وسى جىلدىڭ سوڭىنا دەيىن 50 مىڭ قازاقستاندىق جاپپاي ونلاين وقىتۋدىڭ "Coursera" جەتەكشى الاڭىندا ءارتۇرلى داعدى مەن ماماندىق بويىنشا ءبىلىم الا الادى. وقۋ رەسۋرسى 4,4 مىڭ كۋرسقا تەگىن قول جەتكىزۋگە مۇمكىندىك بەرەدى, - دەپ حابارلايدى Egemen.kz
"Coursera" حالىقارالىق ونلاين ءبىلىم بەرۋ پلاتفورماسى قر ەڭبەك جانە حالىقتى الەۋمەتتىك قورعاۋ مينيسترلىگى جانە "ەڭبەك رەسۋرستارىن دامىتۋ ورتالىعى" اق-مەن ىنتىماقتاستىق تۋرالى كەلىسىم اياسىندا قازاقستاندىقتارعا IT, گۋمانيتارلىق عىلىمدار, ەكونوميكا, فيزيكا, مەديتسينا, كاسىپكەرلىك, ماركەتينگ جانە تاعى باسقا باعىتتار بويىنشا ونلاين كۋرستارعا قولجەتىمدىلىكتى قامتاماسىز ەتىپ وتىر.
وقۋ ۇزاقتىعى ورتا ەسەپپەن 6-10 اپتانى قۇرايدى جانە سوڭعى جوبانى قورعاۋ نەمەسە ەمتيحان تاپسىرۋ مۇمكىندىگى بار تاپسىرمالار مەن اپتالىق جاتتىعۋلاردى قامتيدى.
كۋرستار ورىس جانە اعىلشىن تىلدەرىندە وتەدى جانە ساباق اياقتالعاننان كەيىن قاتىسۋشىلار وقۋدى راستايتىن سەرتيفيكاتتار الادى.
تاڭدالعان باعىت بويىنشا وقۋعا قاتىسۋ ءۇشىن 2020 جىلدىڭ 15 قازانىنا دەيىن www.enbek.kz ەلەكتروندىق ەڭبەك بيرجاسى ارقىلى وتىنىش بەرىپ, 31 قازانعا دەيىن www.coursera.org پلاتفورماسىندا تىركەۋدى راستاۋ كەرەك.