عىلىمي ساراپشىلار كەڭەسىنىڭ العاشقى وتىرىسى ءوتتى

تاۋەلسىز ساراپتاما ورگانى ۇلتتىق دەڭگەيدەگى قولدانبالى پروبلەمالاردى شەشۋ ءۇشىن عىلىمدى تارتۋ كەلەشەكتەگى مىندەتتەردىڭ ءبىرى بولىپ بەلگىلەنگەن مەملەكەت باسشىسىنىڭ اعىمداعى جىلعى 1 قىركۇيەكتەگى قازاقستان حالقىنا جولداۋىن ىسكە اسىرۋ تۇرعىسىندا قۇرىلدى.

كەڭەس جۇمىسىنىڭ نەگىزگى باعىتتارى – سىبايلاس جەمقورلىققا قارسى كۇرەس بويىنشا ۇزدىك الەمدىك تاجىريبەلەردى تالداۋ, بەيىمدەۋ جانە ەنگىزۋ ماقساتىندا پرواكتيۆتى عىلىمي-كاسىبي قوعامداستىقتى قالىپتاستىرۋ, سىبايلاس جەمقورلىققا قارسى باستامالاردى كەشەندى عىلىمي-ساراپتامالىق باعالاۋ, سىبايلاس جەمقورلىققا قارسى ءىس-قيمىل بويىنشا جوبالىق ۇسىنىستاردى ازىرلەۋ.

اگەنتتىكتىڭ جاڭا كونسۋلتاتيۆتىك-كەڭەسشى الاڭى ۇلىبريتانياداعى قازاقستاندىق PhD قاۋىمداستىعىنىڭ جانە الەمنىڭ باسقا دا جەتەكشى جوعارى وقۋ ورىندارىنىڭ جۇزدەن استام جاس عالىمدارىنىڭ باسىن بىرىكتىردى.

اليك شپەكباەۆ ءوز سوزىندە اتاپ وتكەندەي, ءبىزدىڭ جاس عالىمدار, شەتەلدىڭ ۇزدىك ۋنيۆەرسيتەتتەرىندە ءبىلىم الىپ, قىزمەت جاساپ جۇرگەن عىلىم دوكتورلارى ەلىمىزدىڭ دامۋىنا ءوز ۇلەستەرىن قوسۋعا دايىن, بۇل ءسوزسىز, قازاقستاندىق جاستاردىڭ پاتريوتتتىق سەزىمىن كورسەتەدى.

"تەك بيۋدجەت ەسەبىنەن عانا "بولاشاق" باعدارلاماسى بويىنشا شەتەلدە بۇگىندە 150-گە جۋىق PhD دوكتور ءبىلىم العان جانە قازىرگى ۋاقىتتا دا وسىنشاسى شىڭدالۋدا. Google, Deloitte, Facebook جانە باسقا دا ۇزدىك كومپانيالاردا جۇمىس ىستەيتىن, يدەيالار ۇسىنۋعا دايىن كاسىپقويلاردىڭ اراسىندا جاس قازاقستاندىقتار از ەمەس. الەۋەت بار جانە ونى ەلدىڭ ودان ءارى دامۋىنا, ونىڭ ىشىندە سىبايلاس جەمقورلىققا قارسى باعىتقا باعدارلاۋ كەرەك", دەدى اگەنتتىك توراعاسى.

ول, بىرلەسكەن جۇمىستىڭ ماقساتتارى مەن مىندەتتەرى رەتىندە دامىعان مەملەكەتتەردىڭ سىبايلاس جەمقورلىققا قارسى حالىقارالىق ستاندارتتارىن قولدانۋ پراكتيكاسىن زەردەلەۋدە, ولاردى ءبىزدىڭ رەسپۋبليكامىزدا ىسكە اسىرۋ تەتىكتەرىن ازىرلەۋدە عالىمداردىڭ جاردەمدەسۋى قاجەت ەكەنىن اتاپ ءوتتى.

