قازاقستان سىرتقى ىستەر ءمينيسترى مۇحتار تىلەۋبەردى ماجارستانعا رەسمي ساپارمەن باردى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ساپار اياسىندا م.تىلەۋبەردى ماجارستان سىرتقى ەكونوميكالىق بايلانىستار جانە سىرتقى ىستەر ءمينيسترى پەتەر سيارتومەن كەلىسسوزدەر جۇرگىزدى. تاراپتار پاندەميا جاعدايىندا ەكىجاقتى جانە كوپجاقتى ىنتىماقتاستىقتىڭ ءوزارا ءىس-قيمىلىن نىعايتۋ ماسەلەلەرىن تالقىلاپ, نەگىزگى جاھاندىق جانە وڭىرلىك ماسەلەلەر بويىنشا پىكىر الماستى.
ينتەگراتسيالىق پروتسەستەردى دامىتۋ جانە وڭىرلىك قۇرىلىمدار اراسىنداعى, اتاپ ايتقاندا, ەۋرازيالىق ەكونوميكالىق وداق – ەۋروپالىق وداق, "ۆىشەگراد تورتتىگى + ورتالىق ازيا بەستىگى" باعىتى بويىنشا ءوزارا ءىس-قيمىلدى دامىتۋ قاجەتتىلىگى اتاپ ءوتىلدى, سونداي-اق نۇر-سۇلتان مەن بۋداپەشتتىڭ نەگىزگى حالىقارالىق ماسەلەلەر بويىنشا ۇستانىمدارىنىڭ ورتاقتىعى بەلگىلەندى.
كەلىسسوزدەر قورىتىندىسى بويىنشا مينيسترلەر ەكى ەلدىڭ سىرتقى ساياسي ۆەدومستۆولارى اراسىندا ديپلوماتيالىق كادرلاردى وقىتۋ سالاسىنداعى ىنتىماقتاستىق بويىنشا ءوزارا تۇسىنىستىك تۋرالى مەموراندۋمعا قول قويدى.
سول كۇنى قر سىرتقى ىستەر ءمينيسترى مۇحتار تىلەۋبەردى مەن ماجارستان پرەمەر-ءمينيسترىنىڭ ورىنباسارى – قارجى ءمينيسترى ميحاي ۆارگانىڭ توراعالىعىمەن قازاقستان-ماجارستان ستراتەگيالىق كەڭەسىنىڭ ءتورتىنشى وتىرىسى ءوتتى. قازاقستاندىق سىرتقى ساياسي ۆەدومستۆوسىنىڭ باسشىسى ستراتەگيالىق كەڭەستىڭ قۇرىلۋىنىڭ 5 جىلدىق مەرەيتويى جىلىندا كەزەكتى وتىرىستى وتكىزۋدىڭ وزەكتىلىگىن اتاپ ءوتتى.
وتىرىستىڭ اۋقىمدى كۇن ءتارتىبى ەكىجاقتى ىنتىماقتاستىقتىڭ بارلىق سپەكترىن قامتىدى. ساياسي ديالوگتى كەڭەيتۋ, ساۋدا-ەكونوميكالىق جانە مادەني-گۋمانيتارلىق ءوزارا ءىس-قيمىلدى جانداندىرۋ پەرسپەكتيۆالارى تالقىلاندى. اۋىل شارۋاشىلىعى, اسكەري-تەحنيكالىق ىنتىماقتاستىق, ءبىلىم بەرۋ, فارماتسەۆتيكا, قارجى, مۇناي-گاز جانە اتوم ونەركاسىبى باسىم باعىتتار رەتىندە بەلگىلەندى.
نۇر-سۇلتان – بۋداپەشت باعىتى بويىنشا تىكەلەي اۋە قاتىناسىنىڭ تابىستى ىسكە اسۋى, سونداي-اق قازاقستان-ماجارستان تىكەلەي ينۆەستيتسيالار قورىنىڭ قىزمەتى (جالپى كولەمى 40 ملن. اقش دوللارىن قۇرايدى) اتالىپ ءوتتى. قور بۇگىنگى تاڭدا "اقتوبە وبلىسىندا جوعارى تەحنولوگيالىق جىلىجاي كەشەنىنىڭ قۇرىلىسى" جانە "جامبىل وبلىسىندا قارقىندى الما باقتارىن قۇرۋ" ينۆەستيتسيالىق جوبالارىن ىسكە اسىردى.
