اقش بۇدان 53 جىل بۇرىن كۋباعا قارسى جاريالاعان سانكتسياسىن قايتا سۇزگىدەن وتكىزەدى. بۇل تۋرالى TREND اقپاراتتىق پورتالى حابارلادى.
فلوريدا شتاتىندا بولعان جيىندا: «ءبىز ءوز ساياساتىمىزدى جاسامپازدىقپەن جۇرگىزۋىمىز كەرەك», – دەپ ءسوزىن باستاعان پرەزيدەنت باراك وباما اقش-كۋبا قارىم-قاتىناسىنا قاتىستى ءوز ويىن ءبىلدىردى.
باراك وبامانىڭ پىكىرىنشە, جارتى عاسىردان استام ۋاقىت كۋباعا باعىتتالىپ كەلگەن بارلىق شەكتەۋلەر قازىرگى كەزدە ءوزىنىڭ وزەكتىلىگىن جوعالتقان. اقش پرەزيدەنتى اتالعان تۇيتكىلدى قايتا قاراۋ ەكى ەلدىڭ ارا-قاتىناسىن جاڭا دەڭگەيگە كوتەرەدى دەپ ەسەپتەيدى. سونداي-اق, ول امەريكانىڭ جاس ۇرپاعى اقش پەن كۋبا اراسىنداعى قارىم-قاتىناستى جۇمسارتۋ ءۇشىن تىڭ تەتىكتەر ىزدەي باستايتىنىن جەتكىزدى.
ءسال شەگىنە سويلەسەك, 1960 جىلى اقش كۋبانى ساياسي جانە ەكونوميكالىق قىسىمعا الۋدى باستاعان. مۇنىڭ سەبەبىن تۇسىندىرسەك, سول تۇستاردا كۋبا بيلىگى ءوز ايماعىنداعى امەريكالىقتاردى بۇرىنعى الەۋمەتتىك ارتىقشىلىقتارىنان جانە جەكە مەنشىكتەرىندەگى دۇنيە-م ۇلىكتەرىنەن ايىرعان-دى. مىنە, سودان بەرى الگى سانكتسيا قامىتى كۋبانىڭ موينىندا تۇرعان بولاتىن. ءتىپتى, 1962 جىلى اقش بوستاندىق ارالىنا قىسىمدى تىم كۇشەيتىپ جىبەردى. الايدا, كۋبا بيلىگى وعان دا ايىلىن جيمادى.
جالپى, اقش كۋبادان دەموكراتيالىق ۇردىستەرگە جول اشۋدى, ادام قۇقىعىنا قۇرمەتپەن قاراۋدى تالاپ ەتىپ كەلەدى. سونداي-اق, اقش بيلىگى ءوزىنىڭ دەگەنىنە كونە قويمايتىن ەلدەرمەن كۋبانىڭ اسكەري قارىم-قاتىناس جاساۋىن دا قالامايدى.
جولدىباي بازار.