ءبىلىم جانە عىلىم ۆيتسە-ءمينيسترى ميراس داۋلەنوۆ ءوز سوزىندە مەملەكەتتىك ورگانداردىڭ قىزمەتىندە قازاقستاندىق عالىمداردىڭ تاجىريبەسى مەن ءبىلىمىن قولدانۋ تاسىلدەرىنىڭ دۇرىستىعىن بەلگىلەي وتىرىپ, سىبايلاس جەمقورلىققا قارسى قىزمەت پەن عىلىمي قاۋىمداستىقتىڭ ىنتىماقتاستىعىن قولدادى.

ءوز كەزەگىندە ۇلىبريتانياداعى قازاقستاندىق PHD قاۋىمداستىعىنىڭ پرەزيدەنتى, كەڭەس باسشىسى بولىپ سايلانعان ءاليا سەمباەۆا قاۋىمداستىقتىڭ تابىستى تاجىريبەسى نەگىزىندە, ونىڭ جۇمىسىنىڭ پايىمىن تانىستىردى. ءوز سوزىندە ول اشىق, باسەكەگە قابىلەتتى جانە دوستىق تاجىريبەلەر نەگىزىندە مەملەكەتتىك ساياساتتى قالىپتاستىرۋعا عىلىمي نەگىزدەلگەن ءتاسىلدى ەنگىزۋدىڭ ماڭىزدىلىعىن اتاپ ءوتتى.

وتىرىس بارىسىندا PhD دوكتورلارى مەن دوكتورانتتارى, ونىڭ ىشىندە اۆستراليا, ۇلىبريتانيا جانە باسقا ەۋروپالىق ەلدەردىڭ ءىس-شاراعا ونلاين قاتىسۋشىلارى جەكەلەگەن باعىتتارداعى سىبايلاس جەمقورلىق تاۋەكەلدەرىن جويۋ بويىنشا ءوز ۇسىنىستارىن ۇسىندى.

ماسەلەن, Satbayev University يننوۆاتسيالار جونىندەگى باسقارۋشى ديرەكتورى شىڭعىس چەرنيازدانوۆ ەلىمىزدىڭ جەتەكشى تەحنيكالىق جوعارى وقۋ ورنىنىڭ اتىنان قاتىسۋشىلارعا قازاقستانداعى عىلىم مەن ءوندىرىستىڭ ءوزارا ءىس-قيمىلى بويىنشا تاسىلدەرىن جەتكىزدى, سونداي-اق پرەزيدەنتتىڭ عزتكج-عا قاتىستى تاپسىرمالارىن ورىنداۋ بويىنشا ۇسىنىستارىن ۇسىندى. سپيكەر ەلىمىزدە تالانتتى عالىمدار ءۇشىن جانە قازاقستاندىق اقىل-ويدى شەتەلدەن تارتۋ ءۇشىن قولايلى جاعداي جاساۋدىڭ ماڭىزدىلىعىنا نازار اۋداردى.

كەڭەس ساراپشىلارى جۇمىس ىستەي باستاعان تاعى ءبىر جوبا – جوعارى ءبىلىم بەرۋ سالاسىنداعى سىبايلاس جەمقورلىق ماسەلەسى. وتىرىس بارىسىندا الەۋمەتتىك زەرتتەۋلەر نەگىزىندە, شەشۋ جولدارىن كەڭەستىڭ ساراپشىلار توبى ۇسىندى (ارمان راحيموۆ, انار مۇحتاروۆا. گۇلشات ءتۇسىپوۆا, ءمولدىر قابىلوۆا).

ءوز تاراپىنان سىبايلاس جەمقورلىقپەن كۇرەسۋشىلەر ازىرلەنگەن ۇسىنىستاردى ءىس جۇزىندە جۇزەگە اسىرۋ بويىنشا شارالار قابىلدايدى.

اگەنتتىك, عىلىمي قوعامداستىقپەن سىندارلى ءوزارا ءىس-قيمىل ەلىمىزدىڭ سىبايلاس جەمقورلىققا قارسى ساياساتىنىڭ تيىمدىلىگىن ايتارلىقتاي ارتتىرۋعا مۇمكىندىك بەرەتىنىنە سەنىم ءبىلدىردى.