توبىل وڭىرىندە قاشىقتان وقىتىپ جاتقان مۇعالىمدەر دە, ۇيدە وتىرىپ ءبىلىم الاتىن وقۋشىلار دا قاجەتتى تەحنيكالىق قۇرىلعىلارمەن تولىق قامتاماسىز ەتىلگەن. ساباقتار وقۋ جوسپارى بويىنشا بەكىتىلگەن كەستەگە سايكەس ءجۇرىپ جاتىر. ال شتاتتىق رەجىمدە جۇمىس ىستەپ جاتقان 336 ءبىلىم مەكەمەسىندە 22 مىڭنان استام بالا مەكتەپكە بارىپ وقىپ ءجۇر. باستاۋىش سىنىپتاردا 15 وقۋشىعا شاقتالعان كەزەكشى سىنىپتار جۇمىس ىستەپ جاتىر. بۇگىندە ايماق مەكتەپتەرىندە 2016 كەزەكشى سىنىپ بار.
ءبىلىم باسقارماسىنىڭ باسشىسى زاۋرە بايمەنوۆانىڭ ايتۋىنشا, ەڭ ءبىرىنشى كەزەكتە شتاتتىق رەجىمدە جۇمىس ىستەپ جاتقان مەكتەپتەردەگى سانيتارلىق تالاپتاردىڭ ساقتالۋى قاتاڭ قاداعالانادى. بۇل ماقساتتا وبلىستىق بيۋدجەت قاراجاتىنان ءبىلىم بەرۋ ۇيىمدارىنا جەكە قورعانىس قۇرالدارى مەن دەزينفەكتسيالاۋ قۇرالدارىن ساتىپ الۋ ءۇشىن 30,5 ملن تەڭگە بولىنگەن.
– بالالاردىڭ ءومىرى مەن دەنساۋلىعىن ساقتاۋ ماقساتىندا مەكتەپتەرگە بارلىق سانيتارلىق قاۋىپسىزدىك شارالارى جۇرگىزىلدى. مەكتەپكە كىرىپ-شىعۋ تالاپتارى بەكىتىلىپ, ونىڭ ورىندالۋ بارىسى كۇندەلىكتى قاداعالاۋعا الىندى. كۇن سايىن ءار مەكتەپتىڭ كىرەبەرىسىندە مەديتسينا قىزمەتكەرلەرى كەزەكشىلىك ەتەدى. ولار قىزمەتكەرلەر مەن وقۋشىلاردى تەرمومەترمەن تەكسەرىپ, قولدارىن, اياق كيىمدەرىنىڭ تابانىن دەزينفەكتسيالاپ تاڭەرتەڭگى فيلتردەن وتكىزىپ بارىپ قانا مەكتەپكە كىرگىزەدى. بيىل 25 قىركۇيەكتە وبلىستىق ءماسليحاتتىڭ سەسسياسىندا قوسىمشا دەزينفەكتسيالاۋ قۇرالدارىن, ياعني سانيتايزەرلەر, اياقكيىمگە ارنالعان دەزينفەكتسيالاۋ كىلەمشەلەرى, تەرمومەترلەر, اۋا رەتسيركۋلياتورلارى, كۆارتس شامدارى, انتيسەپتيكتەر مەن دەوحلور ساتىپ الۋ ءۇشىن تاعى 206,5 ملن تەڭگە قاراجات ءبولىنىپ وتىر, – دەدى ز.بايمەنوۆا.
قاشىقتان وقىتۋدىڭ باستى قۇرالى – ساپالى ينتەرنەت پەن قۋاتتى كومپيۋتەر. بيىلعى جاز ماۋسىمىندا جەرگىلىكتى بيۋدجەتتىڭ 1,4 ملرد تەڭگە قارجىسىنا 6 مىڭ كومپيۋتەر ساتىپ الىنعان. قىركۇيەكتە ۇكىمەت قورىنان 2,4 ملرد تەڭگە تاعى ءبولىنىپ, 1 584 كومپيۋتەر, 11 586 نوۋتبۋك, 2 052 پلانشەت ساتىپ الىنىپ وتىر. بۇل كومپيۋتەر قۇرىلعىلارىنىڭ العاشقى لەگى تاياۋدا عانا وبلىستىڭ 8 اۋدانىنداعى مەكتەپتەرگە تاراتىلدى. باسقارما باسشىسىنىڭ سوزىنشە, قاشىقتان وقۋدى قامتاماسىز ەتۋ ماقساتىندا جىل باسىنان بەرى وبلىس مەكتەپتەرىنە 12458 كومپيۋتەر جەتكىزىلگەن. قازان ايىندا قوستانايعا جالپى سانى 13 638 نوۋتبۋك پەن پلانشەت كەلۋى ءتيىس. ولار 20 اۋدانداعى قالعان مەكتەپتەرگە تاراتىلىپ بەرىلەدى.
بيىل بالاباقشالارمەن جانە ورتا ءبىلىم بەرەتىن مەكەمەلەردى بەينەباقىلاۋ كامەرالارىمەن قامتاماسىز ەتۋ ماقساتىندا 187,2 ملن تەڭگە ءبولىنىپ, قىركۇيەك ايىنىڭ بىرىنە دەيىن وبلىستاعى 488 مەكتەپ پەن 122 بالاباقشانىڭ بارلىعىنا بىردەي بەينەباقىلاۋ قۇرىلعىلارى ورناتىلدى.
