابدىقتارىن ەنگىزۋ, سونداي-اق زاماناۋي وقشاۋلاعىش ماتەريالداردى قولدانۋ ارقىلى ءوندىرىس وشاعىنىڭ ونىمدەرى ساپا, سەنىمدىلىك جانە نومەنكلاتۋرانىڭ ارتۇرلىلىگى بويىنشا شەتەلدىك ۇقساس تەحنيكالاردان ەداۋىر اسىپ ءتۇستى.
بۇگىندە كاسىپورىننىڭ نەگىزگى مىندەتتەرىنىڭ ءبىرى ەكسپورتتىق الەۋەتتى ارتتىرۋ بولىپ تابىلادى. ءوندىرىس وشاعى "نۇرلى جول" ينفراقۇرىلىمدى دامىتۋدىڭ مەملەكەتتىك باعدارلاماسى شەڭبەرىندە ونىمدەردىڭ ەكسپورتتىق الەۋەتىن ارتتىرۋعا "قازاقستاننىڭ دامۋ بانكى" اق تاراپىنان قوسىمشا قارجىلاندىرۋ الدى. قدب 6%-بەن 1,5 ملرد تەڭگە مولشەرىندە نەسيە ۇسىندى.
كەنتاۋ ترانسفورماتور زاۋىتى 1959 جىلدان باستاپ جۇمىس ىستەيدى جانە جابدىقتى جاڭارتۋ قاجەتتىلىگى تۋىندادى, "ونىمدىلىك 2020" مەملەكەتتىك باعدارلاماسى شەڭبەرىندە قدب-ليزينگ تاراپىنان ۇسىنىلعان قارجىلاندىرۋعا الەمنىڭ جەتەكشى وندىرۋشىلەرىنەن ترانسفورماتورلار ءوندىرۋ ءۇشىن مەتالل وڭدەۋ ستانوكتارى ساتىپ الىندى. اۆتوماتتاندىرىلعان باسقارۋ باعدارلامالىق جاساقتاماسىنا نەگىزدەلگەن بۇل جابدىق قول ەڭبەگىن جەڭىلدەتۋگە, ونىمدىلىكتى ارتتىرۋعا جانە ءونىمنىڭ وزىندىك قۇنىن تومەندەتۋگە مۇمكىندىك بەرەدى. مەملەكەت كاسىپكەرلەردى, اتاپ ايتقاندا, وسىنداي دامۋ ينستيتۋتتارى ارقىلى بارىنشا قولدايدى.
قازىر زاۋىتتا 1153 ادام ەڭبەك ەتەدى. سونىمەن قاتار مۇندا پوليتەحنيكالىق كوللەدج بار, وندا ستۋدەنتتەر دۋالدى وقىتۋدان ءوتىپ, سودان كەيىن بىلىمدەرىن زاۋىتتا قولداناتىندىعىن اتاپ وتكەن ءجون. كوللەدج جىل سايىن 100-دەن استام مامان شىعارادى, ولار كەيىن زاۋىتتا جانە "Alageum Electric" بك حك-دا جۇمىس ىستەيدى.