پارلامەنت پالاتالارىنىڭ بىرلەسكەن وتىرىسىندا ەلباسىمىز نۇرسۇلتان نازارباەۆ اتاپ وتكەندەي, الەۋمەتتىك جاڭعىرتۋ ەڭبەك قاتىناستارىن جەتىلدىرۋدى تالاپ ەتەدى. سوندىقتان قازاقستاندىق كاسىپوداقتاردىڭ قوزعالىسىن جاڭعىرتۋدى باتىل جۇرگىزۋ كەرەك.
پارلامەنت پالاتالارىنىڭ بىرلەسكەن وتىرىسىندا ەلباسىمىز نۇرسۇلتان نازارباەۆ اتاپ وتكەندەي, الەۋمەتتىك جاڭعىرتۋ ەڭبەك قاتىناستارىن جەتىلدىرۋدى تالاپ ەتەدى. سوندىقتان قازاقستاندىق كاسىپوداقتاردىڭ قوزعالىسىن جاڭعىرتۋدى باتىل جۇرگىزۋ كەرەك.
ءبىز پرەزيدەنتتىڭ كاسىپوداقتاردىڭ قوزعالىسىن جاڭعىرتۋدى وتكىزۋ تۋرالى ۇسىنىسىن قولداۋعا ءتيىسپىز, سەبەبى, بۇگىندە كاسىپوداقتار جۇمىس بەرۋشىلەردىڭ ەڭبەك زاڭناماسىن, كاسىپوداقتاردىڭ قۇقىقتارى مەن ەركىندىكتەرىن بۇزۋىنا تولىق قارسى تۇرا المايدى. ەڭبەكاقىنى وسىرۋدە جانە ونى تولەۋدەگى ادىلەتسىز ديسپروپورتسيالاردى جويۋدا, سونداي-اق, جۇمىسسىزدىقتى قىسقارتۋدا كاسىپتىك وداقتاردىڭ ىقپالى وتە ءالسىز.
كاسىپوداقتارعا بەرىلگەن ەڭبەك قاۋىپسىزدىگى مەن ەڭبەكتى قورعاۋ جاعدايىن قوعامدىق باقىلاۋدىڭ زاڭدى قۇقىعى قاجەتتى دەڭگەيدە قولدانىلمايدى. قوعامدىق-ساياسي ومىردەگى كاسىپتىك وداقتاردىڭ رەيتينگى اسا جوعارى ەمەس, ولار ەلىمىزدەگى جالدامالى جۇمىسشىلاردىڭ كوبىن بىرىكتىرمەيدى. قۇرىلىمدىق, كادرلىق جانە قارجىلىق جۇمىستار جەتىلدىرىلمەيدى. ءارتۇرلى دەڭگەيلى كاسىپوداقتاردى ۇيلەستىرۋ جانە ءوزارا ارەكەتتەستىك ماسەلەلەرى باياۋ شەشىلۋدە, قوزعالىستىڭ شىنايى بىرلىگى قامتاماسىز ەتىلمەگەن.
ەڭبەكاقى تولەۋ سالاسىنداعى كاسىپتىك وداقتاردىڭ ساياساتى ەڭبەكاقى تولەۋ سالاسىنداعى ەڭبەك ونىمدىلىگىن ارتتىرۋعا بايلانىستى ەڭبەكاقىنى كوتەرۋگە, سالالىق جانە ايماقتىق دارەجەدەگى ەڭبەكاقى تولەۋدە قالىپتاسقان جوعارى ديسپروپورتسيانى جويۋعا, «كولەڭكەلى» ەڭبەكاقى بەرۋدى تۇبەگەيلى جويۋعا باعىتتالۋى ءتيىس.
جاعدايدى تۇزەتۋ ءۇشىن بارلىق دارەجەدەگى الەۋمەتتىك سەرىكتەستىكتە ناعىز تەڭدىكتى ساقتاۋعا, تاراپتاردىڭ مۇددەلەرى مەن جاۋاپكەرشىلىكتەرىن قۇرمەتتەۋگە ۇمتىلۋ قاجەت دەپ سانايمىن. مەملەكەتتىك ورگاندار الەۋمەتتىك-ەكونوميكالىق سيپاتتاعى كوپتەگەن ماڭىزدى شەشىمدەردى كاسىپوداقتاردان الدىن الا كەڭەس الماستان بىرجاقتى تارتىپپەن قابىلدايتىن جاعدايلاردى توزبەستىك دەپ ساناۋ كەرەك.
كەيبىر كاسىپوداقتار زاڭدى تۇلعا مارتەبەسىن العان سوڭ اۋماقتىق تا, سالالىق تا كاسىپتىك وداقتاردىڭ قۇرامىنا كىرمەيدى. ياعني, «اۆتونومدى» تۇردە قىزمەت ەتەدى. ال كەيبىر وسىنداي كاسىپتىك بىرلەستىكتەر تاعى دا ەشقايدا تىركەلمەستەن, ءوز قاۋىمداستىقتارىن قۇرا باستادى.
