بۇگىن, 10 قاراشا كۇنى استاناداعى «استانا-ارەنا» سپورت كەشەنىندە بولىپ وتكەن قازاقستاننىڭ 2013 جىلعى كۋبوگى ءۇشىن فينالدىق ويىندا تارازدىڭ «تاراز» كومانداسىن 1:0 ەتىپ ۇتقان قاراعاندىنىڭ «شاحتەرى» وسى تارتۋعا قول جەتكىزدى. كەنشىلەر كومانداسىنا كۋبوكتى ماتچتى ارنايى كەلىپ كورگەن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ءوز قولىمەن تابىس ەتتى.
قاراعاندىلىقتاردىڭ بۇل كەزدەسۋدىڭ ناتيجەسىنە ايرىقشا ءمان بەرگەنى ونىڭ باستالعان شاعىنان ايقىن بايقالدى. ولار الاڭداعى اربيتردىڭ ىسقىرىعى ەستىلىسىمەن تۇرا العا ۇمتىلدى. مۇندا سوڭعى كەزدەرى ەلوردانىڭ باس الاڭىنا بويلارىن ۇيرەتىپ قالعان شاحتەرلىكتەردىڭ باسىمدىلىعى بىرتىندەپ ارتا بەردى.
«شاحتەردىڭ» بۇل ماتچتان كۇتەر ءۇمىتىنىڭ كوپ ەكەنىن كەيىنگى كەزدەرى كوماندانىڭ باس جاتتىقتىرۋشىسى ۆيكتور كۋمىكوۆتىڭ ۇستانعان تاكتيكاسى دا اڭعارتىپ ءجۇر ەدى. ول ەلىمىزدىڭ چەمپيوناتىندا ءوز شاكىرتتەرىنىڭ جۇلدەلى ورىنداردان كورىنە المايتىنى بەلگىلى بولا باستاعان كەزدە بار كۇش-جىگەردى بىردەن ەۋروپا فۋتبول الاڭدارىنداعى شايقاستارعا اۋدارىپ جىبەردى. سونىڭ ارقاسىندا ونىڭ جىگىتتەرى قازاقستان كوماندالارى اراسىنان ءبىرىنشى بولىپ ەۋروپا ليگاسىنىڭ توپتىق كەزەڭىندە ونەر كورسەتۋ دەڭگەيىنە دەيىن جەتە الدى. ال جاساقتىڭ توپتىق كەزەڭدە كەلەسى اينالىمعا شىعا الماسىن بىلگەسىن, قازاقستان كۋبوگى ءۇشىن ايقاستى ءبىرىنشى پلانعا شىعارا قويدى. ءسويتىپ, ول بۇدان بىرقاتار ۋاقىت بۇرىن كارى قۇرلىق كوماندالارى دوداسىنىڭ جاۋاپتى ماتچتارى الدىندا قالاي پرەمەر-ليگا ويىندارىنا كەنشىلەردىڭ ەكىنشى قۇرامىن شىعارسا, وسىدان بىرنەشە كۇن بۇرىن گوللانديادا وتكەن توپتىق كەزەڭنىڭ كەزەكتى ويىنىنا دا قوسالقى قۇرامىن سالا قويدى. بۇل ارالىقتا نەگىزگى قۇرام رەسپۋبليكا كۋبوگى ءۇشىن كەزدەسۋگە قىزۋ دايىندالىپ جاتتى. ولاي بولسا, تاياۋدا نيدەرلاندى جەرىندە جەرگىلىكتى از كومانداسىنان 0:1 بولىپ ۇتىلىپ قايتقان «شاحتەردىڭ» جاستار توبى بولاتىن.
ءوزىن وسىنداي تاكتيك رەتىندە تانىتقان ۆيكتور كۋمىكوۆتىڭ كومانداسى فينالدىق ويىننىڭ بارىسىندا قارسىلاسىنا قاراعاندا تىڭداۋ كورىندى. ونىڭ بۇگىنگى قيمىلىنا قاراپ, بيىل ءۇش مايداندا قاتار شايقاسقان كوماندانىڭ ساربازدارىن كورگەندەي بولا الماعانىمىزدىڭ ءبىر سەبەبى الگىندەگىدەي ونى وسى كۇنگە باپتاپ جەتكىزگەن باپكەردىڭ ەڭبەگىندە جاتىر ەدى. سوندىعىنان بولار, ءبىرىنشى تايم تولىق قاراعاندىلىقتاردىڭ بەلسەندىلىگىندە قالدى. ارا-تۇرا تارازدىقتاردىڭ شولعىن جاساپ تۇرعاندارى بولماسا, نەگىزىنەن باسىمدىق سولاردىڭ تىزگىنىندە ىركىلىپ تۇردى. الايدا, كەزدەسۋدىڭ ءبىرىنشى بولىگىندە ەكى جاق تا ەسەپ اشا الماي, تەڭ تارقاستى.
