ازاماتتاردىڭ الەۋمەتتىك كارتاسى مەن "قازپوشتانىڭ" وزگە دە جوبالارى تاياۋدا قوستاناي وبلىسىندا جۇزەگە اسىرىلا باستايدى. بۇل ماسەلە وبلىس اكىمى ارحيمەد مۇحامبەتوۆ پەن "قازپوشتا" اق باسقارماسىنىڭ توراعاسى قانات الپىسباەۆتىڭ كەزدەسۋى بارىسىندا تالقىلاندى, دەپ حابارلايدى Egemen.kz.
بۇگىندە ايماققا قاراستى ەلدى مەكەندەرگە 211 پوشتا نىسانى مەن 30 شاقتى فرانچايزينگتىك ۇلگىدەگى بولىمشەلەر قىزمەت كورسەتەدى. قوس تاراپ الەۋمەتتىك كارتانى ەنگىزۋ بويىنشا بىرنەشە جوبالاردى جۇزەگە اسىرۋدى كوزدەيدى. سونىمەن قاتار "KAZPOST Business" ءموبيلدى قوسىمشاسىن ەنگىزۋ, ەلەكتروندىق ساۋدانى دامىتۋ, e-commerce جانە فۋلفيلمەنت ورتالىعىن اشۋ سياقتى جوبالار جوسپارلانىپ وتىر.
وبلىس اكىمى مەن "قازپوشتا" توراعاسى اۋىلدىق جەرلەردە پوشتا سالاسىن دامىتۋعا باعىتتالعان ءوزارا ىنتىماقتاستىق تۋرالى, سونداي-اق قوستاناي وبلىسىندا "قازاقستان ازاماتىنىڭ الەۋمەتتىك كارتاسى" پيلوتتىق جوباسىن دامىتۋ بويىنشا ءوزارا ارىپتەستىك تۋرالى مەموراندۋمدارعا قول قويدى.
پيلوتتىق جوبانىڭ العاشقى كەزەڭىندە زەينەتاقى, جاردەماقى, اتاۋلى الەۋمەتتىك كومەك الاتىن 1200 ادام "ازاماتتىڭ الەۋمەتتىك ID-كارتاعا" يە بولادى. اتالمىش جوباعا قاتىساتىن مەكتەپ ۇجىمدارىنىڭ دا ءتىزىمى انىقتالدى.
ال قوستانايداعى ەكى ساۋدا بازارىندا ەلەكتروندى ەسەپ ايىرىسۋ پيلوتتىق جوباسى جۇزەگە اسىرىلاتىن بولادى.