مەن قازاقستان كاسىپوداقتارى فەدەراتسياسى كەڭەسىنىڭ مۇشەسى بولىپ تابىلامىن جانە ۇنەمى كاسىپتىك وداق بىرلىگىنە شاقىرامىن. ەلىمىزدىڭ وندىرىستىك, عىلىمي-ءبىلىم بەرۋ, مادەني ەليتاسىنىڭ الەۋەتى شوعىرلانعان ءىرى مەگاپوليستىڭ كاسىپتىك وداقتارى قازاقستان رەسپۋبليكاسى كاسىپتىك وداقتار فەدەراتسياسىمەن بىرلىكتە جۇمىس ىستەۋى ءتيىس.
سونىمەن قاتار, كاسىپتىك وداقتار مەن جەرگىلىكتى بيلىك ورگاندارى اراسىنداعى ارىپتەستىكتىڭ وڭ ءتاجىريبەسى دە بار. مىسالى, كاسىپوداقتار مەن الماتى اكىمدىگىنىڭ اراسىنداعى ايماقتىق كەلىسىمنىڭ اياسىندا تاراپتاردىڭ پىكىرلەرىن ەسكەرە وتىرىپ, تۇرمىستىق-كوممۋنالدىق قىزمەتتەر مەن قوعامدىق كولىكتە ءجۇرۋ ءتاريفىن بەكىتۋ, ۇوس مۇشەلەرى مەن مۇگەدەكتەرىن, زەينەتكەرلەردى, وقيتىن جاستار مەن حالىقتىڭ باسقا دا الەۋمەتتىك قورعالماعان ساناتتارىن جول اقىسىنداعى جەڭىلدىكپەن قامتاماسىز ەتۋ ءۇشىن جولاۋشىلار تاسىمالداۋشى كولىك مەكەمەلەرىنە تولەنەتىن بيۋدجەتتىك دوتاتسيا مولشەرلەرىن بەلگىلەۋ كەلىسىمىنە كەلدى.
قۇرامىنا جوعارى وقۋ ورنى قىزمەتكەرلەرى مەن ستۋدەنتتەرىنىڭ 130 مىڭنان استامى مۇشەلىككە ەنگەن «پاراسات» ءبىلىم جانە عىلىم قىزمەتكەرلەرىنىڭ الماتى قالالىق كاسىپتىك وداعى ءۇشىن جاستار, ايەلدەر جانە باسقا دا ۇكىمەتتىك ەمەس ۇيىمدارمەن سىندارلى اراقاتىناستى رەتتەۋ وتە وزەكتى بولىپ تابىلادى. سوڭعى جىلدارى «نۇر وتان» حدپ اقف-مەن تىعىز قارىم-قاتىناس ورناتتىق. كاسىپوداق پارتيامەن بىرگە سىبايلاس جەمقورلىقپەن, كەدەيلىكپەن جانە جۇمىسسىزدىقپەن كۇرەس جۇمىستارىن جۇرگىزۋدە.
2013 جىلدىڭ 28 قاڭتارىندا كاسىپوداق بەلسەندىلەرىمەن كەزدەسۋىندە ەلباسى نۇرسۇلتان نازارباەۆ بىلاي دەدى: «بۇگىنگى كاسىپوداقتار – بۇل ازاماتتىق قوعامنىڭ ماڭىزدى بولىگى, ول شىنايى الەۋمەتتىك مەملەكەت قۇرۋدى قولدايدى. بۇل – مەملەكەت پەن جۇمىس بەرۋشىلەر ۇنقاتىسۋىنىڭ تۇراقتى سەرىكتەسى. بۇل قىزمەتكەرلەردىڭ ەڭبەك جانە الەۋمەتتىك-ەكونوميكالىق قۇقىقتارىن قورعاۋدى قولدايتىن زاڭدى جەتىلدىرۋدىڭ تەڭ اۆتورى». جاڭا زاڭنىڭ قازىرگى قازاقستاندىق كاسىپوداقتاردىڭ ەلباسىمىز بەرگەن جوعارى باعاعا ساي كەلۋىنە ىقپال ەتەتىندىگىنە سەنىمدىمىن.
دانات جاڭاتاەۆ,
«نۇر وتان» پارتياسىنىڭ الماتى قالالىق
فيليالى ساياسي كەڭەسىنىڭ مۇشەسى, «پاراسات»
ءبىلىم جانە عىلىم قىزمەتكەرلەرىنىڭ كاسىپوداعى
الماتى قالالىق ۇيىمىنىڭ توراعاسى,
پروفەسسور.