وڭىرلەرگە 500-گە جۋىق ءوجج اپپاراتى جەتكىزىلدى

ونىڭ ىشىندە  نۇر-سۇلتان قالاسىنا 126 دانا, الماتىعا 64 دانا, شىمكەنتكە 156 اپپارات جەتكىزىلىپ, قاجەتتىلىكتەرى تولىق وتەلدى. سونداي-اق اقمولا وبلىسى 3, الماتى وبلىسى 32, اقتوبە وبلىسىنا 25, قىزىلوردا وبلىسىنا 53 جانە پاۆلودار وبلىسىنا 39 ءوجج اپپاراتىن الدى. تاعى دا وسىنداي 276 اپپارات الماتى, اقتوبە, پاۆلودار, تۇركىستان جانە قاراعاندى وبلىستارىنا بەرىلەدى.

377 ءوجج اپپاراتى ستەندتى سىناقتاردان ءوتىپ جاتسا, 349-ى جىبەرۋگە دايىن. جالپى بيىلعى 15 قازانعا دەيىن ەلىمىزدىڭ بارلىق وڭىرىنە 1,5 مىڭداي ءوجج اپپاراتىن جەتكىزۋ جوسپارلانىپ وتىر. 

قازاقستاندا مەملەكەتتىڭ قاتىسۋىمەن "قازاقستان اسەلسان ينجينيرينگ" جشس (نۇر-سۇلتان قالاسى) جانە "تىنىس" اق (كوكشەتاۋ قالاسى) كاسىپورىندارى وكپەنى جاساندى جەلدەتۋ اپپاراتىن شىعارادى. بۇل كاسىپورىندار – "قازاقستان ينجينيرينگ" ۇلتتىق كومپانياسىنىڭ ەنشىلەس ۇيىمدارى. 

كوروناۆيرۋس پاندەمياسىنا بايلانىستى ەلدە قالىپتاسقان ەپيدەميولوگيالىق جاعدايعا وراي ءوجج اپپاراتتارى جەتىسپەۋشىلىگىن ەسكەرىپ, "قازاقستان اسەلسان ينجينيرينگ" جشس قىسقا ۋاقىت ىشىندە وكپەنى جاساندى جەلدەتەتىن ستاتسيونارلىق اپپاراتتار ءوندىرىسىن يگەردى. ال "تىنىس" اق "كوكشەتاۋ-4پ" ءوجج 680 ءموبيلدى اپپاراتىن شىعارادى. مەديتسينا ماماندارىنىڭ پىكىرىنشە, اپپارات قولدانۋعا ىڭعايلى ءارى سەنىمدى جانە ەلەكتر قۋاتىنا تاۋەلدى ەمەس. كاسىپورىننىڭ وندىرىستىك قۋاتى ايىنا 500 ءوجج اپپاراتىن شىعارۋعا جەتەدى.

ودان بولەك, "تىنىس" اق ءوجج ءپورتاتيۆتى اپپاراتتارىن, "كوكشەتاۋ 3" مەديتسينالىق بۇيىمداردىڭ ءتۇرلى نومەنكلاتۋراسىن, ونىڭ ىشىندە كوپ رەتتىك بەتپەردەلەردى, مۇگەدەكتەرگە ارنالعان اربالاردى جانە ت. ب. زاتتاردى شىعارىپ جاتىر.

بۇل كاسىپورىنداردىڭ نەگىزگى قىزمەتى قازاقستان رەسپۋبليكاسىنىڭ جانە وزگە دە ەلدەردىڭ قارۋلى كۇشتەرىنىڭ قاجەتتىلىكتەرى ءۇشىن جوعارى تەحنولوگيالىق ونىمدەر شىعارۋعا باعىتتالعان. ال ءوجج ءوندىرىسى مەديتسينالىق مەكەمەلەردىڭ قاجەتتىلىكتەرىن وتەۋگە باعىتتالعان مەملەكەتتىك تاپسىرىس اياسىندا جولعا قويىلدى.

كاسىپورىندار قوسىمشا قاجەتتىلىك تۋىنداعان جاعدايدا مەديتسينالىق تەحنيكا مەن كەز كەلگەن ءونىمدى قاجەت مولشەردە ءوندىرىپ جەتكىزە الادى.