باتىس قازاقستان وبلىسىنداعى اقساي قالاسىندا ابايدىڭ بەينەسى پايدا بولدى. 10 شاعىناۋدانداعى كوپ قاباتتى ءۇيدىڭ قابىرعاسىنا سالىنعان اقىننىڭ سۋرەتى اباي داڭعىلىنا كىرەر اۋىزدا تۇر.
اقىننىڭ مەرەيتويىنا ارنالىپ سالىنعان 250 شارشىمەترلىك مۋرالدىڭ تومەنگى جاعىنا «پايدا ويلاما, ار ويلا» دەگەن قاناتتى ءسوز جازىلىپتى.
بۇل تۋىندىنىڭ پايدا بولۋىنا سىبايلاس جەمقورلىققا قارسى اگەنتتىگى باتىس قازاقستان وبلىستىق دەپارتامەنتى مۇرىندىق بولعان. «اقجايىق – ادالدىق الاڭى» جوباسى اياسىندا سالىنعان مۋرالدىڭ قارجىسىن دەمەۋشىلەر «RENKO» كومپانياسى مەن «ايالا» سەرىكتەستىگى كوتەرسە, ۇلى ويشىلدىڭ 9 قاباتىق ۇيمەن بىردەي بەينەسىن سۋرەتشىلەر داريا مەن ياكوۆ پولەششۋك 15 كۇن ىشىندە سالىپ شىققان.
- ابايدىڭ «پايدا ويلاما, ار ويلا» دەگەن قاناتتى ءسوزى وسى كۇنى دە وزەكتىلىگىن جويماي تۇر. اۋدان تۇرعىندارىن, سونىڭ ىشىندە جاستاردى تازالىققا, ادالدىققا, پاراساتتىلىققا شاقىراتىن مۇنداي كەرەمەت مۋرال ازىرشە وبلىسىمىزدا جالعىز عانا. كەلەشەكتە ءبىزدىڭ اگەنتتىك وزگە اۋدانداردا دا وسىندا كورنەكى قۇرالدار ورناتۋدى جوسپارلاپ وتىر. مۋرال عانا ەمەس, ۇلى تۇلعالارىمىزدىڭ سۋرەتى سالىنعان بيلبوردتار اۋدان, قالا كوشەلەرىنە قويىلاتىن بولادى. وسىلايشا تاريحي تۇلعالاردىڭ دانالىق سوزدەرى ادالدىقتىڭ الا ءجىبىن اتتاماۋعا تۇرتكى بولارىنا سەنىمدىمىز, – دەدى اقسايداعى مۋرالدىڭ اشىلۋ سالتاناتىنا ارنايى كەلگەن باتىس قازاقستان وبلىستىق سىبايلاس جەمقورلىققا قارسى قىزمەتى باسشىسىنىڭ ءبىرىنشى ورىنباسارى نۇرداۋلەت سامەت.
جالپى اقساي قالاسىندا اباي قۇنانباي ۇلىنىڭ 175 جىلدىق مەرەيتويىنا وراي جىل سوڭىنا دەيىن 175 مادەني ءىس-شارا جوسپارلانعان ەكەن. ءبورلى اۋدانىنىڭ اكىمى ميرجان ساتقانوۆ ءوز سوزىندە اۋدان تۇرعىندارىن ۇلى اقىندى ۇلىقتاۋعا, وسيەتىن ومىردە قولدانۋعا شاقىردى.
ايتا كەتەيىك, سوڭعى جىلدارى اقساي قالاسىنىڭ قازاقى بەت-بەينەسى كوركەيىپ كەلەدى. بۇعان دەيىن قالا ورتالىعىنداعى كوپ قاباتتى ۇيلەرگە باۋىرجان مومىش ۇلى مەن باتىرحان شۇككەنوۆتىڭ مۋرالى سالىنعان بولاتىن. بۇل سۋرەتتەر كۇندىز دە, تۇندە دە الىستان كوز تارتىپ, قالانىڭ كوركىنە كووىك قوسىپ تۇر.
باتىس قازاقستان وبلىسى