ا.بايتۇرسىن ۇلى اتىنداعى قوستاناي ۋنيۆەرسيتەتى مەن جەرگىلىكتى ماشينا جاساۋ زاۋىتى جانىنان اۆتوونەركاسىپكە قاجەت مامانداردى دايارلايتىن زاماناۋي ينجينيرينگ ورتالىعى اشىلماق, دەپ حابارلايدى Egemen.kz.
ءبىلىم بەرۋ مەن تاجىريبە ۇشتاۋدى ساباقتاستىرا جۇزەگە اسىرۋدى كوزدەيتىن جاڭا ورتالىقتا ماشينا جاساۋ ءوندىرىسىنىڭ سان الۋان ماماندارى مەن PhD دوكتورلارى وقيتىن بولادى. سونىمەن قاتار, مۇندا بولاشاق ينجەنەرلەردى كولىك قۇراستىرۋدىڭ عىلىمي نەگىزدەرىنە ۇيرەتەتىن جوعارى تەحنولوگيالىق ءوندىرىس قولعا الىنادى.
-تاياۋدا قوستانايعا جۇمىس ساپارىمەن كەلگەن ءبىلىم جانە عىلىم ۆيتسە-ءمينيسترى ميراس داۋلەنوۆ ا. بايتۇرسىن ۇلى اتىنداعى قوستاناي وڭىرلىك ۋنيۆەرسيتەتى مەن «كاماز» جاق ارىپتەستىگىن قولداۋ تۋرالى مەموراندۋمعا قول قويدى. وسىلايشا, بۇرىن-سوڭدى بولماعان بىرەگەي يننوۆاتسيالىق جوبانى جۇزەگە اسىرۋدى كوزدەپ وتىرمىز. باستى ماقساتىمىز - قوستاناي يندۋستريالىق ايماعىنداعى ماشينا قۇراستىراتىن جانە كولىك بولشەكتەرىن جاساپ شىعاراتىن كاسىپورىنداردى, سونداي-اق ءبىلىم, عىلىم مەكەمەلەرىن قاتىستىرا وتىرىپ حالىقارالىق كونسورتسيۋم قۇرۋ; ماشينا جاساۋ سالاسىنا قاتىستى زاماناۋي عىلىمي زەرتتەۋلەر جۇرگىزىپ, ينجينيرنگ جۇيەسىن قالىپتاستىرۋ; سونىمەن قاتار, كولىك قۇراستىرۋ سالاسىنا قاجەت جوعارى بىلىكتى كادرلاردى دايارلاۋدىڭ يننوۆاتسيالىق باعدارلاماسىن ەنگىزۋ, - دەدى ۋنيۆەرسيتەت رەكتورى الما دوسجانوۆا.
ينيجينيرنگ ورتالىعىن 2023 جىلى اشۋ جوسپارلانىپ وتىر. جالپى, قوستاناي ۋنيۆەرسيتەتى ينجەنەرلەردى بۇرىن دا دايىنداپ كەلگەن. ۋنيۆەرسيتەت باسشىسىنىڭ ايتۋىنشا, ەندى بۇل ماماندىققا وقىتۋدىڭ ءتۇرى مەن مازمۇنى تۇبەگەيلى وزگەرەدى. ستۋدەنتتەر زاۋىت ماماندارىنىڭ جەتەكشىلىگىمەن تومەنگى كۋرستاردان باستاپ وندىرىسكە ارالاسىپ, ءدارىسحانادا جيناقتاعان تەوريالىق ءبىلىمدى تاجىريبەدە بەكىتەدى. سونداي-اق, ۋنيۆەرسيتەت ءتامامدايتىن تۇلەكتەردىڭ ديپلومدىق جۇمىستارىنا دا يندۋستريالىق ايماقتىڭ بىلىكتى ماماندارى جەتەكشىلىك ەتەتىن بولادى.
جالپى قۇنى شامامەن 3 ملرد 500 ملن تەڭگە بولاتىن بىرەگەي جوبا بىرنەشە ورتالىقتان قارجىلاندىرىلادى. ينجينيرينگ عيماراتىن تۇرعىزۋ ءۇشىن يندۋستريالىق-يننوۆاتسيالىق دامۋدىڭ مەملەكەتتىك باعدارلامسى اياسىندا 2,4 ملرد تەڭگە قارجى بولىنبەك. ال ورتالىققا قاجەت قۇرال-جابدىقتار ساتىپ الۋعا ءبىلىم جانە عىلىم مينيسترلىگى مەن اۋىل شارۋاشىلىعى مينيسترلىگى 1,1 ملرد تەڭگە قارجى جۇمساماق. مۇنىڭ سىرتىندا, ينجەنەرلىك ورتالىقتى جاراقتاندىرۋعا «كاماز» جاق, «سارىارقااۆتوپروم» جشس, «اگروماشحولدينگ KZ» اق بىرلەسىپ 330 ملن تەڭگە ءبولۋدى كوزدەپ وتىر.
قوستاناي وبلىسى