پرەمەر-مينيستر اسقار مامين ەرەۆان قالاسىنا ساپارى اياسىندا ەۋرازيالىق ۇكىمەتارالىق كەڭەس (ەۇاك) وتىرىسىنا قاتىسىپ, وندا جاڭا ەكونوميكالىق شىنايىلىق جاعدايىندا ەاەو-نىڭ باسەكەگە قابىلەتتىلىگىن نىعايتۋ بويىنشا بىرقاتار باستاما كوتەردى, دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
ۇكىمەت باسشىسى ەركىن نارىقتاردىڭ ءتيىمدى جۇمىس ىستەۋىن قامتاماسىز ەتۋ ماقساتىندا تسيفرلىق ينتەگراتسيالىق پلاتفورمانى پايدالانۋ جانە سالىق, كەدەن ورگاندارىنىڭ كەڭەيتىلگەن ەلەكتروندىق ءوزارا ءىس-قيمىلى نەگىزىندە ەاەو-نىڭ سالىقتىق-كەدەندىك سەنىم كەڭىستىگىن قالىپتاستىرۋدى ۇسىندى.
«مۇنداي جاعدايدا قازاقستان پرەزيدەنتى قاسىم-جومارت كەمەل ۇلى توقاەۆتىڭ وداقتىڭ مۇددەلى ەلدەرىمەن ورتاق تاۋار ءبولۋ جەلىسىن قۇرۋ مۇمكىندىگىن پىسىقتاۋ تۋرالى ۇسىنىسى اسا وزەكتى. ەلدەرىمىزدىڭ گەوگرافيالىق ورنالاسۋىن ەسكەرسەك, ەاەو ەۋروپا مەن ازيا اراسىنداعى “ساۋدا حابىنا” ابدەن اينالا الادى», دەپ ا. مامين, قر-دا قۇرىلاتىن ۇلتتىق تاۋار وتكىزۋ جۇيەسىنىڭ مودەلىن اۋقىمداندىرۋدى جانە ەۋرازيالىق تاۋار وتكىزۋ جۇيەسىن قالىپتاستىرۋدى ۇسىندى.
پرەمەر-مينيستر كۇش-جىگەردى ەۋرازيالىق زياتكەرلىك كولىك جۇيەلەرىن قۇرۋعا شوعىرلاندىرۋ قاجەت ەكەنىن اتاپ ءوتتى, بۇل قازىرگى ينفراقۇرىلىمدى نەعۇرلىم ءتيىمدى پايدالانۋعا جانە تاسىمالداۋشىلار مەن تاۋار وندىرۋشىلەردىڭ شىعىستارىن وڭتايلاندىرۋعا مۇمكىندىك بەرەدى.
ۇكىمەت باسشىسى ەاەو-دا ستراتەگيالىق وتكىزۋ پۋنكتتەرىندە بىرلەسكەن تىرەك سىناق زەرتحانالارىن قۇرۋ تۋرالى باستاما كوتەردى, بۇل ءونىمنىڭ ءۇشىنشى ەلدەردىڭ تالاپتارىنا سايكەستىگىن راستاۋعا ارنالعان شىعىستاردى ايتارلىقتاي تومەندەتۋگە مۇمكىندىك بەرەدى.
وتىرىسقا قاتىسۋشىلار ەۋرازيالىق ەكونوميكالىق ينتەگراتسيانى دامىتۋدىڭ 2025 جىلعا دەيىنگى ستراتەگيالىق باعىتتارىنىڭ جوباسىن, ترانسشەكارالىق ەلەكتروندىق ساۋدانى دامىتۋ, ەاەو ىشكى نارىعىنداعى شىعارىپ تاستاۋ مەن شەكتەۋلەردى جويۋ جونىندەگى جۇمىس بارىسىن, وتكەن جىلعى ەاەو بيۋدجەتىنىڭ اتقارىلۋى تۋرالى ەسەپتەردى, ەاەو-نىڭ 2021 جىلعا ارنالعان بيۋدجەتىن قارادى. ەكسپورتتى دامىتۋدىڭ بىرلەسكەن شارالارى جانە اگروونەركاسىپتىك كەشەندى دامىتۋدىڭ 2020-2021 جىلدارعا ارنالعان بىرلەسكەن بولجامدارى تۋرالى وكىمدەر قابىلداندى.