تاراپتار سونداي-اق "Keler Group" ماجارلىق كومپانياسى پوست-ترەيدينگ قىزمەتتەرىنىڭ تولىق جيىنتىعىن ۇسىناتىن "استانا" حالىقارالىق قارجى ورتالىعىمەن بەلسەندى ىنتىماقتاستىقتى قۇپتادى.
مادەني ىنتىماقتاستىق ەكىجاقتى قاتىناستاردىڭ تاعى ءبىر ماڭىزدى ەلەمەنتى. ءبىزدىڭ حالىقتارىمىز جاندى تاريحي قاتىناستارمەن تىعىز بايلانىستى, سەبەبى ماجارستاندا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ قۇرمەتتى كوشباسشىسى بولىپ تابىلاتىن قىپشاقتاردىڭ كوپتەگەن ۇرپاقتارى تۇرادى. ەكى ەلدىڭ استانالارىندا بۋداپەشت جانە استانا كوشەلەرى اشىلدى, سونداي-اق ماجارستاننىڭ باس قالاسىنداعى استانا كوشەسىندە اباي قۇنانباي ۇلىنىڭ ءبيۋستى ورناتىلدى.
ءبىلىم بەرۋ سالاسى ستراتەگيالىق ارىپتەستىك شەڭبەرىندەگى ىنتىماقتاستىقتىڭ ماڭىزدى باعىتى. ماجارستان ۇكىمەتى جىل سايىن قازاقستاندىق ستۋدەنتتەردى ماجارستاننىڭ جوعارى وقۋ ورىندارىندا وقىتۋ ءۇشىن 250 گرانت بولەدى, بۇل قازاقستاندىق ءبىلىم الۋشىلار سانىنىڭ ايتارلىقتاي وسۋىنە الىپ كەلدى. بۇگىنگى تاڭدا ماجارستاندا 500-گە جۋىق قازاقستاندىق ستۋدەنت ءبىلىم الۋدا. بۇل رەتتە ماجار ستۋدەنتتەرى قازاق ءتىلىن سەگەد قالاسىنداعى عىلىمي ۋنيۆەرسيتەتتە جانە لاكيتەلەك حالىق ينستيتۋتىندا وقيدى.
ءىس-شارانىڭ قورىتىندىسى بويىنشا تاراپتار ستراتەگيالىق كەڭەستىڭ ءتورتىنشى وتىرىسى قازاقستان-ماجارستان قاتىناستارىنا جاڭا سەرپىن بەرەتىنىنە سەنىم ءبىلدىردى. قويىلعان مىندەتتەردى ءتيىمدى ىسكە اسىرۋ ماقساتىندا ەكونوميكالىق ىنتىماقتاستىق جونىندەگى ۇكىمەتارالىق كوميسسيا, تۋريزم جانە اتوم ونەركاسىبى جونىندەگى جۇمىس توپتارى, سونداي-اق ىسكەرلىك كەڭەس تارتىلاتىن بولادى.
ماجارستانعا ساپارى بارىسىندا مينيستر م.تىلەۋبەردى بۋداپەشتتەگى تۇركىتىلدەس مەملەكەتتەر ىنتىماقتاستىعى كەڭەسىنىڭ ەۋروپالىق بولىمشەسىندە بولىپ, ونىڭ قىزمەتىمەن تانىستى.
جالپى, ساپار قورىتىندىلارى قازاقستان-ماجارستان قاتىناستارىنىڭ اۋقىمدىلىعىن جانە ءوزارا ءتيىمدى ىنتىماقتاستىقتىڭ جاڭا كوكجيەكتەرىن اشاتىنىن كورسەتتى.