بۇگىندە اۋىلدىق جەرلەردە باس قوسقان جاعدايدا ءجيى ەستيتىنىمىز – مال باعاتىن, تراكتور ايدايتىن ادامنىڭ ازدىعى. ءبىر جاعىنان جازدىڭ ىستىعى, كۇزدىڭ قارا سۋىعى توقتاۋسىز تراكتور جۇرگىزۋ دە وڭاي ەمەس. وعان قوسا, اۋىلداعى تەحنيكانىڭ دەنى ەسكى. اۋىلداعى بۇرىننان كەلە جاتقان كاسىبي مەحانيزاتورلار ەسكى تەحنيكانى جاماپ-جاسقاۋمەن-اق قارتايعانى راس. اۋىلدىق جەردە مال شارۋاشىلىعىن قولعا العان شارۋا ءتورت ت ۇلىگىن باعاتىن مالشى تاپپاي ءبىر اۋرەگە تۇسسە, قىسقى جەم-ءشوپتى دايىنداۋ ءارى تاسىمالداۋ ءۇشىن تراكتورشىنى ىزدەپ سابىلىپ جۇرگەنى.
جۋىردا اۋدان ورتالىعىندا ديحان اۋىلدىق وكرۋگىنىڭ تۇرعىنى شولپانعالي كەرىمبەكوۆ اعامىزبەن اڭگىمەلەسكەنىمدە «كوشە بويىنان تراكتوردىڭ داۋىسى ەستىلسە بولدى, وسى تراكتوردى ءبىر جۇرگىزسەم دەپ تۇرامىن», دەپ بۇرىنعى رولگە وتىرعان كەزى ويىنا ءتۇسىپ كەتەتىنىن ساعىنىشپەن ايتتى. ءوزى ەڭبەك جولىن «متز-50» تراكتورىنان باستاپ, ۇزاق جىلداي تەحنيكانىڭ تورەسى ك-701 تراكتورىن ايداعانىن ايتىپ, ءارى ك-701 تراكتورىن جەكەمەنشىگىنە الىپ, ءبىراز جىلداي وسى تراكتورىمەن شارۋاشىلىقتاردىڭ (شارۋاشىلىق باسشىلارى جاپار ديداربەكوۆ, ءساتباي ابىقۇلوۆ, فايك گادجيەۆ, مەحيا رادجاموۆ) تاپسىرماسىمەن ءارى اۋىل تۇرعىندارىنىڭ جەرلەرىندە دە ۇزبەي ەڭبەك ەتىپ, حالىقتىڭ ريزاشىلىعىن العانىن ەسكە الدى. جامبىل وبلىستىق كازسەلحوزحيميا (باسشىسى ا.كارەنتاەۆ) كاسىپورنىندا ك-701 تراكتورىن جۇرگىزىپ, قورداي, مەركى, تۇرار رىسقۇلوۆ, جامبىل, سارىسۋ, جۋالى, بايزاق اۋداندارىندا جانە كورشى قىرعىز رەسپۋبليكاسى تالاس وبلىسىنىڭ دا جەرلەرىن بارلىق تالاپقا ساي جىرتىپ, كودەلى, قىسقى مويىنقۇم جايىلىمدارىنا دا جەمشوپ تاسىپ, جوعارى ەڭبەكاقى العانىن جانە ءبىراز قۇرمەت گراموتالارىمەن ماراپاتتالعانىن ەسكە الدى.
«ەڭبەگىنە قاراي – قۇرمەت, جاسىنا قاراي – ىزەت» دەگەندەي, بۇگىندە ءبىر كاسىپورىندا قاراۋىلدىق جۇمىسىن ابىرويمەن اتقارىپ, بۇگىنگى جاستارعا اعالىق اقىلىن ۇزبەي ايتىپ وتىرادى. الداعى جىلى ابىرويمەن زەينەتكە شىقپاق ويى بار.
بۇرىنعى لەنين كولحوزىنداعى مرسحو-دا 1990-1993 جىلدارى باس ينجەنەر قىزمەتىن اتقارعان, اۋداننىڭ قۇرمەتتى ارداگەرى, زەينەتكەر سەرىك ەشەنباەۆ تا شارۋاشىلىقتاعى تراكتورشىلار قالدىحان ديداربەكوۆ, تاتتىقۇل ەرمۇراتوۆ, شولپانعالي كەرىمبەكوۆتەر ۋاقىتپەن ساناسپاي جۇمىستى ارتىعىمەن ورىندايتىنىن جەتكىزدى. اسىرەسە بارلىق جۇمىستى مەرزىمىندە ءتيىمدى اتقارىپ, قوعامدىق جۇمىستا دا كوزگە تۇسكەن شولپانعالي ورالبەك ۇلى بۇگىندە جۇبايى قىمباتكۇل ەكەۋى 2 ۇل, 1 قىزدان 5 نەمەرە ءسۇيىپ وتىرعان وتباسى ءارى حالىقتىڭ ريزاشىلىعىن العان اۋىلدىڭ سىيلى ازاماتتارىنىڭ ءبىرى ەكەنىنىن ەرەكشە اتاپ ءوتتى.
شولپانعالي اعانىڭ ايتۋىنشا, بۇگىنگى جاستاردىڭ اۋىلدىق جەردە جۇمىس ىستەۋگە ىنتاسى بولسا, جۇمىس تابىلادى. «مالشى, سۋشى, تراكتورشى سياقتى جۇمىستار جەتەرلىك, قاي جۇمىس بولسا دا جاستار اۋىلداعى حالىقتىڭ قۇرمەتىنە بولەنسە» دەيدى.
تولە نارجانوۆ,
اۋداندىق تاريحي-ولكەتانۋ مۋزەيىنىڭ قىزمەتكەرى
جامبىل وبلىسى,
بايزاق اۋدانى