ەكىنشى تايمدى تاعى دا «شاحتەر» شابۋىلمەن ءوربىتىپ اكەتتى. ونىڭ ويىنشىلارى قارسى جاققا قىسىمدى بۇرىنعىدان بەتەر كۇشەيتە ءتۇستى. اقىرى 53-مينۋتتا ولار سول باسىمدىلىقتى گولعا دا اينالدىرىپ ۇلگەردى. ايتاتىنى جوق, ول كەرەمەت ءبىر ۇيلەسىمدىلىككە قوسا دالدىكتى تانىتاتىنداي بولىپ سوعىلدى. وسى جەردە كەنشىلەردىڭ «ەۋروپا كورگەندەرى» انىق اڭعارىلدى. ونى ايىپ الاڭىنا لىپ ەتىپ جەتىپ كەلگەن دوپقا ءوزىن قورشاعان ەكى قورعاۋشىنىڭ اراسىنان سىتىلىپ شىعىپ, اياعىن تيگىزىپ ۇلگەرگەن سەرگەي حيجنيچەنكو ءتۇسىردى. دوپتىڭ ۇشىپ كەلىپ, ونىڭ اياعىنا ءتيۋى مەن ودان قايتا سەرپىلىپ, قاقپانىڭ تورىنا گۇمپ ەتىپ تۇسە قالۋى قۇددى ءبىر بيلياردتىڭ شارىن ناعىز قاس شەبەرى كەرىمى كەلىسكەن كيمەن ۇرعانىنداي ادەمى اسەر قالدىردى.
قاراعاندى فۋتبولشىلارى بۇدان كەيىن دە ەسەپتى ۇلعايتاتىن مۇمكىندىكتەردى تالاي رەت جىبەرىپ الدى. مۇنداي ءماۋرىتتى الەكساندر سيمچەۆيچ پەن سەرگەي حيجنيچەنكونىڭ باستارىنان وتكىزدى. بىراق ولار راميل نۇرمۇحامەتوۆتى قاپى قالدىراتىنداي ايلا تابا قويمادى. كەنشىلەر بۇدان كەيىن دە بىرنەشە رەت ەسەپتى ەسەلەۋگە شاق قالدى. سونىڭ بارىندە تارازدىقتار سوڭعى ساتتەردە قاقپالارىن گولدان امان الىپ قالىپ جاتتى. سوعان قاراماستان, «شاحتەر» سوڭعى ساتكە دەيىن شابۋىلداۋدان قايتقان جوق. قورىتىندىدا حيجنيچەنكو سالعان جالعىز دوپ كۋبوكتىڭ دا تاعدىرىن شەشىپ كەتتى.
ايتا كەتۋ كەرەك, ماتچتى ەلىمىزدىڭ پرەزيدەنتى نۇرسۇلتان نازارباەۆتان بولەك, ۋەفا پرەزيدەنتى ميشەل پلاتيني, ونىڭ ورىنباسارى گريگوري سۋركيس, رەسەي فۋتبول وداعىنىڭ باسشىسى نيكولاي تولستىح تاماشالادى.
تاعى ءبىر ايتا كەتەتىنىمىز, بۇل «شاحتەردىڭ» قازاقستان كۋبوگى فينالىنداعى ءبىرىنشى جەڭىس. ول بۇعان دەيىن ەكى رەت – 2009 جانە 2010 جىلدارى اقتىق ايقاستا ۇتىلىپ قالعان ەدى. وسى جەڭىسى ارقىلى قاراعاندىلىقتار ەۋروپا ليگاسىنا كەلەسى جىلعا جولداما دا الىپ قويدى.
سوڭعى قوسارىمىز, «شاحتەردى» 2011, 2012 جىلدارى قازاقستاننىڭ چەمپيونى دەگەن اتاققا جەتكىزگەن ۆيكتور كۋمىكوۆ بيىل وعان ەندى ەلىمىزدىڭ كۋبوگىن دا الىپ بەرىپ وتىر. ال مۇنداي باپكەرلەر تاۋەلسىز قازاقستان فۋتبولىندا ساناۋلى عانا.
دامير قوجامقۇل.