ەندىگى ماسەلە جىلى دارەتحاناسى جوق مەكتەپتەردىڭ ماسەلەسىن شەشۋ بولىپ تۇر. ماسەلەن, امانگەلدى اۋدانىندا 11 مەكتەپتە, جانگەلدين اۋدانىنىڭ 3 مەكتەبىندە جىلى دارەتحانا جوق. وسى 14 مەكتەپتى ىشكى سانيتارلىق توراپتارمەن جابدىقتاۋ ءۇشىن وبلىستىق بيۋدجەتتەن 23,9 ملن تەڭگە بولىنگەن. باسقارما باسشىسى جىل سوڭىنا دەيىن بۇل ماسەلە شەشىلەتىنىن ايتتى.
بۇگىندە وبلىستاعى جالپى ءبىلىم بەرەتىن 321 مەكتەپتىڭ اۆتونومدى جىلىتۋ جۇيەسى بار. 2 مەكتەپ ەلەكترمەن جىلىتىلادى. ال 33 مەكتەپ پەش جاعىپ وتىرسا, 132 ءبىلىم وشاعى ورتالىق جىلۋ جۇيەسىنە قوسىلعان.
– بۇگىنگى تاڭدا پەشپەن جىلىتىلاتىن 33 مەكتەپتىڭ ءبارى ءبىر قىسقا جەتەتىن وتىن, كومىرلەرىن ءتۇسىرىپ الدى. قازىردىڭ وزىندە 468 مەكتەپتە جىلۋ جۇيەسى جۇمىس ىستەپ تۇر. گازبەن جىلىتىلاتىن 16 مەكتەپتىڭ ەسەپتەگىش قۇرالدارى تەكسەرىلىپ جاتىر. تەكسەرۋ جۇمىستارى اياقتالىسىمەن, ولار دا جىلۋ جۇيەسىنە قوسىلادى. سونداي-اق قازىر جوسپارلى كۇردەلى جوندەۋ جۇمىستارى ءجۇرىپ جاتقاندىقتان, قوستاناي قالاسىنداعى 4 مەكتەپ جىلۋسىز وتىر. جوندەۋ اياقتالىسىمەن بۇل مەكتەپتەرگە دە جىلۋ بەرىلەدى, – دەدى ز.بايمەنوۆا.
باسقارما باسشىسى وبلىستا ارنايى ءبىلىم بەرەتىن ۇيىمداردىڭ دا قىزمەت اياسى كەڭەيتىلىپ جاتقانىن تىلگە تيەك ەتتى. ماسەلەن, قىركۇيەكتە رۋدنىي قالاسىندا قوستاناي قالاسىنداعى پسيحولوگيالىق-پەداگوگيكالىق تۇزەۋ ورتالىعىنىڭ قۇرىلىمدىق بولىمشەسى اشىلعان. بۇل ەرەكشە ءبىلىم بەرۋدى قاجەت ەتەتىن بالالاردىڭ وبلىس ورتالىعىنا بارماي-اق جەرگىلىكتى جەردە ساپالى كوررەكتسيالىق كومەك الۋىنا مۇمكىندىك بەرىپ وتىر. الداعى قاراشا ايىندا ارقالىق قالاسى مەن امانگەلدى اۋدانىندا دا وسىنداي ورتالىقتاردى اشۋ كوزدەلىپ وتىر.
وبلىس مەكتەپتەرىندە كۇندەلىكتى وتەتىن ءپان ساباقتارىمەن قاتار, وقۋشىلاردىڭ تانىمىن كەڭەيتىپ, قابىلەتىن ۇشتايتىن ونلاين رەجىمدەگى ءبىلىم بايقاۋلارىن ۇيىمداستىرۋعا ەش كەدەرگى جوق. مىسالى, 28 قىركۇيەكتە وڭىرلىك WorldSkills Kostanay-2020 چەمپيوناتى باستالدى. ءتورت كۇنگە سوزىلاتىن بايقاۋ وسىمەن التىنشى رەت ۇيىمداستىرىلىپ وتىر. 32 بىلىكتىلىك بويىنشا 160-تان استام وقۋشى, 250 ساراپشى قاتىسىپ جاتقان ءبىلىم جارىسىنىڭ جەڭىمپازدارى وسى اپتانىڭ اياعىندا انىقتالادى.
ايماقتا مۇعالىمدەردىڭ بىلىكتىلىگىن جەتىلدىرۋ, ەڭبەگىن باعالاۋ, مورالدىق, ماتەريالدىق تۇرعىدان قولداۋ كورسەتۋ ماسەلەلەرى باستى نازاردا. مىسالى, رەسپۋبليكالىق «ۇزدىك پەداگوگ» كونكۋرسىنىڭ وبلىستىق كەزەڭىندە جەڭىسكە جەتكەن 6 مۇعالىمگە 800 مىڭ تەڭگەنىڭ ۇستىندە اقشالاي سىياقى بەرىلىپ, جەڭىمپازدار ارنايى ديپلومدارمەن جانە سەرتيفيكاتتارمەن ماراپاتتالعان. باسقارما باسشىسىنىڭ ايتۋىنشا, بيىل مۇعالىمدەردىڭ الەۋمەتتىك مارتەبەسىن ارتتىرۋعا ەرەكشە كوڭىل ءبولىنىپ وتىر.
قوستاناي وبلىسى